MARKIN 14

Isua Duingai

(Mt 26.1-5; Lk 22.1-2; Jn 11.45-53)

1Ninni suale Zokna Panta le Chol anchel lui Vaipol Panta havatik han chaizung ngai le Lekhanziakpu ngaiin hontinmo ama hi ziana a sura na that ngai atia ei val u. #Ant 12.1-27 2“Tenchu panta lai tak ni no rase mi lam anpon ngai,” ati u.

Bethani na Isua Sariak Anthi

(Mt 26.6-13; Jn 12.1-8)

3Isuan Bethani khuana aphar Simon a ina bu nek rang ansut le nupang khat alabastar bela spiknard sariak marim a hui a lu sabak a hong koia hava bel ha akhuia a luna sariak alei. #Lk 7.37-38 4Hava han hohon mo a om ngai bila han a takasina ati u, “Ichangmo sariak ei manpam so?” ati u. 5Sova sariak azuar anten siki razan thum neka man inti a anriang ngai pe thei inti, hanke nupang chung han takasi ei manlang u.

6Tenchu ei ti, “Ama ha om rase, Isuan Ichangmo nei pol u? ka chunga sin asa ei thon zei. 7Asik chu anriang ngai na bil u na a om babang u rang keng na zot u tik na san thei u tenchu koi hi na man babang u no ta ni ei ti. #Dan 15.11 8Aman ei thothei tak ha ei tho ani zei ei honga ei na ravuina sariak marim hui ei na hong lei. 9Hatuka kei na ti ni u zei ramual muntina thangahui ei anrilna tak peia ama riattitna anga hi sin rui hi an ril inti.”

Judan Isua Ansur rang Azot

(Mt 26.14-16; Lk 22.3-6)

10Hatuka Juda Iskariot ha somleianni ngai bila angkhat chaizung ngai kom ase a kut u na Isua ei pek theina ranga. 11Alei riat u na a rai a san u a sum a pek rang ati u hanke ei sur theina ranga tak asat u.

Zokna Panta Isuan Anek

(Mt 26.17-25; Lk 22.7-14,21-23; Jn 13.21-30)

12Chol anchel lui Vaipol Panta anphutni Zokna Panta Berate ei anthat hava nikhua han a zolai ngaiin ama rang ha ei ti u, “Hovanmo nang narang Zokna Panta bu nekna va sin mani hovan nei zot,” ati u na.

13Hava han ama a zolai ngai bila anni a man se na. “Khua na mi khat na maton u na ti kola ti hong koia ahong ama nu nuka se u ro. 14Hatuka ei lutna taka in puma pa ha, Puman ei ti koi ka zolai ngai le Zokna Panta khalai kei zarna ranga khualin hovanmo ti u ro. 15Hava han aman in chunga athar alian anliang vang na manmu unti hava han koini rang va man suk u ro.” ati na.

16Hatuka zolai ngai anphet u na khua a pan u ei ti ang tak han ava mu u hanke Zokna Panta rang khalai ei man suk u.

17Hatuka ani bui le ha somleianni ngai le ava suak u. 18Ansut u na a nek u hava lai tak Isuan ei ti, “Ataka kei na ti ani u zei angkhatin na mansur un na ti ama hi ka bila bu nek.” #Sam 41.9 19Hava han a malung a na u hanke angkha khatin a rakel u na, “Koi mo ka ni?” ati na.

20Aman hangai rang ha ati pe, “Hiva somleianni a angkhat sak bela a kut a phum hi ama. 21Asik chu Miring Sapa ruia anziak anga ei nin zei tenchu a rang aping hava mi Miring Sapa ei ansurna hava mi anzir no sela ama ranga asa ual.”

Puma Zandui

(Mt 26.26-30; Lk 22.14-20; 1 Kor 11.23-25)

22A sak u lai tak vaipol alaka bor pek chunga a khiaka hangai ha a peka, “La u ro hiva hi ka taksa,” ati.

23Hatuka buangna kheng alaka raisan chong aril chunga hangai ha a pek hatuka lokona abuang u. 24Hatuka aman hangai rang ha ati pe, “Hiva hi ka thisen rui athara thisen mi tampa ranga a suak. #Ant 24.8; Jer 31.31-34 25Taktaka kei na ti ni u zei Pathian Rama athara ka buang ret maseng chu Gerep mara ti buang lai no ning.”

26Hatuka la atho u na apanga a suaka Oliv tanga ase u.

Pitorin Isua Eiheng Rui

(Mt 26.31-35; Lk 22.31-34; Jn 13.36-38)

27Hanke Isuan hangai ha ati pe, “Na lom u na na malung na unti asik chu anziak a om, ‘Berarungpu suk ka tia hava han bera ngai anthek rak inti.’ #Zek 13.7 28Tenchu anthui suale na maton u na Galilia se ka ti,” ati. #Mt 28.16

29Pitorin ati pe, “Alom u na a malung a duk u nam koi chu duk no ni.”

30Isuan ati pe, “Ataka kei na ti ni zei hiva zan ar voi anni akhuang man voi anthum riatlui nan pemin na ti.”

31Tenchu aman arang sabaka ei ti, “Na bila athi rang aniam riatlui nan pem no ning,” Hanke atei ngaiin um ati u.

Getsimani na Isua Borzong

(Mt 26.36-46; Lk 22.39-46)

32Hatuka Getsimani tia munkhat hava han a hong u. Hatuka a zolai ngai kom ei ti, “Bor ka zong kar pei hiva hin ansuta om u ro.” 33Hatuka aman Pitor, Jakob le Johon a bila a tuanga a ratha ta na a malung a zing u. 34Aman hangai ha ei ti, “Ka nuk athi ang dor pei ana zei, hin lei om u ro hatuka lei meng u ro.”

35Hatuka maton beta ase na phila anboka hintin hin bor a zonga athei ten ha hun a kom ata ankhai rase. 36Aman ei ti, “Abba, ka pa na tho kiar thei ka kom ata hiva buangna kheng na khai pe ro ba tenchu kei zot anga ni no rase nei zot anga ni rase.”

37Hava sua ei hong mu a leia in u na hatuka Pitor ha ei ti pe, “Simon nei lei in mo ni zei dar khat dak ngal lei meng thei mak che mo. 38Menga borzong u ro ansinnana chul u ta ni ratha a zota tenchu taksa aduai.”

39Hatuka ase reta ha chong ang den ha a tia bor a zong. 40Ahong ret le ei hong mu a leia in ret u, asik chu a mit akhu u hanke hontinmo ei masang u rang ham re u lai mak.

41Hatuka voi anthumna ei honga hangai rang ei hong ti, “Atun chu in u ta ro pongansa u ta ro a hun zei a hun a suak zei enro, Miring Sapa asiat ngai kuta anpek zei. 42Anthui u ro se u rei enro, so anan sur ranga mi ha ana hong pan zei.”

Isua Ansur

(Mt 26.47-56; Lk 22.47-53; Jn 18.3-12)

43Hatuka chong aril lai tak Juda ha somleianni ngai bila mi angkhat a honga ama bila mi tampa khendai raimol anleka chaizung ngai Lekhanziak ngai atar ngai a kom ata a hong u. 44Ama ansur pun aphaman ata hangai rang ha, “Abiang kei tum tak ha a sadima sura tuang u ro,” ei ti.

45Hanke a honga akom, “Rabbi,” atina a pham sabaka a biang ei tum. 46Hanke amanin kut ei thak u na ei sur u. 47Tenchu akola anding ngai bila mi khatin a khendai a laka Chaizung a suak ha ei thaka a kuar khat ei at pe. 48Hanke Isuan hangai rang ha, “Mi suam ngai a sur rang anga mo khendai, raimol anleka ana sur rang nei hong u. 49Anikhuana Pathian Biakina nangni bila kei oma kei na manchu u hava han na sur u mak chena ten Pathian Lekha chong anga ei chuk anang.” #Lk 19.47; 21.37

50Hava han a zolai ngai alom u na ama amak raka a rot u.

51Hatuka ruathar khat saikoronga zani arasil duapa anu nuka ase. 52Hangaiin ruathar ha a sur u na tenchu ha zani a maka saikoronga den a rot viak.

Ruirilna Matona Isua Antuang

(Mt 26.57-68; Lk 22.54-55,63-71; Jn 18.13-14,19-24)

53Hatuka Isua ha Chaizung Lian kom a ruai u na ama bila chaizung ngai, ulian ngai, Lekhanziak ngai alom u na anchun u. 54Hatuka Pitor ha ankarpa na anu nuk azina Chaizung ulian a tual tena ase a veng ngai le moi anua u. 55Hanke chaizung ngai le ruiaril ngaiin Isua ha a thatna ranga ama sika riatpui rang a rok u na man u mak. 56Asik chu ei siatna rang milaka ariat a chang ngai ha anrual u mak.

57Hatuka itukinmo chu andinga ama siatna aril u. 58“Koinin hiva nai hi hintin hin ei ti na riat, ‘Hiva kuta ansin Biakin hi siama pei ka ti, hatuka nin thuma kut len sin lui hanuk angkhat Biakin sin ka ti ati.’ ” #Jn 2.19 59Hava hanum ei ril u anrual u mak.

60Hanke Chaizung ulian amalai taka andinga Isua ha a rakela, “Ite masang non mo na sika imo ei ril u hi?” 61Tenchu a daireka ite masang mak. Chaizung ulianin arakel reta, “Nang hi ha Krista, Achanasa Sapa mo na ni,” ati.

62Isuan, “Koi hi ama, nangnin Miring Sapa hi Athokiarthei achang tiang ansuta ei om van summoirot le ei hong mu un na ti,” ati. #Dan 7.13

63Hanke Chaizung Lian apuna apuan aseta ei ti, “Atei imo a riat ei nang! 64Pathian ei dem na riat u hi le imo na mandon u?” atia.

Alom u na ama ei ma siat u, “Ama hi athi rua ani,” ati u. #Lev 24.16

65Hava han hohon mo chu a machil u hatuka amai a mahip u na a suk u na, “De setan na ril ro ba,” ati u na azem tang sua u le anlo ngaiin a laka a zem sabak u.

Pitorin Isua Aheng

(Mt 26.69-75; Lk 22.56-62; Jn 18.15-18,25-27)

66Pitor tual kholai a a om lai tak Chaizung ulian a suak nu khat a honga. 67Aman Pitor ha moi anua amu na a tiang a ena ei ti pe, “Nang, him Nazaret Isua bila na om” ati.

68Tenchu riatlui anpema, “Nei na ti ha remakung, atho chang um remakung,” ati na. Hatuka tual panga ei va suak le ar akhuang zei.

69Suak nu han amu na hava na anding ngai kom han, “Hiva mi hi hangai bila angkhat,” ati. 70Aman zot ret lai mak, hanuk beta a kolan ding ngai han Pitor ha ei ti u, “Atataka nang, him so ngai bila khat na ni, asik chu nang hi Galili mi.”

71Tenchu khomak ansama ei ti, “Sova mi rui nei na ril u ama so remakung.”

72Hava lai tak han ar voi anni khuangna na akhuang. Hava hanke Isuan ha chong ei ril ha, “Ar voi anni a khuang man voi anthum riatlui nan pemin na ti hava ha Pitor a malunga a chuia,” a mandona a chap chian.

Currently Selected:

MARKIN 14: RANGBSI

Highlight

Copy