KUITIR 21
21
Paul Jerusalema Ase
1Amani kom ata antak sabaka anthan u na rakuang a kheka andin phita Kos mualanlana na hong, zing khuavara Rodi mualanlana hanuk havan ata Patara na va tung. 2Hatuka rakuang khat na man vinga ankan vinga Phoiniki na ase rang hava han na chuanga na se. 3Nuka Kupra mualanlan anlang le hava ha na voi tiang na maka Suria rama na sena Tura na na chum asik chu hava han rakuanga neinun ansum anang. 4Hatuka havana ruaisi ngai anroka ni sari hava han na om hangai ha Ratha lehan Paul ha Jerusalema ei se nokna ranga ei ril u. 5Hava han ni hozetmo na om suale na suaka na se hava han amanin a nungak a sanai u ngai le alom u na kho tualpang tenpei ana va thak u ranga a hong u hava han tipuilian tang kola khuksabila borzong chunga nan than. 6Hava suale rakuanga na chuanga hanuk amani ha amun u na ase u.
7Hanuk Turi na maka ti tianga nei se hava suana Ptolemai a na va suaka hanke unai ngai na phama ni khat amani bila na om. 8Zing khuavara nan pheta Kaisari na na hong hanke thang ahui aril Philip ha sari bila angkhat ha ama ina na luta abila na om. #Kts 6.5; 8.5 9Hava mi han nai nungak anthiang manli adon amani han maton lam chong ei ril u. 10Hava muna nikhua sotpa na om le Juda ata Agaba atia mi khat deari ahonga suak. #Kts 11.28 11Hatuka ama ha koini na kom ahonga Paul akongkhit ri lehan aninga akut ake akhita ei ti: “Ratha Anthiangin hiva chong hi arila ha mi akongkhit ri len lehin Juda ngaiin Jerusalema hintin hin khit untia Jentail ngai kuta manlon unti.”
12Hava ha ariat u na hava na unai ngai le koini le Paul ha nei mathem, Jerusalema ama ha se no ro ati na. 13Hava han Paulin amasang, “Imo nei tho u nei chap u na ka malung nei makhui u? Asik chu Puma Isua raming sika Jerusalema ankhit rong nimak athim kan sin,” ati.
14Hantin han koini na chong atel ranga nuam maka na mong; “Puma ei zot chuk rase,” na ti na.
15Hiva nikhua ngai anzui le na neinun ngai na maloma Jerusalem na pan. 16Hatuka Kaisari ata ruaisi senkhat koini bila anthoka amanin Kupra mualanlana Manason atia mi khat abila ei hong tuang u ama hi ruaisi mansa bila ama ina khual nei ni ranga chong.
Paulin Jakob ava Mu
17Jerusalema na va tung suale unai ngaiin raisana koi hi ana lei pom u. 18Zing khuavara Paul ha koini bila Jakob a ina alut hava han atar ngai alom u na a honga suak u. 19Hava suale aman hangai ha apham sabaka Pathianin ama a dorbondomna na Jentail ngai bila ei tho ngai dora ha hava rui ha angkhat angkhata ei rila ei manthei. 20Hatuka hava ariat u na hangai han Pathian a manpak u hanuk ei ti pe u, “Parual Paul, na mu mo Juda ngai bila asang itukmo a iam ani zei. Hatuka amani hi alom u na Dan anga tak ei sat u. 21Hatuka nang na ruia amanin hintin hin ei lei riat u, hi nangin Jentail ngai bila a a om Juda mi dora ha Mosi lampui anmaka nei manchu na nei ril pe amani han naipang ngai vun an at nokna ranga le Dan anga ei tho u nokna rang. 22Hasik han atun imo nei tho rang? Amanin, nei hong hi ei riat nget u rang keng. 23Hasik han koinin nei na ti tak pei hava ha tho ro. Koini bila pasal manli a om chachak. #Mip 6.13-21 24Hangai ha tuang tan la amani bila nang um van thiang ro hanuk amani luvuina rang tham ro. Hava ha na tho ten re untia, na ruia thang ei lei riat u ha ite ni mak, nang um Dan azi na riti anga a leng nei ni chang inti. 25Tenchu ha Jentail ata a honga iam ngai ha amani ruia koinin rui nei rila nei maziak hi doi thona dali thisen mo-ol andena athi me hanuk uiare hiva ngai ata amani ha anrung u rase.” #Kts 15.29
26Hanke Paul, ha mi ngai ha atuanga amani bila avan thianga Biakina alut hanuk amani ngai rang chipa dali andar tenpei anthiangna ranga sin ni itukmo ei nang rang hava ha a manthei.
Paul Ansur
27Hatuka ha ni sari ahek vit le Asia rama Juda ngai Biakina ama amu u na mi ngai dora ha a manluma hanuk Paul ha asur u na ankhek u na ei ti u: 28“O Israel mi dora ansan u ta ro, ama hi hava mi ha muntina koini nam dora le Dan hanuk hiva mun sika ei dema ei manchu hanuk aman Grik ngai um Biakina ei hong tuanga hi mun anthiang ei mannim!” 29Asik chu mana han khua na Ephesi na Trophim ha Paul a bila ei mu u. Paulin ama ha Biakina hong tuang inti ei ti u. #Kts 20.4
30Hava han khua dora ei luma ei anthok ani u zei mi ngai a honga tana hanuk Paul ha Biakin ata tual panga a keia ei tuang u hatuka han len ha makot dora ei khar u. 31Hantin han amanin Paul ha a that rang aval u lehan sipai bila asang khat a ruaipu kom hava rui ha athang a honga tunga Jerusalem dora anpon zei atia. 32Hantin han aman sipai ngai le raza ruaipu ngai a tuanga amani kom atan chiana a hong u hava han mi ngaiin asang a ruaipu le sipai ngai amu u na Paul ha ei zem u rang a mong u. 33Hanke asang aruaipun ahong pana ama ha asura zingzir anni le a khit ranga chong a pek hanuk ei rakel, “Ama hi tumo hatuka aman imo ei tho?” atia. 34Hava han mi ngai han ankheka ei ril u ngai atei atei chipa anmun u mak hatuka ei anpon u sika mandang thei maka rapal sunga atuang ranga chong apek. 35Hanke rakal a honga suak ule Paul ha mi ngaiin ei val tit sika sipai ngaiin Paul ha a dom u. 36Asik chu mi aping anu nuka ei hong hatuka anring sabaka ama ha, “That ro!” ei ti u.
Paul Aninga Satna Anril
37Amanin Paul ha rapal sunga atuang ranga ansin u le Paul han asang a ruaipu kom han, “Na kom chong ka ril lak thei mo?” ei ti.
Aman, “Grik mo na thei?” ati. 38“Hanle nang hi ha Aigupta mi ni mak che mo mana anpon ha hanuk anthupa mi phila asang manli tuanga philchar rama ase?”
39Hava han Paulin ei ti, “Koi hi Juda mi Kilikia Tarsa mi khua papei a aleng ni making keina mathem ani zei mi ngai koma hin chong na manril ro ba,” ati. 40Hatuka aril rang apek le Paul rakal luna andinga mi ngai koma akut azapa aril hanke aloma adai rek u na aman hangai rang ha Hebrai chonga ei ril.
Currently Selected:
KUITIR 21: RANGBSI
Highlight
Share
Copy
Want to have your highlights saved across all your devices? Sign up or sign in
Ranglong NT with PSA - Dankit Athar Le SAM
Copyright © 2017 by The Bible Society of India
Used by permission. All rights reserved worldwide.
