LUKIN 23
23
Pilat Matona Isua Hong Ruai u
(Mt 27.1-2,11-14; Mk 15.1-5; Jn 18.28-38)
1Mipui dora anthuia Pilat akom Isua atuang u, 2hava han asinsak u na: “Hiva miring hi nei sur, na mi ngai asiat changa aruai, reng kom lei choi u no ro ati pe hatuka Messia, reng khat ka ni,” ati.
3Pilatin arakela, “Juda ngai reng mo na ni?” Isuan a masanga, “Nei ti anga.” 4Hatuka Pilatin chaizung ulian le mipui kom atina, “Asik ite mu makung, ei siatna.” 5Tenchu haneka apu u na, “Ei manchuna hin nam ansualna rasua Judai rama. Galili ramam atho zeia atun hivan ei hong.”
Herod Akom Isua Ruai u
6Pilatin ariata arakel, “Hiva mi hi Galili mi mo?” 7Isua ha Herodin ei op thuaia keng ti ariata Herod akom ama man se hava lai han amam Jerusalema om. 8Isua ei mu le Herod achan arai asan asik chu ama rui ariat zeia ei mu zotnam asot zei. Isuan boidong sin thon ti, ti a iama. 9Hasik han Herodin ankel rua tampa a rakela, tenchu Isuan masang mak. 10Chaizung ulian ngai le Dan minchu ngai matona ahong u na ana sabaka bado hong tho sa u na. 11Herod le a sipai ngaiin elsekara tho u na puan anthang khat a mansil u na, Pilat akom a manse ret u. 12Hava nikhua len han Herod le Pilat mal anchang u; hava man chu andui ei ni u.
Isua ha Athirua Keng anti
(Mt 27.15-26; Mk 15.6-15; Jn 18.39—19.16)
13Pilatin chaizung ulian ngai, ruaitu ngai le mipui dora apaia, 14hatuka ati pe, “Hiva nai ka kom nei hong tuang u na mi lampui ateia aruai nei ti u. Atun na maton u na ka ena ite ei masial man making na bado tho u ngai rui ha. 15Hatuka Herodin um ei masial man maka koini kom ahong makhir ret. Hiva naiin ei thina rang khop masial don mak. 16Hasik han manzik ka ti a man se ka ti.” 17Hava pantana tumo chu anzok pe u ranga a zot pena.
18Tenchu mipui dora ankheka, “That ro! Barabba na mazok pe ro,” ati u. 19Barabba ha lungina ankhum asel sika le mithat sika.
20Pilat han Isuan zok rang chu ei nuam, hasik han mipui kom a zong reta. 21Tenchu mipui ankheka, “Kros a pe ro! Kros a pe ro!” ati u.
22Pilatin voi anthum changna ati, “Tenchu imo ei masial? Ei thina rang khop ite man making! Manzika mazok ka ting,” ati.
23Tenchu ahe ei anring u dor pei ankheka Isua Kros a anpe rase atina, ahek tena chu ei ankhek u achuk. 24Hasik han ei ti u anga Pilatin amasat. 25Ami zong u ha a mazoka, ha lungina ankhum ha, asel sika le mithat sika, hatuka Isua ha amani kom apek ei zot u anga ei lot u ranga.
Isua Krosa Antar
(Mt 27.32-44; Mk 15.21-32; Jn 19.17-27)
26Sipai ngaiin Isua aruai u na, hatuka ase u lai han Kurini ata mi khat Simon atina antong pui u ama ha khua ata khopuia hong; asur u na Isua nuk tiang Kros a manput u.
27Mipui atampan ava zina; hava bila nupang senkhat ama sika achap u na. 28Isua amani tiang anhoia ati, “Jerusalem nupang ngai! Ka sika chap u no ro, tenchu nang le na nai u ngai rang chap u ro ati. 29Nikhua la hong inti hava tika, ‘Ituk vanasa mo nai nei lui nupang chu, naite mazir ngal lui chu, nai ranu pe lui chu la ti unti!’ 30Hava tik han min mual ngai rang, ‘Na deng ro!’ Tang ngai, ‘Na thup ro,’ la ti unti. #Hos 10.8; Anl 6.16 31Thing aring ngala hintin hin ei tho u, imo ni ni achar tik vang chu?”
32Abila atei anni atuang u athat rang amani ha mi salui u. 33Hatuka, “Lu ru mun” ati na munkhat asuak u le hava han Isua Krosa atar u, hatuka ha mi salui anni ngai ham achang tiang angkhat avoi tiang angkhat. 34Isuan, “Ka pa! madual ro! Imo ei tho u re u lui keng.” A puan ha ansem u ravan a en u. #Sam 22.18 35Hava han mipui andinga athir u Judana ulian ngaiin a ero u: “Mi le a mazoka ama le zok ta rase ba Messia aniten Pathianin ei athang ha!” #Sam 22.7
36Sipai ngaiin um elsekara tho u na; ahong dep u na zu thur a manlon u. #Sam 69.21 37Hatuka, “Juda reng na ni ten zok ta ro ba,” ati pe u.
38Achunga han hiva chong ngai anziak: “Hiva mi hi Juda ngai Reng.”
39Havana akai khatin angona, “Messia ni mak che mo? Zok tan koinim na mazok ta ro ba!” ati.
40Tenchu atei han aleia ngona, “Pathian achi mak che mo? Anrual ripa nei tiar hi. 41Koini chu atiar rang ngal ke na ni, koini chu nei tho mara keng nei man, tenchu ama chu ei masial om mak.” 42Hatuka Isua kom ati, “Na mangil no ro, Isua reng anga na hong tik!”
43Isuan ati pe, “Kei ti ni zei avian ka bila Paradis a omin na ti.”
Isua Athi
(Mt 27.45-56; Mk 15.33-41; Jn 19.28-30)
44-45Dar somleianni tang ni inti ani honga zinga, ram dora ha ahonga zinga dar anthum ten pei hatuka Biakina puan anrin ha antheta. #Ant 26.31-33 46Isuan anringpa ankheka, “Ka pa! Na kuta ka ratha ka siak!” atia athi. #Sam 31.5
47Sipai ulianin hava ha amuna, Pathian amanpak, “Ama so mi sa ani nget!” ati. 48Havana mipui a en ranga anchun ngaiin amu imo ei ni, aropbur arachum u na malung anana akir u. 49Aloma Isua abinga ariat ngai, Galili ram ata nupang ahonga zi ngai, ala uala andinga a en u. #Lk 8.2-3
Isua Anphum Rui
(Mt 27.57-61; Mk 15.42-47; Jn 19.38-42)
50-51Mi khat a raming Joseph Arimathai khopuia Judai rama mi. Ama ha mi sa lalchi thorua mi khat, ama ha Pathian Ram ei hong tung anruang. Ruirilna na mi khat aninam ei masat u le ei tho u ngai pom mak. 52Pilat akom asena Isua ruak ava zong. 53Hava suale ruak ha a masuma puan le athuam thana a manzal tute ei lan phum nokna lung anchui a. 54Hava nikhua ha Sabat nikhua ranga ansinna nikhua ani na.
55Nupang Galili ata Isua azi ngaiin Joseph abila sena than ava mu u Isua aruang ha hontinmo ei anphum ham amu u. 56Hatuka intiang akir ret u na marim ahui ava mansuk u ruak ei khua u ranga. #Ant 20.10; Dan 5.14
Sabat nikhua chu pongansa u Danin ei ti anga.
Currently Selected:
LUKIN 23: RANGBSI
Highlight
Share
Copy
Want to have your highlights saved across all your devices? Sign up or sign in
Ranglong NT with PSA - Dankit Athar Le SAM
Copyright © 2017 by The Bible Society of India
Used by permission. All rights reserved worldwide.
