LUKIN 5

Isuan Zolai Eipai Mansa

(Mt 4.18-22; Mk 1.16-20)

1Nikhat chu Isua Genesaret tindil kola andinga mipuiin Pathian chong anngai ranga ava pan u na. #Mt 13.1-2; Mk 3.9-10; 4.1 2Tangkola rakuang anni amu na, nga asur ngai han rakuang amaka alen ava rasuk u na. 3Isua rakuang khata andinga Simon ata, tangkol ata tuar bet ro ati na.Isua rakuanga han an suta mipui a manchu.

4A chong suale, Simon a kom ati na, “Tinthuk tiang na rakuang tuar ro hatuka na lom ngai le nga sur ranga na len deng u ro,” ati na.

5Simonin amasanga, “Minchupu, zan sot pei na denga ite sur mak me. Tenchu nei ti aniten masum ka ti,” ati na. #Jn 21.3 6Len adeng u na nga tampa aman u na a len ngal achet rang atho. #Jn 21.6 7Rakuang ateia alom ngai asan ranga apai u. Ahong u na rakuang ngai abit reia anning rang azot. 8Simon Pitorin amuna, khuksabila Isua amok, “Puma ka kom ata ankhai ro! Masial a don miring ka ni,” ati na.

9Ama le alom ngai aboiadong u na nga tampa ei sur u sika. 10Hantin den han Simon alom ngai Jakob le Johon, Zebedi nai ngai, Isuan Simon akom ati na, “A chi no ro atun ata mi sur na ti,” ati na. 11A rakuang u tang kola bang u na alompei amak u na Isua azi u.

Isuan Mikhat Amandam

(Mt 8.1-4; Mk 1.40-45)

12Voikhat chu Isua khopui khata a oma hava han mi khat aphar a oma. Isua ei mu le andenga azong, “Puma na zot ten nana mandam thei,” ati.

13Isuan a kut a rasuana aton, “Ka zot anthiang ro,” ati na anlaiseka ha rikhua han amak. 14Isuan, “Tute manthei no ro tenchu chaizung kom se tan na lei en rase, hatuka mi kom nei anthiang ei mandang theina ranga, Mosin dali ei dar anga va tho ro,” ati pe. #Lev 14.1-32 15Tenchu Isua rui ha anthek riama mipui ahonga achong anngai rang le arikhua u ata adam ranga. 16Tenchu philchara asena bor ava zong.

Isuan Pangathi Mandam

(Mt 9.1-8; Mk 2.1-12)

17Nikhat chu Isuan mi a manchu lai tak, Pharisi le Dan anchu ngai ham ansut u na, Galili rama khopuitin ata le Jerusalem ata ahong u.Pathian ranak Isua bila oma ana ngai andam theina ranga. 18Mi senkhat, pangathi a zamun len le ahong razon u na, insung anluta Isua maton taka ava siakna a en u. 19Tenchu mipui ei tam sika lampui man u maka. Hasik han inchunga akal pui u na inchung aset u na Isua maton taka ava masum u. 20Isuan ei iam u a muna, ha mi kom ati na, “Nei masial ngai andual zei.”

21Pharisi ngai le mi Dan anchu ngai han anti u na, “Hiva mi hi tumo? Pathian adui hi! Pathian rong ke masial andual thei,” ati u.

22Isuan ei mandon u ariata ati pe, “Hi ang hi ichangmo nei mandon u? 23‘Nei masial ngai andual zei,’ ati mo abei, ‘Anthui tan kal choi ro ati mo?’ 24Manthiang ka ti hano, Miring Naipasal phila masial andualna don.” Hasik han pangathi koma, “Keina ti ani zei anthuia na zamun choi tan na in se ro!” ati.

25Anlaiseka amaton u na anthui, ei zalna a zamun alaka Pathian anpak chunga a ina ase. 26Aboi adong sabak u na! Achi sabak u, Pathian amanpak u na. “Avian tichangabui sin khat na mu,” ati u na.

Isuan Levi Akui

(Mt 9.9-13; Mk 2.13-17)

27Hava suale Isua a suaka lei ansuang a raming Levi lei ansuangna muna ansut ava mu na. Isuan ati pe na, “Na zi ro.” 28Levi anthuia, aloma amak zita ava zi.

29Hatuka Levin Isua ranga bu nekna panta adonpui a ina, hava khual ngai bila lei ansuang le mi tampa a om. 30Pharisi le Dan anchu ngaiin Isua rui aril u na a zolai ngai kom, “Ichangamo lei ansuang ngai le nam anpei ngai le nei sak nei nek u?” ati na a rakel u. #Lk 15.1-2

31Isuan amasanga, “A damin daktor nang mak, ana ngai keng anang, 32Mi sa ngai, akuia hong ni makung tenchu mi siat ngai ansir ranga,” atina a masang a.

Bungoi ruia Ankelna

(Mt 9.14-17; Mk 2.18-22)

33Mi senkhatin Isua kom atina, “Johon a zolai ngai angoi u chachaka bor a zong u chachaka Pharisi a zolai ngai um hantin den atho u, tenchu na zolai ngai chu anek asak u.”

34Isuan amasanga, “Mui aruai nana khual ne luia na makhir mo thei in a neipa om chunga? Ni thei mak! 35Tenchu nikhat chu la hong inti hava tika inaneipa om lai no ni hava tika ngoi unti.”

36Isuan hiva ankhina aril pe: “Puan marua chet diba thona rang puan athar thet mak che. Hantin na tho ten athar ham maset na ti. Ha athar han amarua anhui pui no ni. 37Hatuka uain athar thuangna rang vun marua mang mak che. Asik chu ha uain han maphuaka ha vun ham siat inti. 38Hanek ten uain athar ha vun athara anthot rase! 39uain marua na nek suale athar zot mak che, ‘Amarua ke asa nei ti.’ ”

Currently Selected:

LUKIN 5: RANGBSI

Highlight

Copy