LUKIN 7
7
Sipai Ulian Suak Amandam
(Mt 8.5-13)
1Isuan mipui kom aril suale Kapernaum tiang asena. 2Roman ulian khatin suak a dona achan ei adit hava nai ha ana na a thi ranga. 3Ha Roman sipai ulianin Isua rui ariata Juda ulian atira a suak ahong andam ranga. 4Isua kom ahong u na amathem u, “Hiva mi nei san anang. 5Koini mi ngai hi ei adit hatuka Sinagogue um ana sin pe.”
6Hasik han Isua abil u na ase len. Ei omna ha alapa ni maka mi aman se lai han, “Puma pong no ro nei na hong pan zat ni makung, 7keina hong pan zat um ni makung tenchu chong pe tan la ka suak chu dam inti. 8Koi um, ni rase, ulian thuaia om ka nina ka thuaiam ni rase sipai ka dona. Hiva nai se ro ka ti le ase; sova nai hong ro ka ti le ahong hatuka ka suak ka tir le, hiva tho ro ka ti le atho.”
9Isuan hava ngai ariat le achang adonga, anhoi tuaia mipui kom ati na ama a zi ngai, “Kei na ril u ni zei, ama anga iamna don la mu making Israel ngala!” ati na. 10Ha palai ngai ha sipai ulian a ina akir ret u na a suak ha adama ava mu u.
Isuan Arong Sapa Amandam
11Hava suale anrapa Isua Nain ati na khopui khata ase, azolai le mipuiin azi. 12Hava khopui makot ei suak le tolai anzon a mu na. Hava athi ha arong khat a nai don selep a bila khopuia mi tampa a oma. 13Puman a muna a malung ana sabak achan lungkham amu, hatuka atipe, “Chap no ro.” 14Kal achoi a tolai ava tona anzon ngai anding u. Isuan atina, “O ruathar anthui ro, ka na ti.” 15Ha athi ha anthui a achong hatuka Isuan a nu kom apek ret.
16Achi u na Pathian amanpak u, “Deari lian tak koini bila anlang! A mi ngai andam ranga Pathian ahong!” ati u.
17Hiva Isua rui antheka hava tang han.
Johon Baptispu Apalaingai
(Mt 11.2-19)
18Johon a zolai ngaiin hava rui ngai arila anni apaia, 19hatuka Puma kom atira, “Nang hi mo na ni Johonin ei ti ha, ole atei mo nei la sabei rang?” ati na.
20Isua kom ahong u na, “Johon baptispu han ana hong tir, nang hi mo na ni ahong rang anti ha, ole atei mo,” ava ti u na.
21Havalai tak han Isuan mi amandam, ratha sia hanuk mit aman vara. 22Johon a palai ngai kom a masanga, “Se tan va ril u ro imo nei mu u: acho ngai avar zei, akhor ngai kal achoi u zei, vun rikhua tong ngai adam u zei, asetin ariat zei, athi anthui zei, thangahui anriang kom atung zei. #Isa 35.5-6; 61.1 23Ka rui a iam ngai chu ravan asa,” ati na!
24Johon a palai ngaiin amak suale mipui kom Isuan Johon a rui arila: “Johon akom philchara na se u na imo amu rang nei an iam u? Chiak thinthin ei sema akual ha mo? 25Hanle i thomo nei suaka nei se u? Mi khat anliang sabaka ha mo? Havan tina mi anliang chu reng ina keng ei om! 26Na ril ta imo amu ranga nei se u? Deari mo? Ani tenchu Deari neka alian khat ke nei va mu u. 27Johon ha ani Pathian chongin ei ril: ‘Pathianin ei ti, ka palai tir ka tinga na rang lampui lei malong inti.’ #Mal 3.1 28Kei na ril u ni zei, Isuan atina: “Nupangin ei mazir a chu Johon anga alian om lai mak. Tenchu Pathian rama asin khit ngal ha Johon aranga alian.”
29Mi doran arangai a: amani le lei ansuang ngai le Pathian anthiangna rui atel ngai chu Johon akom baptisma alak u. #Mt 21.32; Lk 3.12 30Tenchu Pharisi le Dan anchu ngai chu Pathian derdin aheng u na baptisma la zot u mak.
31Isua ala chong tita, “Atun taka mi ngai hi ile mo kei mankhi rang? I angmo ei phua u? 32Amani chu bazara naipang ansut ang. Angkhatin angkhat akhek, ‘Inneina maring na suta lam u mak chena! Thankuang la na thona chap u mak che.’ 33Johon baptispu ahonga ite ne mak sa maka, ‘A sunga raluai a don na ti u na!’ 34Miring Sapa a honga, a nek a saka, ‘En u ro! Anruak zun du lei ansuang ngai mal nam anpei ngai lom!’ na ti u na. 35Pathian hianna ei anlang chu apom ngai kom rong ke.”
Isua Simon Pharisi Ina
36Pharisi khatin Isua khului bu nek ranga a kuia, Isua asena a nek rang ansut. 37Hava khopuia nupang khat masial a don a om. Isua Pharisi ina bu nek ti ariata, Alabastar bodol marim ahui abit ahong choia, #Mt 26.7; Mk 14.3; Jn 12.3 38Isua nuka ansuta ake kola achapa a mit rathi le a ke man chop pe na, hatuka asam le a hui pe, a tum pe, a ke alei pe. 39Pharisin amu na, “Hiva mi hi deari ta tak aniten, hiva nupang tumo aton hi riat inti; I masial le mo ei om riat inti!” ati na.
40Isuan ati na, “Simon keina ril rang a om.”
“O na ril ro,” ati.
41“Mi annin sumpuk a laka, angkhatin rupa raza ranga, angkhatin som ranga. 42Tuten thuan thei u maka a pei pe zit. Tun mo adit ual ni?”
43Simon in a masanga, “Kei iama atam ual ha ni inti,” ati na. Isuan, “Na dik,” ati pe. 44Hatuka nupang tiang anhoia Simon kom atina, “Hiva nupang hi na mu mo? Na ina ka honga ke suk ti na pe mak che, tenchu amit rathi le arasuka asam le aman huia. 45Na tuma na lei pham mak che, ka hong len ata ka ke ei tum la bang mak. 46Oliv sariak um ka lu na khua mak che na tenchu ka ke marim ahui le aman sipa. 47Keina ril u ni zei a lungkhamna lian ei anlang hin a masial a tampa andual ani. Tenchu alakte andual chu a lungkham alakte anlanga.”
48Hatuka Isuan ha nupang rang ati na, “Nei masial ngai andual zei.” 49Atei ansut ngaiin ati u na, “Tumo hi masial ngai andual thei hi?”
50Tenchu Isuan ha nupang kom ati, “Nei iam nan ana mazok zei; phukdaia se ta ro.”
Currently Selected:
LUKIN 7: RANGBSI
Highlight
Share
Copy
Want to have your highlights saved across all your devices? Sign up or sign in
Ranglong NT with PSA - Dankit Athar Le SAM
Copyright © 2017 by The Bible Society of India
Used by permission. All rights reserved worldwide.
