KUITIR 20
20
Makedonia le Akaia na
1Ha rahu ha abang sua le Paulin ruaisi ngai ha akuia hanke lungngam asaka raisana anthan u na Makedonia na ase ranga a vuna. 2Nuka hava muntiang ase tira chong atampa lehan ruaisi ngai ha lungngam asaka Grik rama ava suak. 3Hava muna than thum a oma ti lam tiang Suria rama ase rang ansin le hava han Juda ngai ama dui ranga zia ei tho u sika Makedonia tiang ase ret ranga ansin. 4Hatuka Beroia khuana Pur naipasal Sopatar, Thesalonika Aristarka le Sekunda, Derbe na Gaia, Timothi, hanuk Asia rama Tukhika le Trophima ngai hi ama bila ase u. 5Amani hin alei ase u na. Troas a ana lei ot u. 6Hava suale Chol anchel lui Vaipol Panta nikhua a theng le Philipin ata ti lama na sena ni ranga na Troas a amani kom na va tunga hava muna ni sari na om.
Troas Paul ei se Nukkhitna
7Hatuka hapta nikhua mansana vaipola khiak ranga nan chun le Paul ha zingkhua vara ase ranga ansin atia ruaisi ngai kom chong arila zan anchim tenpei a chong. 8Nei anchunna in a chung tadan ha hava han achan lem ei tam. 9Hatuka Eutuka atia mi ruathar khat kharpelepa ei ansut, anvuang sabaka ei om Paulin chong ei ril sana asota ei lei in sabak sika kharpelep ata thar anthum thuaia achul hanke mi ngaiin ama ha athi ava rut u. 10Hanke Paul ava chuma a chunga avan boka a kuana. “Pusabak u no ro asik chu anuk la chat mak a phuk ala om!” ati. 11Nuka ama ha chunga ase na vaipol akhiaka asak u na asotpa khuavar tenpei ei chong ei ang, hantin han ei se. 12Hatuka amanin ha ruathar ha adama ahong tuang a chalaka malung anngamna aman u.
Troas ata Melitana
13Hatuka mana na leia sena rakuanga na chuanga Asso na se havan ata Paul ha anchuang rang nei ti asik chu ama ha tang lam tiang ase ranga ei mandon. 14Nuka ama ha Asso na koini bila anlopa na tuanga Mitulini na na hong. 15Havan ata rakuang na kheka zing khuavar nikhuana Kio kola na va suak ni anni nikhua Samo mualanlana na man laka hanuk nikhuana Melita na na hong. 16Asik chu Paulin Ephesi maka ase rang ei zot Asia na ei sot u nokna ranga ei annot sabak athei ten Pentikosni na Jerusalema avan chel theina ranga.
Paul in Anthanna Chongril
17Melita ata aman Ephesi na mi a tira kuibing ulian ngai ava man kuia a ahong tuang u. 18Amanin ama kom a honga suak u le aman hangai ha ei ti pe, “Na riat u Asia rama ka honga aphut nikhua len ata na bil u na hontinmo kei om. 19Malung annuai sabaka mit rathi le hanuk, Juda ngai zia tho na, ei na val u na kei oma antak atiar chunga Puma suak sin kei tho. 20Ite chong asa thup luia aloma keina ril kiar u hanuk tuallaia le in tina anan chu u rang anreng making. 21Pathian ranga malung anthul hanuk koini na Puma Isua na iamna ruia Juda le Grik ngai kom kei hong ril. 22Hatuka atun en ta, Ratha Anthianga kei anthunga Jerusalem kei pan. Sova muna hongmo ka chunga ei ni rang hava ham remaking. 23Atun len han kei riat Ratha Anthiangin kho tina ka kom hintin hin ei na manthei ankhit le antakin ei na maruang. 24Tenchu ka ninga ka nuk um ite na tel making ka ranga man anei ngala remakung ka lampui zi rikung tenpei kei tan theina rang. Hanuk Pathian lungkham thang ahui aril dorbondom Puma Isua ata kei man hi kei zui theina rang. #2 Tim 4.7
25“Hatuka atun en ta kei riat hi hava ram rui kei rila kei cheina ngai nangni na lom u na na mu u lai no ta ni. 26Hava sik han avian hiva hi keina ril ani u zei mi dora thisen phuba ata chu kan thiang. 27Asik chu Pathian mansuk anan thei u rang anreng makung. 28Nangni na ning u na ruia anrenga hanuk Ratha Anthiangin uliana ei na phun u na han hava bera rual ngai chunga anreng u ro Pathian a kuibing ha manliang u ro aman aninga a thisen le ei rachok ha. 29Ka riat ka se suale, ngelang anchar ngai na bil u na hong lut intia a pal ngai ha hoi no ni. 30Hanuk nangni na bilam hohomo chu ruaisi ngai bila anuk tiang akir ranga chonglet ril pe unti. 31Hasik han, meng u ro, mandon u ro, kum anthum sun, zan mi tin ha mitrathi suak chunga chunngo atho mong makung.
32“Hatuka atun Puma koma le a lungkham chong koma keina thak u aman aphuna le andeta anthiang ngai bila dong aluak ranga a na pek thei. 33Tute a rupa, a rangkachak le a puan ite ningol making. 34Nangnin na riat u ka rang le ka lom ngai ei ansam u nokna ranga hi kut anni hin sin ei tho. 35Rui tina ankhina keina manmu u hintin hin a ponga ranak abui ngai nei san rang hanuk Puma Isua chong andon a nang asik chu aman aninga ei ti, ‘Alak nek ten apek hi chanasana ei ni.’ “
36Hi a chong arila a mankhuk abila loko bila bor a zong. 37Hanke alom u na a chalaka ei chap u. Hanuk Paul aring eia kol u na abiang ei tum u. 38Ei ril bila a malung ei na u na khit chu ama ha mu u lai no ni. Nuka rakuang tenpei a thak ranga ase u.
Currently Selected:
KUITIR 20: RANGBSI
Highlight
Share
Copy
Want to have your highlights saved across all your devices? Sign up or sign in
Ranglong NT with PSA - Dankit Athar Le SAM
Copyright © 2017 by The Bible Society of India
Used by permission. All rights reserved worldwide.
