LUKA 1
1
Laibu In Atup
(Nas 1.1)
1Huai thilte i lak ua tak petpet a gintak a om, mi tampi in athu gelh ana tup uh, 2atung a pan a mute leh thu nasemte'n ahon hilh bang un, 3Theophilus aw, abul a pan bangkim chiantak in ka sui a, kizom zel in nang a ding in kigelhleh ahoih ding, ka chi hi; 4huai tuma a nang ahon hilh uh thudik ahi chih na theihsemna ding in.
Baptispa Johan Pian Ding Thu
5Judia gam kumpipa Herod adam lai in, Abijah pawl a mi amin Zakariah a-om a; huai mi in Aaron tanute lak a khat zi in anei a, amin Elizabeth ahi. 6Anih un Pathian mitmuh in diktat in a-om ua, gensiatbei in Toupa thupiak leh adan thuseh tengteng zui in a-om zel uhi. 7Himahleh Elizabeth achiin ziak in ta anei kei ua, anih un upa pitak ahi tuak uhi.
8Huan hichibang ahi a, apawlte hihdan ngeina bang a Pathian ma a siampu nna sem a a-om lai in, 9siampu dan bang in Toupa tempul a lut leh gimlim hal atan ahi. 10Gimlim hal hun lai in mipite avek un inpua ah ana thum uhi.
11Toupa angel khat gimlim halna maitam taklam a dingh in akiang ah akilak hi. 12Zakariah in amuhtak in alungzing a, lauh leng alau hi. 13Himahleh angel in akiang ah, “Zakariah, lau ke'n, na ngetna zak a a-om ziak in, na zi Elizabeth in tapa hon neihsak dia, amin Johan na sak ding ahi. 14Huan nang nuam in na kipak ding a; amah apian in mi tampi akipak ding uhi. 15Toupa ngaih in milian ahi dia, uain leh zu himhim adawn kei ding; anu sung a pan in Kha Siangthou in adim ding hi. 16Israel suante tampi Toupa a Pathian lam uh angasak nawn ding hi. 17Pate lungtang tate lam angasak ding, michihmohte midiktat pilna lam ngasak ding, Toupa a dia mipite mansa a omsak ding a bawlkhol ding in Elijah lungsim leh thilhihtheihna pu in Toupa ma ah apai ding,” achi hi.
18Huan Zakariah in angel kiang ah, “Huai bangchi in ka thei dia? Kei putekpi hi ing a, ka zi leng pitek ahi ngal a,” achi hi.
19Angel in adawng a, akiang ah, “Kei Gabriel, Pathian ma a dingh zel ka hi; nang hon houpih ding leh hiai thuhoih hon hilh ding a sawl ka hi. 20Ngai in ka thugente ahuntak a hong tung ding, na gintak louh ziak in huai thilte ahong tun masiah na dai dide ding a, pau leng na pau thei kei ding,” achi hi.
21Huan mipite'n Zakariah ana ngak ua, tempul sung a a-om sawt ziak in lamdang asa mahmah uhi. 22Huan ahong pawt in akiang uah thu agen theita kei hi; huchi in tempul ah kha kilak amu ahi chih atheita ua; akiang uah chiamtehnate abawl a, pau thei lou in a-om hi.
23Huan hichi ahong hi a, anasepna ni akimtak in a-inn ah apaita hi. 24Huai nite nung in, azi Elizabeth agaita a, kha nga akisel zoh in, 25“Mi lak a ka minse khuhna ding in, Toupa'n ahon muh in, hichibang in ka tung ah ahihta,” achi hi.
Jesu Pian Ding Thu
26Huan akha gukna ah Pathian in Galili gam a khua khat Nazaret achih uah, angel Gabriel, 27nungak siangthou khat kiang ah asawl a, huai nungak tuh David suan a mi khat amin Joseph toh kikham ahi ua; nungak min Mari ahi. 28Huan akiang ah angel alut a, “Chibai, nang nakpitak a deihtuam; na kiang ah Toupa a-om,” achi hi.
29Huai thugen ziak in alunghimoh mahmah a, bangchidan a chibai hon buk adiam aw? chi in akingaihtuah hi. 30Angel in akiang ah, “Mari, lau ke'n; Pathian a pan deihsakna na tang hi. 31Ngai in, na gai ding a, tapa na nei dia, amin Jesu na sa ding hi. 32Amah milian ahong hi ding a, Tungnungpen Tapa achi ding uh. Toupa Pathian in apu David laltutphah ape dia, 33Jakob suante tung ah tangtawn in vai ahawm dia, agam in bei ni anei kei ding,” achi hi.
34Huan Mari in angel kiang ah, “Hiai bangchi in ahi thei dia? Pasal lah nei lou ing a,” achi hi.
35Huan angel in adawng a, akiang ah, “Na tung ah Kha Siangthou ahong tung ding a, Tungnungpen thilhihtheihna in ahon liahkhum ding, huaiziak in misiangthou hong piang ding leng, siangthou Pathian Tapa chih in a-om ding, achi hi. 36Ngai in, na sanggamnu Elizabeth in leng atek nung in tapa apaita; achiing achih uh, tu kha akha gukna ahita hi. 37Pathian thupawt himhim thil hi thei lou a-om kei,” achi hi.
38Mari in, “Ngai in, Toupa sikhanu ka hi, na thu bang zel in ka tung ah tung hen,” achi hi. Huan angel in apaisanta hi.
Mari In Elizabeth Avehna
39Huai lai in Mari athou a, singtang ah, Judia gam a khua khat ah ahoh pah hi. 40Zakariah inn ah alut a, Elizabeth chibai abuk hi. 41Huan hichi ahong hi a, Mari in Elizabeth chibai abuktak in, asung a naungek ahong kitawm a; Kha Siangthou in Elizabeth ahong dimta hi; aw ngaihtak in akikou a, 42“Nang numei sapsap ding in na hampha hi, na gilgah leng ahampha hi. 43Ka Toupa nu ka kiang a na hong bangchidan ahia oi? 44Ngai in, na hon chibai buk husa ka bil a aluttak in, akipah ziak in ka sung a naungek akitawm hi. 45Agingtanu leng ahampha hi, akiang a Toupa thugen tangtung ding ahih ziak in,” achi hi.
Mari Phatna La
46Huan Mari in:
“Ka nuntakna in Toupa apahtawi e,
47ka kha leng ka Hondampa
Pathian tung ah akipak mahmah a.
48Asikhanu namtomdan amu a,
ahehpih a; ngai in,
tunung siah khang tengteng in hampha ahon chi ding uh.
49Amah mihat in ka tung ah
thil thupitak ahon hihsak a,
amin leng asiangthou hi.
50Amah laute tung ah akhang-akhang in azahngaihna a-om hi.
51Aban in athahatdan a-ensak a,
mikisatheite alunggelna uh ahihdalhta hi.
52Alaltutphah ua tu kumpipate akaikhia a,
namtomte apahtawita hi.
53Gilkialte thil hoih in ahihvah a, mihaute khutvuak in apaimangsakta hi.
54Asikha Israel taksap awng ahuta a,
azahngaihna theihgigena ding in.
55I pipute Abraham leh asuante kiang a tangtawn thuchiam agen bang ahi.”
56Akiang uah kha thum vel Mari a-om a, a-inn ah akik nawnta hi.
Baptispa Johan Pianna
57Huan Elizabeth nau neih ahong hunta a; huchi in tapa ahon neita hi. 58Toupa'n atung ah azahngaihna thupi asuah chih avengte leh asanggamte'n ana za ua, akipahpih uhi.
59Huan hichi ahong hi a, ani giat ni in naungek zeksum ding in ahong pai ua; amin ding in apa min mah Zakariah sak atum uhi. 60Anu'n, “Hilou e, Johan chih ding ahi,” chi in adawng hi. 61Anu kiang ah, “Na sanggamte lak ah hiai min pu kuamah a-om kei uh, achi uhi. 62Huan apa kiang ah chiamtehna bawl in, amin ding in bang sa lehang na deih a? achi uhi. 63Huan laigelhna pek angen a, amin Johan ahi,” chi in agelh hi. 64Avek un lamdang asa mahmah uhi. Thakhat in akam hong kihong in, alei ahong kiphel a, Pathian phat in ahong paukheta hi. 65Akim ua omte tengteng in alauta ua; huchi in huai thute Judia gam singtang gam tengteng ah athangta hi. 66Aza peuhmah in, alungtang un avei chiat ua, “Huai naungek bangchi phet ahong hi diam aw?” achi uhi. Huan Toupa khut in amah apanpih hi.
Zakariah Thugenkholhna
67Huan apa Zakariah, Kha Siangthou in adim a, agenkhol a,
68“Toupa Israel' Pathian phat in om hen,
amite ahong veh a,
tatna abawlsak hi.
69Asikha David inkuante lak ah
hotdamna kii ahon bawlsak tak ziak in;
70Tang lai a pan a zawlnei
siangthoute kam a agen bang in.
71I doute lak leh hon ho tengteng lak a hotdam a i om ding thu,
72I pipute kiang a achiam
zahngaihna tangtungsak ding leh athukhun siangthou theigige ding in.
73I pu Abraham kiang a kichiam a,
74I doute lak a ahon humbit a,
lau lou a ama nna i sepna ding in.
75I damsung teng a amitmuh a siangthou leh diktattak a omna ding in.
76Ahi, Bawi, nang zaw
Tungnungpen Zawlnei ahon chi ding ua;
alampite bawlkhol ding in
Toupa ma ah na pai ding hi.
77Akhelhnate uh ngaihdamna
dia amite kiang a
hotdamna theihna pe ding in.
78I Pathian lungtang a zahngaihna nou ngiingei ziak in,
huchi in tunglam a kipan i tung a ninou suak in ahong veh ding a,
79mial lak leh sihna lim a tute tanvak ding leh khamuanna
lampi a i khete kalsuansak ding in,” achi hi.
80Huan naungek ahong khanglian deuhdeuh a, akhalam ahong hat hiaihiai a, Israelte kiang a ahong kilak masiah gamdai ah a-om gige hi.
Currently Selected:
LUKA 1: PAITBSI
Highlight
Share
Copy
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
