KUITIR 7
7
Stephan Chongril
1Hava suale Chaizung Lian han ei ti, “Hiva chong ngai hi atak mo?” Aman ei ti:
2“O unai ngai le pa ngai, rangai u ro. Koini na pa Abraham ha Harona a om man Mesopotamia na a om lai hava han Puma Pathianin ama ha ei antongpuia ei ti, #Anp 12.1 3‘Na ram ata le na tianga mi ngai ata suak ro hatuka ram keina man muna taka han se ro.’ 4Hanke ama ha Kaldai ram ata a suaka asena Harona ei va om hatuka a pa athi suale Pathianin ama ha, havan ata hiva rama ei hong tuang. Atuna nei om u na ram hi. #Anp 11.31; 12.4 5Tenchu hi a rama om rang pe maka kepha khat mun ngal phil pe mak ten, chong ei tin aman ama le ama suale ama achi a lua ranga hava ha pe inti, hava han nai ei la nei nokam. #Anp 12.7; 13.15; 15.18; 17.8 6Hatuka Pathianin hintin hin ei ti, ‘Ama chi ngai ram ateia khuala om unti min suak man chang inti hangai ranga kum raza manli sep unti. #Anp 15.13-14 7Hatuka amani suak anchang ngai ha koi arui u ril ka ti Pathianin ei ril sa chu, hava suale amani ha hong suaka hong unti hatuka hiva muna koi na biak unti.’ #Ant 3.12 8Hatuka aman ama ha vun at riti ei pek hatuka hantin han Abraham Isak ha ei mazir hanke ni riat nikhuana ama ha a vun ei at. Nukhona Isak han Jakob hanke Jakob han chipui somleianni amazir. #Anp 17.10-14; 21.2-4; 25.26; 29.31—35.18
9“Hatuka ha chipui ngai han Joseph ei mumak u na ama ha ei zuar u le ama ha Aigupta na ava om. #Anp 37.11,28; 39.2,21 10Tenchu Pathian ama bibila a om hanuk ei antakna, ata a khoka hatuka Aigupta reng Pharo koma lungkham le nina apeka hava han Pharon ama ha Aigupta le a in dora na uliana aphun. #Anp 41.39-41 11Hava suale Aigupta dora le Kanana maitam achul a chan antak a tong u na hatuka koini na chi pui ngai nek sak anang u zei. #Anp 42.1-2 12Tenchu Aigupta na bu om ti ariat u na Jakob koini na chipui ngai ha voi khatna a mathuana. 13Nuka voi annina na Joseph a parual ngaiin a riat u han ke Joseph a nam Pharo kom ei lan lang. #Anp 45.1,16 14Nuka Joseph a pa Jakob le a unai somsari lei ranga akom ei pai a ei mathuan. #Anp 45.9-10,17-18; 46.27 15Hava han Jakob Aigupta na ase nuka ama le koini na chipui ngai a thi u. #Anp 46.1-7; 49.33 16Hatuka amani ha Sikima a om u. Hanuk than Abrahamin sumru le Sikima Hamor nai ngai koma ei rachok hava han anphum. #Anp 23.3-16; 33.19; 50.7-13; Jos 24.32
17“Nuka Pathianin Abaraham akom khomak ei ansam ha hava khomak ei chukna rang a nai le mi ngai Aiguptana a pung u na a tampa ani u. #Ant 1.7-8 18Nukhona Aigupta chunga hanuk reng khat anpianga Joseph re lui mi. 19Ama koini na nam ngai lehan zia manga koini chipui ngai rang aphenenga ei val chu anaite u ngai dora ei masul u na ei dam thei u nokna ranga. #Ant 1.10-11,22 20Hava han Mosi ei anzir ama hi Pathian mitmuna a mel asa sika than thum tenpei a pa ina ei anvai. #Ant 2.2 21Nuka anpei suale Pharo sanun aruta a naipasala ei sin rang ei vala ei vai. #Ant 2.3-10 22Hatuka Mosi Aigupta theina ngai dora anchuna athei a ama ha chong le sina a tho thei ei ni.
23“Nuka a kum sommanli a ni le a unai ngai Isarel ngai bila anlang, arung ranga a malung anthok. #Ant 2.11-15 24Hanuk amani bila angkhat pengsom ei tho lai amu na, a san a, pengsom athopu, Aigupta mi ha a that a. 25Ama ei mandon chu a parual ngaiin re zei ni ama kut le Pathianin ei mazok ati na tenchu re u mak. 26Hatuka hanuk nikhuana amani anzem u lehan aman amani kom anlanga ei anngoi u na rang a tho na, ‘Parual ke na ni u ang khat atei chunga anzik luia ichangmo nei antho u?’ atia. 27Tenchu a inkolmi chunga anzik lui atho ha ama ha atuarraka ei ti, ‘Tumo nang hi koini ruiril pumana ana phun? 28Mizan hontinmo Aigupta mi khat nei that hava anga kom ana that rang nei na en mo?’ 29Hava chonga Mosi a rota hatuka Midian rama ava oma hava han naipasal anni a mazir. #Ant 18.3-4
30“Nuka kum sommanli akip le Sinai mual philchar rama vanpalai khat achul anbuk khata moi chuanga antong pui. #Ant 3.1-10 31Mosin aena ha ramil ha, achang ei mandonga asadima a en ranga ava depa hava han Puma he hiva hi ei riat: 32‘Koi hi na chipui ngai Pathian Abraham, Isak le Jakob a Pathian.’ Hava han Mosi annoka en ngam sa dim lai mak. 33Nuka Puman ama ha ei ti, ‘Na ke na kekok khek ro. Asik chu nei andingna mun hi phil anthiang keng. 34Aiguptana na mi om ngai antakna ka mu zei amani ei ankhek u ka riat zei hatuka amani anzok ranga kei hong chum. Atun hong ro Aiguptana na ma thuan rong.’
35“Ha Mosi ha amanin ei pom u noka ei ti u ha, ‘Nang hi ruirilpu le uliana tumo ana phun?’ Ama ha Pathianin vanpalai; ha anbuka ei antongpui, ha vanpalai akut len le ulian le anzokpua ei tir. #Ant 2.14 36Aman Aiguptana tipui sen le philchar rama kum sommanli tichangbui le changdong sin tin anlanga hangai ha ei hong mazoka ei hong tuang. #Ant 7.5; 14.21; Mip 14.33 37Ama hi ha Mosi, ha Israel nai ngai rang hiva chong hi ei ril. ‘Pathianin nangni ranga na parual u ngai bil ata ka anga deari khat manpiang inti.’ #Dan 18.15,18 38Ama hi philchara kuibing bila ei om ha vanpalai ha Sinai muala ama kom chong ei ril aman ama le koini na chipui ngai bila ei om, aman koini ngai ranga ana pek ranga damna chong ei manhong. #Ant 19.1—20.17; Dan 5.1-33
39“Koini na chipui ngaiin a he ei tel zot u nok hanekten ama ha ei henga ei pei u. Hatuka a malulung u na Aigupta tiang ei kir ret u. 40Aron ha ei ti u, ‘Koini rang ramil na buak pe ro. Ama ha koini na maton tira se rase asik chu hi Mosi hin Aigupta ram ata koini hi ei na masuaka ei na hong tuang imo ei nin zei, re mak me.’ #Ant 32.1 41Hatuka hava lai han serat te ei sin hanke ha ramil sika dali ei dar u hanuk akut sin neinun le a rai ei mansan u. #Ant 32.2-6 42Tenchu Pathian amai azinga amani ha anvana arasi abiak ranga apek hontinmo deari lekhana anziak a om: #Am 5.25-27 (LXX)
‘O Isarel chi, philchar rama kum sommanli han
nangnin ka ranga sa thata le nuam pek dali na dar u mo?
43Nangnin Molok tham in le Raphan ramil nei razon u
hatuka arasi ha ramil ngai abiak ranga nei buak u.
Hatuka nangni hi Babulon son tiang suaka na mathan u ka ti.’
44“Hontinmo aman chong ei na pek anga riatna tham in koini na chipui ngai kom ei om aman Mosi ha aril nangin om lak rua nei mu anga hava anga hava ha sin ro. #Ant 25.9,40 45Hatuka koini pi pu ngaiin amani huna ei man u na Josua bila ei hong koi u Jentail ngai omna na alut u le Pathianin koini na chi rui ngai makung ata ei not u ha puanin David hun tenpei ei om. #Jos 3.14-17 46Ama hi Pathian mit muna lungkham ei tung hanuk Jakob a Pathian ranga omna khat asin ranga ei zong. #2 Sam 7.1-16; 1 Kr 17.1-14 47Tenchu Solomonin ama ranga in khat ei sin. #1 Rng 6.1-38; 2 Kr 3.1-17
48“Hanum ranak anei han kut sin ina leng ngai mak, Dearin ei ti anga.
49‘Van ka reng chomphang #Isa 66.1-2
Phil hi ka ke pha.
Puman ei ti nangnin
Koi ka rang hontinmo in nei sin u rang?’
50Hanle ka pongansana rang mun hovanmo?
Ka kut hin hiva ngai dora hi ei sin ni mak mo?’
51“O matingpui run khir ngai hanuk malung le kuara vun an at lui ngai! Nangnin Ratha Anthiang na lei dui babang u, na chipui u ngai hontinmo? Nangnim hantin den. #Isa 63.10 52Nangni na chipui u ngaiin hova deari mo ei not u nok ha? Amanin amani ha ei that u mana adik ahong ngai anan thei ngai ha nangnin atuna an mumak ngai kuta nei peka nei that u ha. 53Nangnin Vanpalai ngai ata riti omdan nei man u tenchu nei mang u nok!”
Stephan Lung Andeng
54Hiva chong ariat u na amani ha a malung ei anthok u ama ranga a ha ei arial u. 55Tenchu ama ha Ratha Anthiang abita anvan tiang anhoia a en chiana Pathian lianna le Pathian chang tiang Isua andinga amu na. 56Hatuka aman ei ti, “Enta! Van anlonga a om hanuk Miring Sapa Pathian chang tiang anding ka mu!”
57Tenchu amani ha anring sabak ankhek u na akuar a maruk u na lokona munkhata achunga avan zuan u na. 58Hatuka ama ha khua ata a masuak u na lung adeng u hanuk ariatpu ngai ha a puan u ngai a kheka Saul atia ruathar khat ke kunga asiak u. 59Hintiang amanin Stephan ha lung a deng u na. Hatuka ama ha ankheka bor ei zong, “O Puma Isua, ka ratha hi na la pe ro,” ati. 60Nuka ama ha a mankhuk abila anringa ei ti, “Puma hiva ngai chunga hiva asia sur no ro,” ati na ama ha ei in ani zei. Hatuka Saulin ama ei anthatna a lei pom.
Currently Selected:
KUITIR 7: RANGBSI
Highlight
Share
Copy
Want to have your highlights saved across all your devices? Sign up or sign in
Ranglong NT with PSA - Dankit Athar Le SAM
Copyright © 2017 by The Bible Society of India
Used by permission. All rights reserved worldwide.
