ROM 3
3
1Hanle Juda mi ei ni a imo aliak ei nina? Vun at ngai lampui tina imo ei satna? 2Mansana Pathian chongpek amani kom ei ansiak. 3Senkhatin a iam u nokam hava han imo? Ei iam u nok sika Pathian iamrua ha akorong ei ni rang mo? 4Hava chu ma ro! Hanek ten Pathian ha atak atia anpom rase miring reng hi milak ei ni ha ni rase. Hintin hin, anziak a om, “Nang na chongin adik na manchang thei hatuka na ruiril tika nei ratna rang.” #Sam 51.4 (LXX)
5Tenchu koini dik nok na ha Pathian dikna aman chang ten, hanle imo ti ma ni? Pathinin a taksit ana man tongin ama hi dik lui mo? Miring anga kei ril ke. 6Hava chu khai ro! Asik chu hantin aniten Pathianin hontinmo ramual rui ril ni?
7Tenchu ka milak thona Pathian dikna a manpak sa na aniten hano koi um atun asia tina ichangmo ka rui ei lan ril ret? 8Hasik han ichangmo kei ti nok rang min ana rilsiata, senkhatin chu koinin nei ti anga ei ril u, “Hong u ro sin asiat tho u rei hanke asa nei man rang?” ati u. Ha ngai ha chu asia anlo u rang adik ke.
Tute Adik Ommak
9Hanle imo anlang koini hi mi tei neka nei sa mo? Hava ha khai ro! Asik chu koinin hiva man hin Juda mi le Grik mi aloma asia ningneina thuaia aleng keng ani zei tina nei riatpui. 10Hava ha hintin lekhabuna anziak a om: #Sam 14.1-3 (LXX); 53.1-3 (LXX)
“Adik tute om mak angkhat ngal om mak,
11Ariat tute om mak
Pathian anrok tute om mak.
12Alom u na iam dik lui
apan zita amani ha alom u na amang
salui ei ni u
sin asa tho tute om mak angkhat ngal om mak.
13A rol u anhip lui than ang. #Sam 5.9 (LXX); 140.3
amalei u na an huangna chong aril
arakam u thuai marul hang tur a om
14amur u na khomak le chong akha bit. #Sam 10.7 (LXX)
15Ake u thisen ansuak ranga annot #Isa 59.7-8
16alampui u tina antakna le siatna.
17Hanuk phukdaina lampui re u mak
18Pathian hi na chi ngai ti u mak.” #Sam 36.1
19Hatuka koinin nei riat Danin ei ril tak ha Dan thuaia om ngai rang ha ke ei ril. Mur tin anchipa ramual dora Pathian ruirilna thuai ei ni rang. 20Hantin han Dan sin atho le nukanei dora, ama makunga adika antel thei no ni. Asik chu Dana hanke asia riatna ei anpiang. #Sam 143.2; Gal 2.16
Isua Krista Iam le Dikna Nei Man
21Tenchu atun Dan nokam Pathian pek dikna anlang zei hatuka Dan le deari ngai han ama ruia ei hong ril u 22Pathian pek dikna ha Isua Krista iama, a iam ngai doran, amani ngai dora chunga achuk. Asik chu ei tei na ngal om mak. #Gal 2.16 23Asik chu mi doran asia atho sua zei hatuka Pathian anpak om lai mak. 24Amanin man abuia a lungkhama Krista Isua mazok na lehan dika nei antel. 25Amani ngai ei iam u na lehan a om asial u ngai ei andual theina ranga Pathianin ama thisen ha lenna dali anga ei hong dar ama dikna ei anlangna ranga ei mansuk. Man lai han aphuk ei anchualna le ei siat u ngai riat lui anga ei om. 26Atun ahun taka ama dikna a manlang aman ei dik theina ranga hatuka Isuana a iam tak chu amam dika antel.
27Hasik han borai thona chu honmo ei om? Hava ha a rot zei! Hong Dan le mo? Sin tho Dana mo? Ole iamna Dana mo? 28Asik chu koinin nei masat hiva hi Dan sin noka iamna le miring dikna na ei antel. 29Pathian hi Juda ngai rong a Pathian u mo? Jentail ngai um le ni mak mo? 30Jentail ngai um a Pathian u ke chong dika chu Pathian hi angkhat ke hatuka aman vun an at ngai hi iamna sika hatuka vun an at lui ngai hi iamna lehan dika tel inti. #Dan 6.4; Gal 3.20 31Hanle koinin iamna sika Dan hi akoronga nei sin mo? Hantin chu ni mak haneka Dan hi nei mandet keng.
Currently Selected:
ROM 3: RANGBSI
Highlight
Share
Copy
Want to have your highlights saved across all your devices? Sign up or sign in
Ranglong NT with PSA - Dankit Athar Le SAM
Copyright © 2017 by The Bible Society of India
Used by permission. All rights reserved worldwide.
