MARKIN 16

Isua Anthuiret le Vana Kal

(Mt 28.1-8; Lk 24.1-12; Jn 20.1-10)

1Pongansa ni ase suale Mari Magdalini Jakob a nu Mari le Salomi marim hui a rachok u na ei vakhua u ranga. 2Hatuka hapta ni mansa nikhua hangai ha zing sabaka ani suak le than kola ase u. 3Hangai ha amani le amani a chong u na, “Than makot a lung tumo anakhai pe rang?” ati u. 4Hava lai tak a en u na ei mu u lung ha ankhai zei hava ha a chan alian. 5Hanke hangai ha than sunga ase u na ei mu u sim tiang chang puan angui ansila ruathar khat ansuta a om hava han hangai ha a malung a zing u na.

6Aman hangai rang ha ei ti, “Na malung man zing u no ro, Nazaret Isua nei a rok u Krosa a thipu ha ama hi anthui zei hivan om lai mak enta, hiva hin ei ansiak. 7Tenchu se u ro a zolai ngai le Pitor ha va ril u ro ama ha nangni matona Galilia ase zei ei na ril u anga han hava han va mu un na ti.” #Mt 26.32; Mk 14.28

8Hanke ei suak u na than ata ei rot u asik chu annok anchun u na a malung ei zing u hatuka amanin tute kom ite ril u mak ei achi u sika.

Isua Mari Magdalini Kom Anlang

(Mt 28.9-10; Jn 20.11-18)

9Hapta nikhua mansana Isua zinga anthui le mankhita Mari Magdalini anmu puia ha kachai sari ei rasua na ha. 10Ama asena Isua bila om chachak ngai le athi anngaia ningbuia a leia chap ngai kom ava manthei a. 11Tenchu Isua ahonga dam reta aman ei antongpui ti chong ha amanin iam thei u mak.

Zolai Anni kom Anlang

(Lk 24.13-35)

12Hava suale amani bila mi anni khua tianga apan ngai koma mel atei adona amani koma anlang reta. 13A se u na atei ngai doram hava ha amanthei u tenchu a he u iam pe thei u mak.

Azolai Somleikhat kom Anlang

(Mt 28.16-20; Lk 24.36-49; Jn 20.19-23; Kts 1.6-8)

14Hava suale ha somleikhat ngai bu aneka ansut u na a kom u na han ei anlang pe, hatuka amani ei iam u nok le a malung ei anchang sika chunngo chu a tho na, asik chu anthui suale ama amu ngai he ei iam u nok. 15Hatuka aman hangai ha ei ti pe, “Ramual pumpuia se u tan ansin ngai kom thangahui va ril u ro. #Kts 1.8 16A iama baptisma a chang tak chu sandam man inti ten a iam nok tak chu asia anlona om inti. 17A iam ngai chu ei andangna rang hiva ngai hin zin ti, ka raming le kachai not inti chong atha thar le chong unti. 18Marul sur unti hatuka thina tur abuangam hava han ite siat u no ni ana ngai chunga a kut dap unti na mandam unti.”

Isua Vanram Tenpei Anruai

(Lk 24.50-53; Kts 1.9-11)

19Amani le chong aril suana Puma Isua chung van tianga a kala Pathian chang tiang ansut. #Kts 1.9-11 20Hatuka ase u na muntina ava ril u hatuka Puman abibil u na sin a thona a nuk a zi andangna ngai lehan ei mandet u Amen.

Currently Selected:

MARKIN 16: RANGBSI

Highlight

Copy