KUITIR 11
11
Jerusalem Kuibinga Pitorin ava Ril
1Hava suale kuitir ngai le Judai rama unai ngaiin alei riat u na, Jentail mi ngaiin um Pathian chong apom atia. 2Hatuka Pitor Jerusalema ase le hava han vun an at mi ngaiin ama le anrual u na ei ti u, 3“Nang hi vun an at lui ngai ina nei lut hanuk amani bila bu nei nek!” ati u na. 4Tenchu Pitorin a phuta amani rang ha abul ata anzom pata a rui ngai ha a manchu na aril.
5“Koi hi Joppa khuana borzonga kei om hava lai tak han mongkophila kei oma anralna khat kei man ka ena kei mu, Jani lian pa khat anga a honga chuma hava ha kil manli a sura anvan ata ei hong masum hanuk hava ha ka kom tenpei ahong hava tiang han ka en sadima ka mandona hatuka kei mu havana han phila sakemanli nukanei hatuka rama sa, khaisuk khaiphar le anvana va dora a om. 6Ka dep uala asadima ka ena aloma ina om sakemanli dora, ramsa dora le alonlim le chunga azuang va ngai dora ka mu. 7Hatuka chong khat um ka riat ei na ril ha, ‘Anthui ro, Pitor that ro sa ro!’ 8Tenchu kei ti, ‘Puma hantin han ni no rase asik chu anthiang lui annim neinun ite ka bai sunga la manlut ngai makung.’ 9Tenchu voi annina anvan ata hen ana masanga, ‘Pathianin ei manthiang ha, nangin hava ha anthiang mak ti no ro.’ 10Hantin han voi anthum ei ni. Nuka hava ngai dora ha anvan tiang akal ret. 11Hatuka enta anrappa pasal anthum nei omna ina han hava han ahonga anding u, amani ha Kaisari ata ka kom a hong antir ei ni u. 12Hatuka Rathan koi hi iam lui na bui thaka amani bila ase rang ei na ril. Hatuka hiva ka parual mi aruk um ka bila ei hong u, nuka ha mi a ina nei lut. 13Aman koini ei na ril hi aman vanpalai khat anralna ei mu ha vanpalai ha a ina han andinga ei ti, ‘Joppa na mi tir tan Simon anti Pitor ha ama ha kuia hong tuang u ro. 14Aman nang narang chong na ril inti hava lehan nang le na in komi dora zokna man u na ti.’ 15Nuka chong aril ranga ka phut le hontinmo koini chunga ei ni ha hantin han amani chungam Ratha Anthiang ei chul. 16Hanke Puma a chong ha kei lan thei ei ril anga han: ‘Johonin tia baptisma ei pek. Tenchu Ratha Anthianga baptisma chang un na ti.’ #Kts 1.5 17Hantin han amanin Puma Isua Krista a iam sua u le hontinmo koini ha, hantin den amanim Pathianin anrual chianga bor ei na pek ani tak anten havan han koi hi tu ngal mo kei ni Pathian kei khar rang?”
18Hiva chong ngai dora a riat u na a dai rek u. Hanke Pathian ei manpak u na ei ti u, “Hanoten chu Pathianin Jentail mi ngai um damna rang malung anthulna ei pek ke anga!” ei ti u.
Antiokei Khuana Kuibing
19Hava han Stephan a ruia antak ei tong u sika anthek rak ngai ha amani ha Phoiniki Kupra le Antiokei tenpei a sir apang a chei u na anthek chit u. Juda ngai kom rong chong ei ril u. #Kts 8.1-4 20Tenchu amani bila itukmo chu Kupra le Kurini mi ei om hiva ngai hi Antiokei a a hong u na Grik ngai komam chong ei ril u Puma Isua ruia thanga hui aril u. 21Hatuka Puma kut amani bila ei oma hanuk a tampa min ei iama Puma tiang ei kir.
22Nukhona amani rui Jerusalema Kuibing ngai kuara ei van thang. Hava han hangai ha Antiokei tenpei Barnaba ha ei tir u. 23Ama ha ava suaka Pathian a lungkham ha amuna a rai aman san. Hanuk mi dora ranga chongbe a neia amani ha malung khat a choia Pumana a ngir ranga. 24Asik chu ama ha mi dik hanuk Ratha Anthiang le iamna na abit ei ni hatuka mi tampa Pumana a hong anlop u.
25Hava suale aman Saul anrok ranga Tarsa tiang a pana hanke ama ha amu na Antiokeia a hong tuang. 26Hatuka amani ha kum khat pei kuibinga munkhata ei om u hava han mi tampa ei manchu. Hatuka Antiokeia ruaisi ngai Kristian raming ei anphua mansa u.
27Hava lai tak han Jerusalem ata Antiokei a deari hozetmo ahong. 28Amani bila Agaba atia mi khat anthuia Rathana ei ril, phil chunga maitam hong inti hava ha Klaudian a op lai han ei ni. #Kts 21.10 29Hava han ruaisi ngai doran ei thei ei nei u anga Juda na unai ngai sanna ranga amani kom anthuan ranga a masat u. 30Hanuk hava ang han sin um ei tho u Barnaba le Saul a kut lehan a tar ngai kom sum ei mathuan u.
Currently Selected:
KUITIR 11: RANGBSI
Highlight
Share
Copy
Want to have your highlights saved across all your devices? Sign up or sign in
Ranglong NT with PSA - Dankit Athar Le SAM
Copyright © 2017 by The Bible Society of India
Used by permission. All rights reserved worldwide.
