KUITIR 8
8
Saulin Kuibing Asinsak
1Hava nikhua chu Jerusalem a kuibing chunga anrahokna a suak sabak zei hava han kuitir ngai baka chu atei dora Judai rama le Samari lampuia anthek chit u zei. 2Hatuka ruaisi ituk lekin mo Stephan ha ava phum u, hanuk ama ranga achalaka achap u.
3Tenchu Saul kuibing notna ha ei tho a in kipa a luta pasal le nupang ngai ha ei kei ei tuanga lungina ei va thak. #Kts 22.4-5; 26.9-11
Samarina Chong Anril
4Hava han anthek rak ngai ha kiltina ase u na thangahui chong ei ril u. 5Hatuka Philip Samari khuana ase a mi ngai kom Krista rui ha ei va ril. 6Hatuka mi doran Philip a chong a rangai u na hanuk ei tho andangna sin ngai dora amu u na malung khata achong ha ei tel u. 7Asik chu ratha annimin ei o, a tampa ata ha ratha ngai dora anring sabaka ankheka ei suak hanuk azeng a tampa le akhor ei dam. 8Hava han hava khua achan a rai ei san u.
9Tenchu Simon atia mi khat a om, ama ha man ata hava khuana mitpialdoi sin ei tho hava han Samari nam ha ei anlai u aninga milian ka ni ei anti. 10Ama chong ulian naipangin ei tel. “Hiva mi hi, ‘Pathian ranak ha achan alian,’ ” anti ha ei ti u. 11Amanin ama he ei pom u na asik chu hiva hi hun asot pa ata a doi thei le amani ha ei manlai babanga ei om. 12Tenchu Philipin Pathian ram le Isua Krista raming ruia thangahui aril le amanin ama chong a iam u le hava han pasal le nupang ngai um baptisma ei chang u. 13Hatuka Simon amam a iam zei hanke baptisma alaka Philip abibila ei om hatuka andangna sin le sinthotheina lian ei tho a muna ei anlai.
14Jerusalema kuitir ngaiin ariat u na Samari ngaiin Pathian chong apom u zei ati na hanke amanin Pitor le Johon ha amani kom ei tir u. 15Amani ahong u na arang u na bor ei zong pe u amanin Ratha Anthiang ei man u na rang. 16Asik chu atun tenpei amani tute chunga Ratha Anthiang la chul mak, amani ha Puma Isua raminga rong ke baptisma ei la chang u. 17Hanke amanin hangai chunga akut ei dap u na hatuka amani han Ratha Anthiang ei la man u.
18Hatuka Simonin a muna Kuitir ngai akut dap u na lehan Ratha Anthiang aman u, atia, hanke aman amani kom sum a hong koia ei ti: 19“Koi um hava thotheina na pe ro koiin achunga kut kei dap tak Ratha Anthiang ei man u na rang.”
20Tenchu Pitorin ei ti pe, “Na rupa sum ha na bila siat rase asik chu Pathian pek ha sum le anchok rang malung nei vong. 21Hiva ruia na changai hi ite om mak asik chu na malung Pathian makunga anzik mak. 22Hasik han nei sa nokna ata na malung makhir ro hanuk Puma kom zong ro, thei! Na malung mandon andual um thei kukui mo. 23Asik chu ka na mu nang hi asia dik lui sabak le ankhita a om ke na ni zei.”
24Hava han Simonin a masanga, “Nangni lenin ka ranga Puma kom na zong pe u ro, nangnin hongmo nei ti u ha ka chunga ei chuk nokna ranga,” ati.
25Nuka amanin aril u na Puma chong ril chunga ase tir u na Samari ngai khua tampana thangahui ei sem u.
Philip le Ethiopia mi Thaidor
26Nuka Puma vanpalai khat Philip rang ha ei ti, “Anthui ro sim tianga lampui Jerusalem ata Gaza tianga ava chum hava lama se ro, hava mun ha philchar.” 27Hava han ama anthuia ase. Hatuka enta, Ethiopiana Kandaki rengnu thuaia sutmun ansang mi khat thaidor rengnu a neinung dora a rung ei ni ama ha Pathian a biak ranga Jerusalema ahong. 28Nuka a kira ase hatuka a tolaia ansuta Isai deari lekha a pore. 29Hava han Rathan Philip ha ei ti, “Se tan, so tolai so va dep ro,” ati na. 30Hava han Philip atana ava depa ava rangai ama han Isai deari lekha ei pore. Philipin ei ti, “Nei pore ha na riat mo thei?” ati pe.
31Aman ei ti, “Min ana manthei nok ten hontinmo kei riat rang?” Hanke aman Philip ha akom ansut ranga ei mathem. 32Lekha buna ei pore hava ha hiva hi: #Isa 53.7-8 (LXX)
“Anthat rang bera anga an dona.
hanuk mual anchep ngai makunga berate ei dairek anga han,
hava anga a bai ma ang mak.
33Abui kar a rui aril na dan a suaka
ama hun laia mi ngai ruia tumo aril rang
Phil chung ata anuk ei damna alak ei ni.”
34Thaidor han Philip ha a masanga ei ti, “Keina mok ani zei dearin tu rui mo hiva chong ei ril atheia rui mo ole mi tei rui mo?” 35Hanke Philip a bai anlonga Pathian Lekha chong ata a phuta a kom Isua rui thangahui ei ril. 36Nuka lampuia ase tir u na amanin ti om na kola ava suak u hanke Thaidorin, “So so ti om baptisma kei chang rang imo a khar?” ati. 37Hatuka Philipin a masanga: “Na malung dora le pei na iam ten, na lak thei,” ati na. Hatuka aman a masanga, “Isua Krista chu Pathian Naipasal ani ti ka iam zei,” ati na.
38Hanke aman tolai anding ranga chong apeka hatuka Philip le Thaidor anin u ti na achum u. Hanke Philipin ama ha baptisma apek.
39Hatuka hangai ha ti ata a kal u lehan, Puma Rathan Philip ha a maruk viaka a tuanga hatuka thaidorin ama ha mu lai maka ama ha raisan chunga a lampui dena ase. 40Tenchu Philip chu Azota khuana avan lang reta. Hatuka ei se balam han Kaisari khua tenpei khotina thangahui aril titira.
Currently Selected:
KUITIR 8: RANGBSI
Highlight
Share
Copy
Want to have your highlights saved across all your devices? Sign up or sign in
Ranglong NT with PSA - Dankit Athar Le SAM
Copyright © 2017 by The Bible Society of India
Used by permission. All rights reserved worldwide.
