MARKIN 15

Ram Ulian Makunga Isua Rui Anril

(Mt 27.1-2,11-14; Lk 23.1-5; Jn 18.28-38)

1Hatuka zinga atar ulian ngai Lekhanziak ngai chaizung ngai le rui an rila Isua ha a khita a ruai u na Pilata kom a pek u. 2Hanke Pilatin ama ha a rakela, “Nang hi Juda ngai reng mo na ni?” A masanga ati pe, “Nang ke ati.”

3Hanke chaizung ngaiin ama ha ei masiat sabak u. 4Pilatin a rakel reta, “Ite masang non mo enta, itukmo ei na masiat u.”

5Tenchu Isuan ite masang lai mak hava han Pilat a chang aman donga.

Isua Athi ranga Anbetok

(Mt 27.15-26; Lk 23.13-25; Jn 18.39—19.16)

6Panta tik pei aman mi ngai ranga angkhat lungina ankhum ei mazok ei zong u tak ha. 7Hava han Barabba tia mi khat asel ngai bila ankhum ei sel a mim ei that. 8Hava han mi ngai ha achunga akal u na amani ranga ei tho rang ha ava zong u. 9Pilatin a masanga hangai rang ati pe, “Nangni ranga Juda reng mazok ning mo na zot u mo,” ati. 10Asik chu chaizung ngaiin mumak sika ei hong pek u keng atia aman a riat.

11Tenchu chaizung ngaiin mipui ei man changa amani ranga Barabba zokna rang azong u. 12Hatuka Pilatin a masang reta hangai rang ei ti, “Hanle nangnin ril u ta Juda reng nei ti u ha imo kei lot rang,” ati na.

13Ankhek ret u na, “Ama ha Krosa pe ro,” atia.

14Pilatin, “Ichangmo? Aman imo ei masial,” ati. Tenchu ankhek sabak u na, “Ama ha Krosa pe ro,” ati u.

15Hanke Pilatin mi ngai ei zotna ranga ei vala amani rang Barabba ei mazoka Isua ha zema Krosa pek rang a betok.

Sipai Ngaiin Elsekara Tho U

(Mt 27.27-31; Jn 19.2-3)

16Hatuka sipai ngai ha reng in sunga tuala ama ha a tuang u na sipai ngai dora anpai u na munkhata anchun u. 17Hanke senduk puan aman sil u na raling lukhu a phana a lu na a mankhu u. 18“Chibai Juda ngai reng,” tina amok u na. 19Luangsar kuang le a lu a zem u na a machil u na mankhuk abila amok u. 20Elsekara atho sua u le senduk puan a khek u na ama puan den aman sil u. Hatuka Krosa apek ranga tual panga a tuang u.

Isua Krosa Antar

(Mt 27.32-44; Lk 23.26-43; Jn 19.17-27)

21Hatuka Simon ati na mi angkhat Kurini khua ata a honga ama ha Alekzandar le Rupha ngai a pa u ama ha Isua Kros anput ranga a sur u na a manput u. #Rom 16.13 22Hatuka amanin ama ha Golgotha muna atuang u hava mun raming omzia chu “Luru mun” ei ti na. 23Hatuka amanin ama ha mura marim tin chel Gerep ti a pek u na tenchu nek mak. 24Hatuka ama ha Krosa apek u na a puan ansem u tumo, imo ei lak rang ei mandang u na ranga thum a deng u. #Sam 22.18 25Isua Krosa ei tar u ha dar akua tang ani zei. 26Ama chunga masialna Lekha anziak a tar u: “JUDA NGAI RENG” atina anziak. 27Hatuka ama bila mi that anni Krosa apek u angkhat achang tiang angkhat avoi tiang. 28Hatuka ha lampuia mi anloi ngai han a lu a hir u na. #Isa 53.12

29Ama a ero u na ati u, “Nang ke Pathian Biakin a siama nin thuma a sin. #Sam 22.7; 109.25; Mk 14.58; Jn 2.19 30Atun ansan tan Kros ata chum ro.”

31Hantin han chaizung ngai Lekhanziak le ama ha elsekara na ei ti u, “Hiva mi hi mi tatei asan thei a, ansan thei mak. 32Krista Israel reng nei muna nei iam theina ranga Kros ata hong chum ro,” ati u. Hatuka a bila Krosa anthoi ngaiin um a ero u na adem u.

Isua Thina

(Mt 27.45-56; Lk 23.44-49; Jn 19.28-30)

33Ani sunchim ata azing khap dar anthum tenpei 34Dar anthum ten honga ni le Isua ankheka ei ti: “Eloi Eloi Lama Sabakthani?” na malet ten a omzia chu, “Ka Pathian, ka Pathian ichangmo nei namak?” #Sam 22.1

35Hava han a depa anding ngai bila hohonmo ariata ei ti, “Eliza a pai zei, rangai u ta,” ati u. 36Hatuka mi angkhat atana uain athur sponz le anbuang rang a peka, “En di rei, Elizan a masum mo, masum mak mo,” ati. #Sam 69.21

37Hatuka ankhek sabaka anuk a chata a thi.

38Pathian Biakina puanzar a chung ata athuai tenpei antheta anni a chang. #Ant 26.31-33 39Hatuka raza ruaipu ha a kola anding han a muna hantin han Isua a rang ei chat hava han ei ti, tak taka Pathian Sapa keng.

40Nupang sen khatin um alapa ata alei en u hangai ha Mari Magdalini naipang Jakob le Jose anu Mari hatuka Salomi ani u. #Lk 8.2-3 41Galilia a om lai han hiva ngai hin ama anu nuk a zi u na ama dorbo ei dom u nupang atei um a tampa hava han a om ama bila Jerusalema a hong ngai ha.

Isua Anphum

(Mt 27.57-61; Lk 23.50-56; Jn 19.38-42)

42Hatuka zan azing le hava nikhua ha ansinna ni pongansa nikhua mana ni atia. 43Arimathai Joseph atia mi khat Ruiril ulian a honga ama aningam Pathian ram ei ot, aman angam sabaka Pilat akom asena Isua ruak ava zong. 44Ten Isua anrapa hantin han ei thi ha Pilat a chang ei man dong. 45Hatuka raza ruaipu kom arila Joseph ha a ruak apek. 46Josephin zani khat a rachoka ava masuma ha zani le atuama lung ankhuar than khata ava phuma hatuka than makota lung khat aman del. 47Ama ei siak u na mun ha Mari Magdalini le Josi anu Marin amu u.

Currently Selected:

MARKIN 15: RANGBSI

Highlight

Copy