MARKA 15

Pilat Ma A Jesu Pina

(Mat 27.1-2; 27.11-14; Luk 23.1-5; Joh 18.28-38)

1Huan zingsang ahong hih in, siampu liante, upate leh laigelhmite leh vaihawmte tengteng toh akihou ua, Jesu ahen ua, api ua, Pilat kiang ah apeta uhi. 2Pilat in akiang ah, “Judate' Kumpipa na hi hia,” chi in adong a, ama'n akiang ah, “Na gen bang in himah ing,” chi in adawng hi.

3Siampu liante'n thu tampi in ahek uhi. 4Huchi in Pilat in adong nawn a, akiang ah, “Bangmah a dawng lou maw? Ngai in, ahon hekna uh tamdan!” achi hi. 5Jesu'n bangmah in adawng kei; huchi in Pilat in lamdang asa mahmah hi.

Jesu Thah Dia Thutan Ahi

(Mat 27.15-26; Luk 23.13-25; Joh 18.39—19.6)

6Huan Pilat in ankuanglui ni in mi henta khat anget peuhmah uh apawtsak zel hi. 7Mi khat, Barabbas achih uh, ahelte lak ah hensa in a-om a, amah bel helna a pang leh tualthat ahi. 8Mipite ahohtou ua, amau a dia ahihsak zel bang a hihsak ding in angen uhi. 9Pilat in adawng a akiang uah, “Judate' Kumpipa hon khahsak leng na ut uhia?” achi hi. 10Siampu liante'n hazat ziak a paipih uh ahi, chih athei hi.

11Himahleh siampu liante'n Barabbas pawtsak zawk ngen ding in mipite ahasuan uhi. 12Huan Pilat in akiang uah, “Judate' Kumpipa achih uh bang ka lohta dia le?” chi in adong nawn hi.

13Huan amau, “Kros ah kilhden in,” chi in akikou nawn uhi.

14Pilat in akiang uah, “Bang ding in maw? Bang ahihkhial a ahia?” achi hi. Himahleh amau, “Kilhden in,” chi in akikou semsem uhi.

15Huchi in Pilat in mipite hihlungkim ut in, Barabbas apawtsakta a; Jesu avuak zoh in kilhden ding in apeta hi.

Sepaihte'n Jesu Nuihza bawlna In Anei Uh

(Mat 27.27-31; Joh 19.2-3)

16Huan sepaihte'n inn huangsung kong lai, Praitoriam achih uah, amah apilut ua, apawl ua mi tengteng asamkhawm uhi. 17Huchi in puan sandup asilhsak ua, linglukhu phan in akhusak uhi. 18“Chibai, Judate' Kumpipa!” chi in chibai abuk uhi. 19Alu sialluang in akhen ua, chil aphih ua, khukdin in chibai abuk uhi. 20Huan nuihza bawlna a azatzoh un, puan sandup ahawk ua, ama puan asilhsak nawn ua, kilhden ding in apikhia uhi.

Jesu Kilhdenna

(Mat 27.32-44; Luk 23.26-43; Joh 19.17-27)

21Huan mi vialvak khat, Kurini khomi, Alexander leh Rufas pa, Simon, agam lam a kipan hong pai, akros po ding in aman uhi. 22Golgotha mun ah Jesu api ua, huai tuh Luguh Mun, chihna ahi. 23Huan uain murrah toh hel apia ua, himahleh adawn nuam kei. 24Akilhden ua, atan ding chiat uh theihna ding in aisan in apuansilhte akihawm uhi. 25Akilhden hun uh dak thumna vel ahi. 26Ahekna lai atunglam ah agelh ua, “JUDATE' KUMPIPA,” chi in. 27Huan suamhat nih, ataklam ah khat, aveilam ah khat amah toh akilhden uhi. 28Laisiangthou in, “Amah talekte toh simkhawm ahita,” chih genna hihtangtun in a-omta hi.

29Huan mi kivialleh peuh in alu uh sing in, “Ehe! Nang tempul susia a ni thum a lam nawnpa, 30Kihondam inla, kros a kipan hong kum in,” chi in a-enghou uhi. 31Huchi mah bang in siampu liante'n, laigelhmite toh, amau lak a enghou in, “Midang bawn hondam a, amah kihondam theiloupi in,” achi uh. 32I muh a, i gintak theihna ding in, “Khrist, Israel Kumpipa, tu in kros a kipan hong kumleh akei dia,” achi uhi. Huan amah toh akilhden samte'n leng a-enghou uhi.

Jesu Sihna

(Mat 27.45-56; Luk 23.44-49; Joh 19.28-31)

33Huan dak gukna ahong hih in, dak kuana dong in gam pumpi ahong mialta hi. 34Dak kuana ding in aw ngaihtak in Jesu, “Eloi, Eloi, lama sabakthani?” chi in akikoukhia a, huai tuh, “Ka Pathian, Ka Pathian, bang achia hon paisan?” chihna ahi.

35Huan akiang a dingh khenkhatte'n huai azak un, “Ngai un, Elijah sam ahi,” achi uh. 36Mi khat atai a, uain thuk spanji diahdim in, chiangdawn ah atak a, adawnsak hi. “Khawl dih ua, amah lakhe ding in Elijah ahong hiam i en ding uh,” achi uhi. 37Aw ngaihtak in Jesu akikou a, akha akhahta hi.

38Tempul puanzak atunglam a kipan anuailam pha in ahong keksuakta hi. 39Amazawn a sepaih zaheutupa dingh in huchibang a akha akhah amuh in, “Hiai mi zaw Pathian Tapa ahi ngeingei,” achi hi.

40Numeite'n leng gamlatak a dingh in a-en ua; huaite lak ah Mari Magdalin, Jakob naupangzaw leh Joses nu Mari, Salomi leng apang uhi. 41Huaite Galili gam a a-om lai a, amah zui a, a-nna sepsak zelte ahi uhi; numei dang tampi Jerusalem a amah toh hohtoute leng a-om uhi.

Jesu Vuina

(Mat 27.57-61; Luk 23.50-56; Joh 19.38-42)

42Huan nitaklam ahih in Kisakkholhna ahih ziak in, huai Sabbath ma ni ahi, 43Arimathai a om, Joseph, vaihawmpa zahtakhuai, Pathian lalgam lamenmi, ahong pai a, hangsantak in Pilat kiang ah alut a, Jesu luang angenta hi. 44Huchi in Pilat in huchibang a asih pah lamdang asa mahmah a, huchi in sepaih zaheutupa sam in, asihna asawtta hiam chih adong hi. 45Sepaih zaheutupa kam a pan sita ahi chih atheih in, Joseph kiang ah aluang apia hi. 46Huan ama'n puanmalngat alei a, amah alakhia a, puanmalngat in atuam a, han khuakkuak ah asial a, suang in han kong adelhta hi. 47Huan Mari Magdalin leh Joses nu Mari in asialna amu uhi.

Currently Selected:

MARKA 15: PAITBSI

Highlight

Copy