MARKIN 13
13
Isuan Biakin Siat rang Aril
(Mt 24.1-2; Lk 21.5-6)
1Hava suale Pathian Biakin ata apang asuak u han a zolai ngai bila angkhatin a rakela, “Minchupu enta, lung le anphum ngai hi hontina ngal mo hi,” atia. 2Isuan ama ha ati pe, “Nangin hiva lungphum alianpa ngai nei mu u hi, lungkhat chunga lung om no ni aloma philvut zuang inti.”
Antak le Ansinsakna
(Mt 24.3-14; Lk 21.7-19)
3Hava suale ama ha Oliv muala Pathian Biakin matona ansut le Pitor, Jakob, Johon le Andrian maruka, 4ama ha a rakel u, “Na ril ta hava ngai ha itikmo ei ni rang hatuka hava ngai dora ei ni narang ei hong ni na rang imo riatna,” ati na.
5Isuan hangai rang ha aril pe na, “En u ro, tuten min na huang u ni. 6Mi tamin ka raming a zuara hong inti koi hi ama hong tin ti mi tampa huang inti. 7Tenchu nangnin anduina rui le anduina thang na riat u le hatikhan lungzinga om u no ro, hiva ngai hi ei chuk nget rang. 8Tenchu hatikam la hek no ni asik chu nam le nam, ram le ram anthoka andui inti, amun muna ninu hong inti, maitam ni inti, hava ngai ha ei phutna rang duai.
9“Nangnin naninga anrung u ro min ruirilna muna na pe unti hatuka anchunna ina han na zem unti, hanuk ka sika ram ulian le reng ngai kom anriat ranga amani matona anding un na ti. #Mt 10.17-20; Lk 12.11-12 10Hanuk mana han namtin kara thangahui asem anang. 11Tenchu min nangni hi ava pek ranga a na tuang u tik le hatik han imo nei ril u rang hava rang andon u no ro, hanek ten chong ei na man riat u tak pei ril u ro asik chu nangni nimak aril ten Ratha Anthiangin ril inti. 12Hatikhan a parual ha a parual, a pan a nai ha thinana pe inti. Hatuka nai ngaiin a nu nu, a pa pa u ngai a let tiang andinga man that inti. 13Hatuka ka raming sika min na matir unti tenchu a hek tenpei angirtit tak chu zokna man inti. #Mt 10.22
Hun Anchirua
(Mt 24.15-28; Lk 21.20-24)
14“Hava panga, ‘Ansiatpu annim neinun,’ andingna noka andinga om, an pore takin re rase hatik han Judai rama om ngai tang ram lama rot rase.” #Dan 9.27; 11.31; 12.11 15Hatuka inchunga om tak chu ina neinun alak ranga athuai a chum no rase hava asunga va lut no rase. #Lk 17.31 16Hatuka phaia om tak chu a puan a lak ranga a nuk kira se no rase. 17Ha nikhua anrai le nai apom ngai ranga antak ha. 18Hatuka borzong u ro hava ha nudin ei ni nokna ranga. 19Asik chu hatik han hava ang antak hong intia hava anga antak Pathian kut sin aphut lena atun ten la om ngai mak om um lai no ni. #Dan 12.1; Anl 7.14 20Hatuka Puman hava nikhua ngai aman bong nok anten nukanei rengin diar no ni. Tenchu Puman ei phun ngai hangai ranga nikhua a mantom.
21“Hatik han min, ‘Enro, soso Krista’ ana ti u nam hava han iam u no ro. 22Asik chu Krista rathol le deari rathol la hong inti a hatuka changdong amu rua laman lang inti, a thei ten anthang ngai um la huang inti. 23Tenchu anreng u ro enta a phaman kei na manthei kiar u keng.
Miring Sapa Eihongna
(Mt 24.29-31; Lk 21.25-28)
24“Hatuka hatik han antak suale ani zing inti, tha ra-ang nei no ni. #Isa 13.10; Ez 32.7; Joel 2.10,31; 3.15; Anl 6.12 25Anvan ata arasi ngai chul inti anvana sinthotheina ngai annik inti. #Isa 34.4; Joel 2.10; Anl 6.13 26Hatuka hava han Miring Sapa ha sinthotheina le anlian sabaka ansum bila a hong mu unti. #Dan 7.13; Anl 1.7 27Hatik han aman vanpalai ngai tira phil rikung ata anvan rikung tenpei kil manli ata a mi anphun ngai rasuanga munkhata re inti.
Theichang Kung ata Anchuna
(Mt 24.32-35; Lk 21.29-33)
28“Hanuk theichang kung ata anchu u ro abak annuia, anchera, abua athar a suakle hatik han nei riat u nilum anai zei ati na. 29Hantin han hava ngai na mu u le re un na ti ama a nai zei makot kola a hong suak zei. 30Ataka kei na ti ni u zei hiva ngai achuk zit nok maseng chu atun taka khuk ngai anpei no ni. 31Anvan le phil anpei inti ten ka chong anpei pial no ni.
Ahun Tuten Remak
(Mt 24.36-44)
32“Tenchu hava nikhua le a hun ruia tuten remak vanpalai ngaiin um remak Naipasalin um remak Pa rongin a riat. #Mt 24.36 33Anrenga meng u ro, borzong u ro asik chu hava hun itikmo ei ni rang re u mak che. 34Mikhat a in amaka mi rama ava oma a suak ngai ha nina a peka asin u rang a sema hatuka makot angak ha ameng chian ranga chong a pek. #Lk 12.36-38 35Hantin han meng u ro asik chu in pumapa itikmo ei hong rang khuluia mo, zan chima mo, ar akhuang le mo, ole zinga mo hava ha re u mak che. 36Ama anlaiseka a honga nei in u ei na mu u nokna rang. 37Hatuka kei na ril u tak hi na lom u na kei na ril u menga om u ro!”
Currently Selected:
MARKIN 13: RANGBSI
Highlight
Share
Copy
Want to have your highlights saved across all your devices? Sign up or sign in
Ranglong NT with PSA - Dankit Athar Le SAM
Copyright © 2017 by The Bible Society of India
Used by permission. All rights reserved worldwide.
