ROM 1
1
1Paul Isua Krista suak ei tir ranga ankui, Pathian thang ahui ranga abinga ansiak.
2Ha thang ahui Pathian lekhabu anthianga a deari ngai le mana achongtin ani na. 3Ha a Naipasal ruia ama hi taksana David akhuka mi ke. 4Ha anthiangna ratha ruia athi ngai anthuiretna le thotheinana han Pathian Sapa atia andang. 5Ama ha Isua Krista koini na Puma, hava lehan koinin ama raming han nam dora bila iamnana hetel ranga lungkhama kuitir nina nei man. 6Nangnim Isua Kristan ei na kui ngai bila nei anchel u.
7Roma Pathianin ei madita ei kui anthiang a om dora hava ngai ranga koini na Pa Pathian le Puma Isua Krista ata lungkham le phukdai na kom u na om rase.
Borzonga Raisanna Ril
8Mansana koiin Isua Krista na, na lom u na rang ka Pathian kom raisan chong ka rila asik chu nei iam u ramual dorana anthang zei 9Asik chu ha Pathian kei biak ha koi ka ninga ratha le a Naipasal athang ahui kei ril aman ana riat, na raming u kei china kei tho chian. 10Ka borzong kip le pei kei zong chachak hidor nikhua suale hontinmo Pathian ei zot zama na kom u na se rang ruia ei chuk rang. 11Asik chu ana mu u rang kei zotna chu nangni ha hong ang ratha bor lek mo apeka nei dettit u na rang. 12Hanuk hontinmo nangni le koi na loma ranga sung ril iamna le nangni na kom ka ninga hava bibila kei sabeina ranga.
13Hatuka parual ngai hiva rui nei riat u nok rang kei zot ni mak, na kom u na ahong rang ka malung kei sin babang.Hatuka hi ten hi kei la thei nok. Jentail atei ngai bila hontinmo mara nei man hantin ang han nangni bilam mara an man mo. #Kts 19.21 14Grik le ozea mi ngai mi hian le mi mo ngai dora akom u na kan tang. 15Hava anga han kei tho thei zotor, koiin Roma om ngai nangni komam thang ahui aril rang kei pham.
Thangahui Ranak
16Asik chu thang ahui ruia anzak makung; asik chu hava ha a iam tin rang zokna ranga Pathian ranak, mansana Juda ranga hanuk Grik rangam. #Mk 8.38 17Asik chu Pathian pek adikna khat thang ahuia ei hong anlang, iama le a iam rua, ei anziak anga, “Tenchu mi dik ha iamna sika dam inti.” #Hab 2.4
Miring Masial
18Asik chu Pathian taksitna van ata mi dora Pathian anmokna bui le dik lui chunga ei anlang, dik lui atak adui ngai ha. 19Asik chu Pathian ruia ariat thei rua ha amani bila ei hong anlang ani zei asik chu Pathianin hava ha akom u na ei manlang. 20A mu salui asin thotheina le a Pathianna chu ramual asin lai ata anthiang vanga anlanga asin thona han hasik han anon rua ngal nei u mak. 21Asik chu Pathian ha ariat u nam Pathian atina manpak u mak raisan chong um ril u mak. Tenchu abok makhal u na akoronga ei sabei u a malung ei mo u na azing pe u. #Eph 4.17-18 22Ahian ei anlo u na amo ei chang u. 23Hatuka siat thei miring mel aphua le va le sakemanli le nuk anei khaisuk khaiphar ramil le siat thei lui Pathian anpakna ei thul u. #Dan 4.16-18
24Hasik han Pathianin hangai ha a malung u na ningolna tina annima ei betok a taksa um ei poisak u nok. 25Asik chu milak le Pathian tak ei thul u hatuka ansin neinun ei biaka eia mok u, ha asinpu ni luia. Tenchu ha asinpu ha umor taituana chanasa ke! Amen.
26Hasik han Pathianin hangai ha anzak na hura ei betoka a nupang u ngaiin ei mang babang u rathula a nungchang u aleta ei mang u. 27Hatuka pasal ngai um nupang le ei anmang dan ngai amaka amani le amani ei hur u na pasal le pasal om sa lui ei tho u hatuka amanin athe thei u na lam tok lui mara ei man u.
28Hatuka hantin han amanin Pathian ha ariat u ranga anvo ranga zot u mak hantin han Pathianin hangai ha dik lui sin a tho rang mandona siata ei betok. 29Amani ha dik lui tin, asel, mumak, ningol, huatanham, anhuang, ansual, mandon asia abit. 30Mi kuarbut apek, siat aril, Pathian antir, mi rui aril, borai atho, nupa hetel lui, asia ansuak, 31malung varna bui, achongtin sur thei lui, lungkhamna don lui, anngoina zot lui le mi lungkham muna don lui. 32Hangai ha Pathian hiva a ruiril ei riat u hintina om atho ngai ha amani ha athi rua u, hanum amanin hantin han ei tho u ha rong nimak tenchu hantina atho ngai um ei pom u.
Currently Selected:
ROM 1: RANGBSI
Highlight
Share
Copy
Want to have your highlights saved across all your devices? Sign up or sign in
Ranglong NT with PSA - Dankit Athar Le SAM
Copyright © 2017 by The Bible Society of India
Used by permission. All rights reserved worldwide.
