LUKIN 8

Isua Avazi Nupangngai

1Hanuk chu Isua khopuia, khua ena kal achoia thangahui Pathian ram rui arila. A zolai somleianni ngaiin azi, 2hatuka nupang senkhat ratha sia, rikhua ata adam ngaiin ava zi u: Hanuk Mari (Magdalini anti ha) ratha sia sari ei suak na ha; #Mt 27.55-56; Mk 15.40-41; Lk 23.49 3Joanna, aruathar Chuza ha Herod a ruirilna na ulian; hanuk Susana le nupang rualin Isua le a zolai ngai ranga asanna lampui a rasua u.

Bu Chi Anthek le Ankhina

(Mt 13.1-9; Mk 4.1-9)

4Khopui tin ata Isua kom ahong tira; hatuka mipui anchuna, Isuan hiva ankhina aril.

5“Voikhat chu mikhatin chi athek. Chi atheka lampuia achul min athina va ngai in arut, 6senkhat chu lung bila achula ahonga monga tenchu phil asa abui sika achara. 7Senkhat chu raling kara achula raling le lokona mong ei ni sika ralingin adip khapa. 8Hatuka asen phil asana achula ahonga monga anra, raza zel anra!”

Hatuka Isuan, rangai u ro, “Kuar a donin re rase!” ati na a manmong.

Hiva Ankhina Asik

(Mt 13.10-17; Mk 4.10-12)

9A zolai ngaiin itinamo atina arakel u, 10hatuka amasang, “Pathian Ram rui anthup hi nangni kom chu anril zei a, tenchu atei kom chu ankhinana le ankhina, en untia mu u no ni, rangai untia re u no ni. #Isa 6.9-10 (LXX)

Chin Thek ruia Anrilna

(Mt 13.18-23; Mk 4.13-20)

11“Hiva hi ha ankhinan ei derdin; chi ha Pathian chong, 12lampuia chi chul ngai ha chong anngai ngai; tenchu soitan ahonga ei iam u nok narang le sandam ei ni u nokna ranga amalung u ata akhai pe. 13Ha lung chunga chul ngai ha raisan taka Pathian chong apom ngai, tenchu ei lut anthuk maka; chomokhat ranga a iam u na ansinna hongle akiak. 14Raling kara chi chul ngai ha Pathian chong anngai ngai; tenchu andonna, neina, huina heknan, apola hava ngai han apei kiar, amara min ngai mak. 15Phil asana achul ngai chu, chong anngai a asadima atela a malung sunga asiak ngai mara tam anra ngai.

Kok sunga Lem

(Mk 4.21-25)

16“Tuten lem bela kok le makhu maka, mun thuaiam siak ngai maka tenchu lemchuangna na asiaka, ahong doran ra-ang ei muthei narang. #Mt 5.15; Lk 11.33

17“Anlang lui rang ite ankhum om mak, anriat lui rang ite ankhum mak. #Mt 10.26; Lk 12.2

18“Hasik han andon u ro hontinmo nei rangai u, asik chu adon ha pesa inti hatuka donlui ha ka don ei ti ngal ha a pot inti.” #Mt 25.29; Lk 19.26

Isua Nu le Aparual ngai

(Mt 12.46-50; Mk 3.31-35)

19Isua a nu le a parual ngai ahong u na tenchu ei anmu pui thei u nok asik chu mipui ei tam sika. 20Senkhatin Isua kom atina, “Na nu na parual ngai tual panga anding ana mu rang a zot u.”

21Isuan amasanga, “Ka nu ka parual ngai chu Pathian chong anngai a atel ngai,” ati.

Isuan Phaivua Manbang

(Mt 8.23-27; Mk 4.35-41)

22Nikhat chu Isua a zolai ngai le rakuanga a chuang u na ati pe, “Tho sontiang ral se u rei.” hatuka ase u. 23Anvei u laitak Isua a in. Anlaiseka phaivua ahonga rakuang ha ti aluta antak asuak u. 24A zolai ngaiin Isua kom asena, ava mathui u, “Puma, Puma! athi rang na ni zei avati u!” Isuan thinthi phaivua a ngona abang hatuka khua honga hui. 25Hatuka a zolai ngai kom ati, “Homo nei iam u na?” Tenchu achi u na amani le amani anti u na, “Hiva mi hi tumo?” Thinthi le tinsok angona a he tel.

Isuan Raluaiin Eisur Amandam

(Mt 8.28-34; Mk 5.1-20)

26Isua le a zolai ngai Galili ram radina Gadara ram chu ava suak u. 27Phil ei va thin le hava khopuia mi khat antong pui a, ama ha raluaiin ei sur. Asotpa ani zei puan abuia ei om hanuk ina om lui a thana ava om chachak. 28Isua a muna ankheka a ke kola anboka hen ring sabaka, “Isua, Pathian Ansang khit Sapa! Koi hi i rang mo nei na nang? Keina mok ani zei na sinsak no ro!” 29Hiva ei ti na asik chu Isuan asunga raluai ha suak ro ei ti sika. Raluaiin ei sur babang ei ni, a ke a kut zingzir le ankhitam ni rase a sata, raluiaiin philchar tiang atir chachak.

30Isuan a rakela, “Imo na raming?” “Ka raming chu ‘Sipai ngai,’ ” ati na asik chu raluai atampa alut ei ni sika. 31Raluai ngaiin Isua kom, “Khura thuai hek luina” muna na man se no ro, ati na a zong u.

32Hava kol tanga han vok rual sak asaka, raluai ngaiin Isua kom vok ngai sunga na man lut ro ati na azong u, hatuka atho. 33Hava mi a sung ata asuaka vok sunga aluta, hava ankai ata vok dora tindila ava chula anning u.

34Ha vok arung ngaiin imo ei ni dora amu kiar u, hasik han atana khopui sunga, phaia ava ril tir u. 35Imo ei ni a en rang mipui ase na, hatuka, Isua ava mu u na ake kola ha raluai ei suakna mi puan ansila malung a dik anput ava mu u, hatuka achi u. 36Amu ngai doran mi kom hontinmo ei dam aril u. 37Hava itanga mi ngai doran Isua ha ankhai ro atina amathem u, asik chu achan ei achi u sika, hatuka Isua rakuanga a chuanga amak. 38Raluaiin ei mak han Isua rang, “Na bila hong ka ting,” ati na. Tenchu Isuan hintin hin ati na a man se. 39“Na ina se tan Pathianin na rang imo ei tho va ril ro.”

Zaira Sanu le Nupang khat Isua Puan aton rui

(Mt 9.18-26; Mk 5.21-43)

40Isua tindil va ral ava suaka mipuiin alei pham, asik chu ei lei maruang u sik. 41Mi angkhat Zaira ahonga: Sinagogue a ulian, Isua ke na anboka a ina se rang amathem, 42asik chu a sanu don selep kum somleianni mi ha athi ranga. Hatuka Isua anpheta tenchu mipuiin ahual sabaka. 43Hava bila nupang khat kum somleianni thin ei ahuat a oma, ei don dora daktora amang zei, tenchu tute andam thei om mak. 44Mipui bila Isua nuk tiang ahonga apuan mer aton, hatuka anlaiseka ankhar. 45Isuan a rakela, “Tumo anaton?” Mi doran ni makung ati na, tenchu Pitorin, “Puma, mipuiin ei na ep nimak mo,” ati.

46Tenchu Isuan, “Tulekmo ana ton a om, asik chu ranak ka kom ata asuak.” 47Ha nupang ha ana riat u zei ti ariata annoka Isua ke kola ahong anbok. Havan mipui dora matona, imo asik ei ton, hontinmo anlaiseka ei dam aril. 48Isuan a kom ati pe, “Ka nainupang, nei iamnan ana mandam zei. Phukdaia se ro,” ati pe.

49Hava ati lai tak palai khat Sinagogue a ulian a in ata ahonga. “Na nainupang athi zei,” atia Zaira aril; “Puma pol lai no ro,” ati na.

50Tenchu Isuan ariata, Zaira kom ei ti, “Achi no ro; iam mai ro, dam inti.”

51Hatuka in ava suak le tute abila alut ranga zot maka Pitor, Johon, Jakob hanuk a nu le a pa rong a man lut. 52Hava han mi dora achap annuk naite sika. Isuan ei ti, “Chap u no ro, naite ha athi nimak a in keng!”

53Mi doran amani asik chu athi ti ei riat u sika. 54Isuan akut asura a pai, “Anthui ro, ka nai atina!” 55A ratha honga kira anlaiseka anthui hatuka Isuan hongte mo man sa u ro, ati. 56A inko ngai aboi adong u na, tenchu Isuan imo ei ni tute manthei no ro ati pe.

Currently Selected:

LUKIN 8: RANGBSI

Highlight

Copy