KUITIR 14
14
Ikonia na
1Nuka Ikonia na hangai ha munkhata Juda ngai anchunna ina ei lut u. Hanke chong ei ril sabaka han Juda le Grik ngai a tampan a iam u. 2Tenchu ha Juda hetel lui ngai ha amanin unai ngai a let tiang Jentail ngai malung ei mathok u na ei lei man mumak u. 3Hantin han amani hi ha muna asotpa a om u Puma a chunga a rang sabaka chong ei ril u. Hatuka amam lungkham amupu achong ei ril amani kut lehan riatna sin le tichangbui sin ei antho. 4Hatuka khuana mi ngai mun annina ansem u Juda tiang senkhat, kuitir ngai tiang senkhat ei chang u.
5Hatuka Jentail ngai le Juda ngai amani ha ulian ngai bila kuitir ngai ha maimok ei sak u hanuk lunga deng ranga ei val u le a riat u na. 6Lukonia na Lustra le Derbe khua na hanuk kil tina a rot u. 7Hatuka hava han thang ahui aril u.
Lustra le Derbena
8Lustra na mi khat ansuta ei om a ke na ranak abui ama ha a nun avong ata akhor kal reng choi mak. 9Hava mi ha Paul a chong ei rangai. Paulin a en sadima adamna ranga iamna ei don a muna, anring sabaka ei ti, 10“Na ke le andin phita anding ro,” ati pe. Hava han ama ha antoma anthuia kal achoi. 11Hatuka Paulin ei tho ha, amu u na mi ngaiin Lukonia chonga anringa ei ti u, “Pathian ngai ha miring mel anputa koini na kom ei hong chum keng!” 12Hatuka Barnaba rang ha Zeus ati u. Hanuk Paul ha chong aril khitpu hasik han ama ha Harmas ati u. 13Hatuka kho kola Zeus a biakin a om ha ama chaizungin serat tangte le rakari a hong koia mi bila a honga dar rang atia.
14Tenchu kuitir ngai Barnaba le Paulin a riat u na a puan u ngai atheta a tana mi bil ata a suak u na anring sabaka ei ti u: 15“Pu ngai hava ngai ha i chongmo nei tho u koinim nangni anga ahui antak atong miring. Koinin nangni hi, hiva thang ahui nei na hong ril hi, hiva dora a korong nei ni u ata ha Pathian adam tiang a honga kir na nang u. Anvan le phil le tipuilian a sunga dora asin ha. #Ant 20.11; Sam 146.6 16Ama han tian ata nam tin a lampui chipa ei pan a phala. 17Hanum aman aninga a riat abuia siak mak, asik chu asa tin aman atho anvan ata roti ei anra na rang zoro le hun apeka, sak le raisana na malung u ei man ting,” ati na. 18Hia chong ngai arila amanin antak sabaka amani makunga sa thata dali dar rang ata aman bang u.
19Tenchu Antiokei le Ikonia ata Juda mi ahong phora. Hatuka amanin mi aman chang u na Paul ha lung ei deng u hanuk kho tual panga a keia atuang u athi ranga ei iam u. 20Tenchu ruaisi ngai ha kil manlia anding u le ama ha kho sunga ava lut zing khua vara ama ha Barnaba bila Derbe na ase.
Suria Rama Antiokeia Kir U
21Hatuka hava khuana thang ahui arila hava han mi tampa ruaisi asina amani ha Lustra na Ikonia le Antiokei a akir u. 22A se tir u na amanin ruaisi ngai malung ei manngira hanuk hangai ha lungngam ei sak u, iama ei det thei u na ranga hatuka ei ti u, “Antak chu chunga keng Pathian Ram nei lut rang.” 23Hatuka amanin kuibing tina amani ranga upa aphuna hanuk hangai chunga bor a zong u na Puma ahonga iam ngai ha ama kuta hangai ha ei betok u.
24Hava suale amani ha Pisidia amalai taka ase u na Pamphulia na ava tung u. 25Hatuka amani ha Perga na chong aril u na Attalia na ase u. 26Hanuk havan ata rakuang le Antiokei ase u. Asin tho u ngai ha hiva muna hava sika Pathian lungkham ei chang u.
27Ava tung u le kuibing ngai ha ei manchun u.Hava han Pathian amani bibila ei oma a sintho dik u ngai le aman Jentail ngai ranga iamna makot ei malong pe ha hava dora ei ril u. 28Nuka amani ha ruaisi ngai bila nikhua sotpa a om u.
Currently Selected:
KUITIR 14: RANGBSI
Highlight
Share
Copy
Want to have your highlights saved across all your devices? Sign up or sign in
Ranglong NT with PSA - Dankit Athar Le SAM
Copyright © 2017 by The Bible Society of India
Used by permission. All rights reserved worldwide.
