MARKIN 7
7
Chipuingai Manchu
(Mt 15.1-9)
1Hatuka Pharisi ngai le Lekhanziakpu ngai bila senkhat Jerusalem khua ata ahong ngai han a koma ahong anchun u na. 2Hava ngai han a zolai senkhatin kut akhela vaipol ei sak u alei mu u na.
3Pharisi ngai le Juda ngai dora han ulian ngai chong vong ha ei lei pom u sika akut u asadima arasuk u nok anten sa u ngai mak. 4Hatuka bazar ata ahong u le anbual u nok ten ite sa u ngai mak hatuka rui atatei atampa apom ruam adon u bel kheng thir ansuk ruia.
5Hantin han Pharisi ngai le Lekhanziakpu ngai han, “Ichangamo na zolai ngai ulian chong vong anga omlui a kut akhela sak nek ei tho u,” ti na arakel u na.
6Hatuka aman hangai kom han, “Isai han nangni phuazekam ngai, dearin nangni ruia ei lei ril hi adik keng, ‘Hiva ngai hin amur riama ana manpak u na, tenchu a malung u chu ka kom ata ala sabak u na. #Isa 29.13 (LXX)
7Ei zozot ni rase ei manchu u na ha miring
chongpek ei manchu u sika ei na biak u
chachak hi akorong keng,’
tia anziak anga.
8“Pathian chongpek chu anmaka miring chong sin anmang, ha ei surtit u ke hile,” ati.
9Hatuka ama denin a kom u na, “Nangni chong ansin ha nei surtit u theina ranga Pathian chongpek nei zot u nok hi adika nei riattit u. 10Mosin, ‘Na nu le na pa lalchi tho ro,’ hanuk ‘Min a nu mo a pa mo asiat aril tak chu thi rase,’ alei ti na. #Ant 20.12; 21.17; Lev 20.9; Dan 5.16 11Nangnin chu hintin hin nei ti u chachak min a nun mo a pan mo ei mangna rang ani ten ‘Korban’ ani zei ati len.Hava tina chu ‘Pathian kom anpek’ tina. 12A nu rang a pa rang atho anphal u lai mak chena. 13Nei rung sika Pathian chong rat luia nei lei siak u hantin han atampa nei lei tho u.”
Anan Nim Thei
(Mt 15.10-20)
14Hatuka mi ngai ha akui reta akom u na, “Na lom u na ka chong hi rangai kiar u tan tuak u ro. 15Mi apang ata asungkua luta ama annim thei tute om mak. 16Mi asung kua ata asuakin ke ei man nim.”
17Hatuka mipui kom ata ina ahonga lut le a zolai ngaiin ankhina chong ha arakel u na. 18Hatuka aman akom u na, “Nangnim hatuk pei riatna nei luia nei la om u mo? Angkhatpei hi apang ata miring von sunga alut reng chu a malunga alut nimak, nom ase le avon ata ei suak 19hasika ama chu man nim thei mak ati hi re u mak che mo? Saktin hi anthiang,” ati.
20Hatuka ama denin, “Miring ata asuak han mi mannim chachak. 21Asung ata han miring malunga han mandonna ngai ha asia ahonga suak mithat uiare na. 22Ningolna, asia thona, anhuangna, hurna, khamaret, siat anrilna, borai thona, amona hiva ngai hi. 23Hiva asia dora hi asung ata ahonga suaka miring ei mannim chachak,” ati.
Nupang Khat Iamna
(Mt 15.21-28)
24Hatuka anthuia havan ata Tura le Sidon biala ase zeia. Hatuka in aluta tuten ei riat rang zot maka tenchu anthup thei mak. 25Hantin han nupang khat a nainupang sanai kachai ratha annim a vong han athang alei riata a ke kunga avan bok lena. 26Nupang ha Grik mi ei anpiangna chu Surophoiniki mi ei ni aman ama ha a nainupang a sungkua ata kachai ei notna ranga a mathema alop. 27Hatuka aman a kom han, “Nai ngai khop bak rase nai ranga vaipol anpota ui koma apei anhui mak,” ati.
28Aman a koma han, “Puma ani chu ei ni ten ni ngal sela dokang thuaia ui ngaiin um anai ngai avaipol sak u na aher achul asak do,” atina a masanga.
29Hatuka aman a koma, “Na chong ril sika se ta ro kachai na nainupang a sungkua ata asuak zei,” ati pe. 30Hatuka a ina han ase na a nai chu kachaiin amaka zamuna ei zal ava mu zei.
Akuaraset Chongkului Mandam
31Hatuka Tura ram ata asuak reta Sidon khua apala Dekapoli ram arakana Galili tindila ava tung. 32Hatuka mi angkhat kuaraset a chong um ape akom ahong ruai u na a chunga a kut adap ranga a mathem u na. 33Hatuka aman mipui bila ama rong ha abinga aruaia akut maria le a kuarkua akhika hatuka amachila a malei amet pe. 34Hatuka anvan tiang atanga phukpui alaka akom han, “Epphatha” atia hava ha, “Anlong ro” tina ani.
35Hantin han akuar ha avar amalei anlom um anzar zeia anthiang vanga achong thei zei. 36Hatuka aman akom u han, tute kom ril u ta ni tina akhar tit hanum ni rase ei khar zotor pei tang ahai riam u chachak. 37“Ama han asadima alompeia ei tho kiar aset ngai a manvar pena chong thei lui ngai um aman chong,” ati u na achang a mandong sabak u.
Currently Selected:
MARKIN 7: RANGBSI
Highlight
Share
Copy
Want to have your highlights saved across all your devices? Sign up or sign in
Ranglong NT with PSA - Dankit Athar Le SAM
Copyright © 2017 by The Bible Society of India
Used by permission. All rights reserved worldwide.
