KUITIR 2
2
Pentikos Nia Ratha Anthiang Honga Chum
1Pentikos ni asuakle hangai ha alom u na munkhata anchun u. #Lev 23.15-21; Dan 16.9-11 2Hatuka anlaiseka anvan ata phaivua anga thinthi rasa a honga hanuk ei ansut u na ina hava in a bit thak. 3Hatuka aher ahera achul moi malei a chung u chipa ansut. 4Hava han amani alom u na Ratha Anthiang a bit u na Rathan hangai ha chong ei pek u ang pei a chong a tatei a ei chong u.
5Havalai tak han Juda ngai anvan thuaia nam tin ata ahong Pathian abiak mi ngai Jerusalema ei om. 6Hatuka hava rasa anthangle, mi tampa ahong ngai ha ei hianna adong u na asik chu achong u chipa ei chong ariat u na. 7Hava han ei anlai a achang ei mandong u na ei ti u, “Enta hiva mi ngai ei chong u so, Galili mi kiar ni u mak sole! 8Hanle hontinamo aram chong chipa chong nei riat. 9Parthai, Medai, Elamatai mi hanuk Mesopotamia Judai le Kappadokia, Ponto. 10Asia, Phrugia le Pamphulia, Aigupta, Libia rama Kurini kola adep mi ngai hatuka Roma om ngai Juda mi, 11Juda Pathian abiak, hanuk Krita le Arab mi koini na ninga na chong hava ngai han Pathian sin alian pangai chong nei riat!” 12Hantin han hangai ha alom u na anlai u hatuka amani le amani anril u na, “Hong ti na mo hi?” ati u. 13Mi tei ngaiin maniero atho u na, “Hiva ngai hi zun ri u keng,” ati u.
Pitor Chongril
14Tenchu Pitor somleikhat ngai bila andinga anring sabaka hangai kom chong arila ei ti: “O Juda mi ngai, o Jerusalema om ngai dora nangnin re u ro, hanuk ka chong hi rangai u ro. 15Asik chu nangnin hiva ngai hi anri nei ti u tenchu ni u mak asik chu atun ani vaitak thuar ke ala ni. 16Tenchu hiva hi Joel deari chong ril ha.
17‘Hun hek tika hintin hin ni inti hiva hi Pathianin ati, #Joel 2.28-32 (LXX)
Phil chunga ka Ratha athek ka ti;
Hava han na naipasal u ngai na nainupang u ngai le chong ril unti.
Hatuka na ruathar u ngaiin,
Anralna la mu unti
Hanuk na atar u ngaiin ramang phan unti.
18Hanuk ka suak ngai chunga le ka suak nu ngai chunga;
Hatik han koi ka Ratha a the ka ti,
Hatuka amanin Ka chong ril unti.
19Chunga anvana changdongna;
Hanuk thuaia phila andangna tin,
Thisen moikhu manlang ka ti.
20Puma ha alian le anthang nikhua ahong man;
Ani sa zing inti
Tha thisen chang inti
21Hatuka hintin ni inti Puma
raming apai tak chu zok inti.’
22“O Israel ngai, hiva chong dora rangai u ro, Nazaret Isua han sinthotheina tichangbui andangna ngai lehan na kom u na Pathian thotheina ata andang miring hava lehan Pathianin na kom u na hava dora sin ei tho nangnin na riat u. 23Ha miring Pathian masuk mandon man ata a riat anga han ansurle nangnin ama ha dik lui ngai kut lehan krosa anpeka nei that u. #Mt 27.35; Mk 15.24; Lk 23.33; Jn 19.18 24Pathianin thina antak ata a mazoka ei mathui asik chu ama ha thinan sur tita makhap thei mak. #Mt 28.5-6; Mk 16.6; Lk 24.5 25Asik chu David han hava rui ha ei ril: #Sam 16.8-11 (LXX)
‘Ka Puma ha nikhuan tina ka makunga kei mu
asik chu ama hi ka sim tiang a om
ka malung ei zing nokna ranga.
26Hasik han ka malung rai
a sana ka maleiin phamna
chong arila hanuk ka pumin sabeia ngak inti.
27Asik chu nangin ka nuk athi khuana
na betok no ta nia hatuka na mi anthiang
a hek man mu no ta ni.
28Nangin adamna lampui ha na manthei zei
na mel asa lehan ka rai nei
mansanna makhipin na ti.’
29“Unai ngai ha na chipui David a ruia a ngam chaka ka na ril thei u. Anuk ha achata anphuma hatuka athan atun ten koini na kola ala om. 30Hanle ama ha deari ei ni hanuk ei ril Pathianin khomak ansam chunga akom hiva hi ei ansam ama azerem thaka angkhat ha ama reng chomphanga mansut inti. #Sam 132.11; 2 Sam 7.12-13 31Hantin han man ata ei lei riata Krista ei anthuiretna ruia hiva chong hi ei ril, ‘Ama ha athina na anmak mak a taksa hek mak.’ 32Hiva Isua hi Pathianin ei mathui koini na loma hiva rui a riat. 33Hasik han ama hi Pathian a chang tianga kut lehan ei ansanga hatuka Pa kom ata chong antinna Ratha Anthiang ei mana hi nei mu nei riat u hi aman ei athek. 34Asik chu David vana lon mak tenchu hiva chong hi ei ti, ‘Puman ka Puma ha ati ka chang tiang ansut ro. #Sam 110.1 35Anan mumak ngai na kepha thuaia ka siak nok maseng.’ 36“Hasik han Israel nam doran re rase ha nangnin Krosa nei pek u Isua ha Puma Pathian le Krista ei man ni rit!”
37Hiva chong ariat u na a malung u a kho na. Hatuka amanin Pitor le kuitir atei ngai rong ha ei ti u, “Unai ngai imo tho ma ni?”
38Hanke Pitorin hangai ha ei ti pe, “Malung makhir u ro hanuk nangnin asia saina ranga Isua Krista raminga Baptisma chang chip u ro, hantin aniten Ratha Anthiang pek man un na ti. 39Asik chu hiva a khomak ansam nangni ranga le na nai u ngai rang hanuk alana ngai dora ranga koini Pathian Puman pai a hong ruai inti.”
40Hanuk chong a tatei atampa a la ril hanuk hangai rang ha chong arila, “Atun taka hetel lui ngai ata na ninga anrung u ro!” 41Hava ha ama chong atel han amani ha baptisma a chang u. Hava han hava nikhua asang anthum ni inti amani bila ansap u. 42Hatuka hangai ha kuitir ngai anchuna na ei ansem u na vaipol akhiaka le borzonga anchel u.
Kuibing kara Omdan
43Hava han achi kiar u hatuka kuitir ngaiin tichangbui, le andangna sin atho u. 44Hatuka aiam ngai han amanin alom u na munkhata aloma ei siak u. #Kts 4.32-35 45Hanuk aphai alung anei anung a zuar u na a nang le ei nang u tak zotor alom u na ei anbak u na ei pek u. 46Hatuka hangai ha nikhuan tina malung munkhata Biakina le ina ei oma vaipol a khiaka raisana malung anthianga ei sak u. 47Pathian ei manpak u hatuka mi doran ei adit u hanuk sandam a man ngai ha Puman nikhuan tina hangai ei sap ei man son tir u.
Currently Selected:
KUITIR 2: RANGBSI
Highlight
Share
Copy
Want to have your highlights saved across all your devices? Sign up or sign in
Ranglong NT with PSA - Dankit Athar Le SAM
Copyright © 2017 by The Bible Society of India
Used by permission. All rights reserved worldwide.
