MARKA 16
16
Jesu Thohnawnna
(Mat 28.1-8; Luk 24.1-12; Joh 20.1-10)
1Huan Sabbath ni abei in han ah Mari Magdalin, Jakob nu Mari leh Salomite ava hoh ua, amah nuh ding in gimlim alei uhi. 2Ni sagih ani masapen in, zingsangpi in, nisuah lai in han ava tung uhi. 3“Han kong a suang kua'n hon khukkhiaksak ding adiam aw?” akichih laitak un, 4adak uleh suang khukkhiaksa in amuta uh, alian mahmah ngal a. 5Han sung ah alut ua, pasal khat puanngou silh, ataklam pang a tu amu ua; lamdang asa mahmah uhi.
6Huchi in ama'n akiang uah, “Lamdang sa kei un; Jesu Nazaret mi, akilhden uh, na zong ua; athounawnta; hiai ah a-omta kei; en un, asialna uh! 7Himahleh pai unla, anungzuite leh Peter kiang ah, Galili gam ah na ma uah apai ding hi; na kiang ua achih bang ngei in huai ah na mu ding uh,” achi hi.
8Huchi in linna leh lamdang sak luatna in amau atuam ziak in apawt ua, han a kipan atai vengveng ua; alauh ziak un kuamah kiang ah bangmah agen kei uhi.
Mari Magdalin Kiang A Kilakna
(Mat 28.9-10; Joh 20.11-18)
9Huan ni sagih ni masapen zingsang a athohnawn in, Mari Magdalin, asung a pan dawi sagih adelhkhiakna nu kiang ah akilak masapen hi. 10Amah Jesu ompih zelte kiang ah ava hoh a, misi suun a akah lai un ava hilhta hi. 11Himahleh amah ahing a, muh leng amu chih aza na ua, agingta tuan kei uhi.
Nungzui Nihte Kiang A Kilakna
(Luk 24.13-35)
12Huai nung in alak ua mi nih gam lam zuan a apai lai un mel dang pu in akiang uah akilak nawn hi. 13Amau nungzui dangte kiang ah ava hilh ua, amau thu leng agingta tuan kei uhi.
Jesu Sawm-le-khatte Kiang A Kilak
(Mat 28.16-20; Luk 24.36-49; Joh 20.19-23; Nas 1.6-8)
14Huai nung in, an a-um lai un sawm-le-khatte kiang ah akilak a, athohnawn nung a amute thu agintak louh uh leh alungtang khauh thu uah ataihilh hi. 15Akiang uah, “Khovel tengteng ah pai unla, thilsiam tengteng kiang ah tanchinhoih hilh un. 16Agingta a baptisma tang hotdam in a-om ding a; agingta lou tuh siam louh tang in a-om ding. 17Hiai chiamtehnate'n agingtate azui zel ding: Ka min in dawite adelhkhe ding ua, pau thak in apau ding uh; 18khut in gulte ala ding ua; sihna gu bangchibang dawn mah le uh bangmah achi kei ding uh; damloute tung ah akhut uh akoih ding ua, adam zel ding uh,” achi hi.
Jesu Vankahna
(Luk 24.50-53; Nas 1.9-11)
19Huchi in Toupa Jesu'n akiang ua thu agen khit in van ah pitouh in a-om a, Pathian taklam ah atu hi. 20Huchi in amau apaikhia ua, gam teng ah thu agenta uhi. Toupa'n amau aseppih a, chiamtehnate'n zui in thu ahihkip zel hi. Amen.
Currently Selected:
MARKA 16: PAITBSI
Highlight
Share
Copy
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
