LUKIN 4
4
Isua Anthemnana Chul
(Mt 4.1-11; Mk 1.12-13)
1Isua, Jordon ata Ratha Anthiang abita Ratha ruaia philchar tiang a kira, 2hava han ni sommanli Diabolin amathema. Ite salui sika achan avon ancham.
3Diabolin ati pe na, “Pathian Naipasal na ni ten lung ngai hi bu man chang ro ba.”
4Tenchu Isuan a masanga, “Pathian chonga anziak ke, ‘Miring hi bu le rong khop mak.’ ” #Dan 8.3
5Hatuka Diabolin aruai a ramual aman mu na. 6Hatuka Diabolin, “Hiva ngai dora na pe ka ting, ka koma anpek sua thotheina dora le nei dora na pe ka ting, asik chu kei zot tak ka pek thei. 7Na mok ro na ta ni kiar inti,” atipe.
8Isuan a masanga, “Anziak a om, ‘Na Puma na Pathian rong amok tan ama sin tho ro ti anziak,’ ” ati pe na. #Dan 6.13
9Hatuka Diabol han Jerusalem Biakin ansang khita ava kal pui a ati pe na, “Pathian Naipasal na ni ten hivan ata antom ro, 10Anziak a om, ‘Nang ana rung rang a vanpalai hong tir inti a, #Sam 91.11 11lungin na manna no ni a kut le na madom unti tina anziak.’ ” #Sam 91.12
12Tenchu Isuan, “Anziak a om, ‘Na Puma Pathian mansin no ro ti anziaka,’ ” ati pe na. #Dan 6.16 13Anthemna tina amathem suale Diabolin chomokhat ranga amak tot.
Isuan Galilina Sin Aphut
(Mt 4.12-17; Mk 1.14-15)
14Isua, Galili rama akir reta Ratha Anthiang sinthotheina dona. Hava tang han arui antheka. 15Ankhomna ina a manchuna min a manpak.
Nazareta Isua Anheng
(Mt 13.53-58; Mk 6.1-6)
16Hatuka Isua Nazareta ase reta rati ei tungna rama, Sabat nikhua hava mana anga Sinagogue asena. Pathian chong a en rang andinga, 17Deari Isai lekha apek u na lekha anzual a phonga hiva chong amu,
18“Pathian Ratha ka kom a om, #Isa 61.1-2 (LXX)
Asik chu anriang ngai koma
thangahui aril ranga ei na thang.
Aman ankhit ngai na zok thei zei ati
ranga acho ngai mit avar zei.
Mi pengsom ngai azok zei.
19Puman anniang ngai ei mazok na
hun atung zei,”
ti aril.
20Isuan ha lekhanzual ha azual reta, a manlona ansut. Sinagogue a ahong dora mit ama tiang anhoi, 21Hatuka ati pe na, “Hivana chong hi avian atung zei anril nei riat u anga.”
22Alom u na ama a manpak u na a chong suak chongin aboi a mandong u na, “Hiva hi Joseph a naipasal nimak mo?” ati u na.
23Hatuka ati pe na, “Kan iam hiva hi na ti u na ti, ‘Daktor, na ninga andam ro,’ Kapernaum a nei tho anga hivan um tho ro na ti u na ti.” 24Isuan kei ti tatak ani, “Deari ngai khuan pham mak.” #Jn 4.44
25“Rangai u ro, Eliza damlai a rong atampa ei om Israela hava lai han kum anthum atan rua hong maka maitam anrik sabak aram sunga achul. #1 Rng 17.1 26Tenchu Eliza ha tute kom antir maka tenchu arong khat Zarephat khuana Sidon rama ase. #1 Rng 17.8-16 27Hatuka hava lai han vun rikhua antam sabak Israel rama Eliza damlai; tenchu angkhat ngal dam maka, tenchu Naman Suria rong ha adam.” #2 Rng 5.1-14
28Sinagogue a om ngaiin ariat u na achan atak asi u 29Anthui u na Isua khopui panga arasua u na tangsipa aruai u na akhopui u ei ansinna na. Nimkei sabaka ansul rang ati u na. 30tenchu mipui malaia kal a choia ase viak.
Mi khat Rathasia Don
(Mk 1.21-28)
31Isua, Kapernaum khua Galili rama asena, sabat nikhua mipui ei manchuna. 32Mi ngai aboi adong u na, asik chu racham anei anga achong. #Mt 7.28-29 33Sinagogue mi khat ratha sia don a oma; anringpa ankheka. 34“Koini imo nei na nang na, Nazareta Isua? Hivana nei om hi koini anan siat ranga mo? Nang hi ka na riat; nang hi Pathian palai anthiang na ni.”
35Isuan ha ratha ha chong apeka, “Dairek ro ha mi asung ata hong suak ro,” ati na. Ha ratha sia han mipui matona adeng raka a suaka ase ite chu manna mak.
36Mipui boidongin anti u na: “Hiva ngai hi i ang chong mo? Thotheina le racham le ratha sia a rakoka ahonga suak” ati u na. 37Hatuka Isua rui ha hava ram tang antheka.
Isuan Mi Mandam
(Mt 8.14-17; Mk 1.29-34)
38Isuan Sinagogue a maka Simon a ina ase. Simon a tarpi ha ana sabaka, Isua kom hava rui ha aril u. 39A kola avan ding ha raitun rang mathan ro ati na. Raitunin amaka chomokhata anthui lena amani rang haso adom pe na.
40Ani lut suale ana dora ahong tuang u na, Isuan a kut a dapa a mandam kiar. 41Mi tampa sungatam ni rase raluai a rakoka, “Nang hi Pathian Naipasal,” ankhek chunga ati.
Isuan ha raluai ngai kom chonglui ranga ati na, asik chu ama ha Messia tina ei riat u.
Isua Sinagogue a Achong
(Mk 1.35-39)
42Khua ei var le Isua hava khopui a maka philchar rama ase. Mipui han a roka, amani ei mak nokna ranga asur tit rang azot u na. 43“Tenchu Pathian ram ruia thangahui khopui ateiam aril ka nang, asik chu hake kei tho ranga Pathianin ei na tir,” ati na.
44Hasik han Galili rama Sinagogue tang chong aril.
Currently Selected:
LUKIN 4: RANGBSI
Highlight
Share
Copy
Want to have your highlights saved across all your devices? Sign up or sign in
Ranglong NT with PSA - Dankit Athar Le SAM
Copyright © 2017 by The Bible Society of India
Used by permission. All rights reserved worldwide.
