MARKIN 6

Nazareta Isua Anheng

(Mt 13.53-58; Lk 4.16-30)

1Hatuka havan ata a suaka ei omna kholama ava tunga a zolai ngaiin chu azi tir u na. 2Hatuka pongansa nikhua ei lei ni anchunna ina, a manchuna.Hatuka mi tampa a chong ariat ngaiin, “Hiva mi hin hiva chong hi hovan ata ei riat mo hi? Hiva nai a koma hianna apek hi i hianna ngal mo hi? A kutin hidor peia changdong sin ei tho hi hontina mo? ati u. 3Hiva mi hi Mari naipasal Jakob le Joseph Juda le Simon asung suak pui thing a sinpu ha nimak mo a sarnu ngai hi koini bila om nimak mo?” ati u na achang aman dong u na amalung ni u lai mak.

4Hatuka Isuan akom u na, “Dearin a kho tianga mi a unai bila ani nokan ten maimok ansak ngai mak” ati. #Jn 4.44

5Hatuka mi tomte dam lui chunga kut dapa ei mandam baka chu changdong sin tho thei lai mak. 6Ei iam u nok sika achan achang a mandonga hatuka khotina acheia a manchu tira.

Isuan Zolaingai Atir

(Mt 10.5-15; Lk 9.1-6)

7Hatuka somleianni ngai ha a kuia anni nia atira aman sena kachai ratha annim ngai chunga ningneinam apek. 8Hatuka akhual se u na ranga, “Raimol kha khat baka chu vaipol um, marsam, kongvong, sum um ei choi u nok rang ati pe na. #Lk 10.4-11 9Kekok chu nei bun u rang ati kultai anni atiang u no ro,” ati sa na. 10Hatuka ama denin akom u na, “Nei va tung u na han na mak u maseng pei chu tung tit u ro. 11Hatuka khuan a na pham noka, na he arangai zot u nok aniten, havan ata na suak u tik han amani nei manriat u na ranga na kepha u thuaia philvut athing u ro,” ati. #Kts 13.51

12Hantin han asuak u na malung ankhir chong aril u na. 13Kachai ratha sia atampa a not u na ana tampam sariak akhua u na a mandam u. #Jak 5.14

Baptispu Johon Thina

(Mt 14.1-12; Lk 9.7-9)

14Hatuka reng Heroda han alei riata a raming ha alei anthang sua ei ni, “Baptispu Johon ha mithi bil ata anthui reta hasika so sinthotheina son ama kom ei tho keng,” alei ti. #Mt 16.14; Mk 8.28; Lk 9.19

15Mi teiin, “Eliza keng,” ati u. Mi teiin, “Deari ani so, deari ngai bila angkhat ang ha,” ati u na.

16Herodan chu alei riata, “Johon alu kei tan nget ha anthui sir keng,” ati. 17Herod nget han a parual Philip a nungak han Herodi asika mi atira Johon ha ei man sura lungin ata ankhit chunga alei khuma, asik chu ama ha nungaka ei lak. #Lk 3.19-20 18Johon han Herod a kom, “Na parual nungak nei lak pe hi anthiang mak,” ham alei ti pe.

19Hasik han Herodin ama chu a ngona, athat azota tenchu thei mak. 20Herodin Johon chu mi dik le anthiang tak ei ni ti ei riat sika ama ha achia ahual tita a chong a rangai. Ten achina, tenchu raisana a rangaia.

21Hatuka Herod ei anzirna nikhua phamni na han a mi lian ngai le sipai ruaipu lian ngai le Galili rama mi lian ngai ranga zana bukhalai azar lai hun asa alei mana. 22Herodi nainupang nget ha a honga luta alama Herod le abu nekpui ngai ha arai amansan u na, hantin han reng han, nupang sanai te kom han, “Nei zot tak na zong ro na pe ka ti ati. 23“Nei na zong tak pei chu ka ram anbak ten pei chu na pe ka ti, hatuka a kom khomak um ansama.”

24Hatuka ama chu a suaka a nu kom han, “Imo kei zong rang ava ti na hatuka ama han Baptispu Johon alu hana,” alei tina. 25Hatuka chu annot sabaka reng kom han ava luta, “Khenga Baptispu Johon alu neina pek len kei zot,” ti na a zonga.

26Hatuka reng ha a malung anhang sabaka tenchu a khomak ansam le abu nekpui ngai sika han nial thei lai mak. 27Hatuka reng han a vengpu sipai angkhat a tir lena alu ava lak rang chong a peka hatuka aman lungina han ava luta ava tan. 28A lu ha kheng le ava laka nupang sanai kom han a peka. Hatuka nupang sanai han a nu kom apek. 29Hatuka a zolai ngaiin ariat le aruak ha ava lak u na thana asiak u.

Isuan Asang ranga Mannek

(Mt 14.13-21; Lk 9.10-17; Jn 6.1-14)

30Hatuka zolai ngai ha Isua kom avan khom u ei tho u ngai le ei manchu u ngai aril pe u. 31Hatuka aman akom u na, “Nangni lim philchar muna abinga hong u tan la pong ansa bak u ro,” ati. 32Hantin han philchar muna rakuang le abinga ase u na.

33Hatuka min ei se ha amuna mi tampan amani ha ariata khotin ata hava han ke le atan u na alei va khel u. 34Hantin han ama chu ti rakham ava suaka mi achan atam ava mu na a veng rang abui bera rual ang ei ni u sika lungkham amu sabaka chong atampa a manchuna. #Mip 27.17; 1 Rng 22.17; 2 Kr 18.16; Ez 34.5; Mt 9.36 35Hatuka nikhua abui rang ani sabak zeia a zolai ngai a kom a hong u na, “Hiva hin philchar mun ei ni nikhuam abui rang ani zei. 36Hiva ngai hi na kola luia le khuana se na ei sak u rang hongmo lua chu ei rachok thei u na ranga manse ro ba,” ati u na.

37Aman chu akom u na, “Nangnin asak rua pe u ro,” tina a masanga.Hatuka amanin akom han, “Vaipol aduli raza anni man rachona va pe mani mo,” ati u na. 38Hatuka aman a kom u na, “Vaipol pek hozetmo nei don u en u ta,” ati. Hatuka ei don u ariat le, “Pek ranga, le nga anni,” ati u.

39Hatuka aman alom u na sul aring chunga han abuk abuka mansut u ro atina chong a peka. 40Hatuka atanga raza khata somranga na ansut u. 41Hatuka aman vaipol ranga le nga anni ha alaka van lam a ena bor a peka vaipol ha akhiaka mi matona ei sak u ranga a zolai ngai kom apek ha nga anni ham a peka asem u. 42Alom u han asak u na akhop u. 43Hatuka vaipol le nga adi anoi kok somleianni ala bita. 44Vaipol asak ngai ha pasal ulian riam pek ngal a sang ranga ani u.

Isua Tina Kalachoi

(Mt 14.22-33; Jn 6.15-21)

45Hatuka ama nget han mipui chu aman china ava ral tiang Bethsaida tiang ama matona ase mansa u ranga a zolai ngai ha rakuanga chuang len. 46Hatuka ama chu a manchin suale borazong ranga muala han ase na. 47Ani bui le rakuang ha tindil lai taka han alaia oma ama chu athei daka muala han a om. 48Hatuka rakuang ha ei antak sabak ei vei u asik chu phaivuan ei semna tiang ei om ei ni u, zan chim, rilanlak akhel tiang siaia tidunga kal achoia amani tiang ahong pana akhel rang a val. 49Ningal sela amani han ama ha ti chunga akala ei hong amu u na han, “Raluai” imo ati u na ankhek u. 50Alom u han ama amu u na aratha amanta u hanum nisela ama han amani abiak lena a kom u na, “Phukdaia om u ro koi ke ka ni do, achi u no ro,” ati. 51Hatuka rakuanga han akom u na ava chunga phaivua ha abanga achang a mandong sabak u. 52Vaipol rui ha atho chang re u maka a malung ei anchang u sika.

Isuan Genesareta Ana Mandam

(Mt 14.34-36)

53Hatuka varal avan kan u le Genesaret ram tiang ava tung u na ti rakhama han rakuang athung u. 54Hatuka rakuang ata asuak sua u lehan min Ama ha alei riat len u na. 55Hava ram kol dora han atan susup u a om ti na ei riat u na tak peia ana, dam lui azamun len le ahong razon u na. 56Hatuka khua sina, khualiana, luia ei omna tak peia ana ngai bazaram a mansuta ama ha ei mathem u a puan mer lua chu anton ranga aton dora chu ei dam len.

Currently Selected:

MARKIN 6: RANGBSI

Highlight

Copy