ROM 2
2
Pathian Ruiril
1Hasik han, o miring nangin rui nei ril ha, neini ni ni ro ansangna lampui don mak che, asik chu hong ruia mo nangin mi tei rui nei ril? Hava ruia naninga asiat anlo keng na ni asik chu na rui ril tak ha nangin hava anga om nei tho. #Mt 7.1; Lk 6.37 2Hatuka koinin na riat hia anga atho tak amani chunga Pathianin ataka keng rui ei ril. 3Hatuka o miring hia ang om atho ngai tak nangin hangai rui na ril tik le, hanuk reta nang um hantin na tho le hatik han nangin nei masat ha Pathian ruiril ata zok thei in mo? 4Hanle a phung ei thum, ei diar, aphuk a sot neinun ha nei elsel mo? Pathian phung thum han malung thulna tiang ei na ruai, hava ha remak che mo? 5Tenchu nei ankhir le anthul thei lui malung anga nangin na rang achan taksit nei man ting hava taksit le Pathian ruiril anzik nikhua hong anlang inti. 6Aman mi tin ha asin tho anga han mara pe inti. #Sam 62.12; Hnc 24.12 7Sin asa, adiarna le anlianna, anlalna le siat lui rua anrok, hangai ha ringanlonna pe inti. 8Tenchu aneng hatuka atak tak tel lui le anzik luina a zot ngai ha amani chunga taksit malung alum antak le lunghangna tong inti. 9Mansana Juda, nuka Grik chunga le miring asia tho ngai dora chunga chul inti. 10Tenchu om asa mitin chunga, mansana Juda mi nuka Grik mi chunga anlianna, anlalna le phukdaina chul inti. 11Asik chu Pathian kom maienala om mak. #Dan 10.17
12Asik chu dan abuia asia tho ngai dora ha dan abuia siat unti hanuk Dan thuaia oma asia tho ngai dora Dan le rui anril inti. 13Asik chu Dan ariat ngai hi amani hi Pathian kom adik tina ni mak, tenchu Dan azi ngai ha amani hake adika antel. 14Asik chu Jentail ngai han Dan reng man mak amanin anina dan anga om atho hava han Dan ite aman u nokam amani dan ha amani ei ni. 15Hantin han amani dan sin amalung u chipa anziaka anlang amani mandon u bibila anril hatuka ankhalna tin le ei ankhal u ei man sia u, hoho mo ei man sa u na ei pom u. 16Pathianin thang ahui kei ril anga Isua Krista le miring ngai maruk om ei tho u ngai rui aril tik le aloma la hong manlang zit inti.
Juda le Dan
17Juda mi antia Dan chunga anngam Pathian koma nei ansong. 18Dan ata anchuna nei man tuara ei zot dan nei riat, asa ual ngai bila chu nei pom ani na. 19Nei riat sadim nang hi acho lam an ruai, azing kara ngai a el. 20Amo ngai anchu, naipang ngai minchupu, dana le ataka nei man. 21Ani, mi nei manchu nang naninga anchu mak che mo? “An ru ngai mak me tina nei ril” nang le nan ru mo? 22Nangin, “Ui re ngai mak me,” nei ti nang le ui na re mo? Nangin, ramil nei matir, tenchu nangin ramil ina nan ru mo? 23Nangin Dan nei song, tenchu nangin Dan nei khela Pathian elsel nei tho mo? 24Asik chu anziak a om hantin han, “Nangni sika Jentail ngaiin Pathian raming adem zei.” #Isa 52.5 (LXX)
25Ataka vun at hi asa chu asa, nangin Dan na zi aniten, tenchu Dan na khel ten na vun at ha vun at nok achang zei. 26Hanuk vun at lui mi ha Dan om ngai dora azi ten, a vun at lui ha vun at atia an tel no ni mo? 27Hatuka hanle vun at lui mi han Dan azin nang Dan sika vun at na ni nam Dan nei khel sika nang na rui ril no ni mo? 28Asik chu apanga Juda ha, Juda mi ni mak hanuk apanga taksana vun at ha, vun at ni mak. 29Tenchu sungrila Juda mi hake ama ha, Juda mi hanuk a malung sunga vun at ha Lekhana ni lui Rathana, hava ha vun at ama ei anpakna nimak ten Pathian ata keng. #Dan 30.6
Currently Selected:
ROM 2: RANGBSI
Highlight
Share
Copy
Want to have your highlights saved across all your devices? Sign up or sign in
Ranglong NT with PSA - Dankit Athar Le SAM
Copyright © 2017 by The Bible Society of India
Used by permission. All rights reserved worldwide.
