ROM 4
4
Abrahama Anchuna
1Hanle imo ti ma ni? Taksana na pa mansa Abraham ha imo ei man? 2Asik chu Abraham ha asin thona dikna na antel ten dorsai rua adon, tenchu Pathian kom chu a bui. 3Asik chu Pathian lekhabun ei ti: “Abraham Pathiana ei iam hanke hava ha ama ranga adik ati na ei antel.” #Anp 15.6; Gal 3.6 4Sin atho takin alo man ha, ama ranga lungkham sika ni mak, ei man ranga antel ngal keng. 5Tenchu sin tho luia ama chunga a iam tak ha anmokna bui ngai dika atelpu han ama iama han dik atia ei antel. 6Hantin han David ham ha mi ha chanasa na ei ril Pathian sin noka dikna na ei tel ha:
7Hintin hin: “Amani ei dik u noka ata andual sua ngai #Sam 32.1-2
ei siat u na ankhua om ngai chu achanasa u keng,
8Ha mi chanasa ke Puman a chunga asia tel pe mak.”
9Asa, hia chanasa chong hi vun at mi chunga rong mo ole vun at lui chungam mo ei ni? Asik chu koinin nei ti, “Abraham aranga ei iamna le dikna atia ei antel.” 10Hova oma mo ei antel? Vun at a mo vun at luia mo? Vun at a nimak, tenchu vun at luia ke. 11Hatuka vun at andangna ei man ha, hiva hi ha iamna na dikna a morzem ei ni, ei iam ha vun at luia om han ei ni; a derdin hiva hi, vun at luia oma a iam ngai han ama ha amani alom u na a pa ei ni rang amani ranga ha dikna na ei antelna rang. #Anp 17.10 12Hanuk vun at ngai um a pa u ei ni rang hanuk vun at ngai ronga nimak tenchu vun at luia om ngai koini na pa Abraham ei iam ha ama ke nuk azi ngai amanim ama ha a pa u.
Iama ke Pathian Chongtin Neiman
13Asik chu Dan le nimak tenchu iamna ei dikna le Abraham a khuka ramual alua ranga khomak ei ansam. #Anp 17.4-6; 22.17-18; Gal 3.29 14Asik chu Dan azi ngai ha amani ha aluapu aniten iam ha omze buia nei sin hanuk ha khomak ha akoronga nei sin ani zei. #Gal 3.18 15Dan hin taksit asina tenchu Dan ei buina taka hava han Dan a khel um om mak.
16Havasik han hava ha iamna le ei ni lungkhamna anga ei ni, ei val hi hiva hi, ha chongtin ha akhuk dora ranga, Dan azi ngai rang rong nimak tenchu Abrahama anga iama achi ngai kom adet ranga ama ha koini na loma na pa. #Gal 3.7 17Hintin hin anziak a om, “Nang hi nam atampa pa na ka na sin.” Ha Pathian makunga han pa, ama iam tak ha aman athi ngai hanuk ei pek hanuk abui ha a om ei ti. #Anp 17.5 18Abraham ei sabei rua abuiam ei sabeia ei iam, hantin han na khuk ni inti hava chong anga, “Nam atampa pa ei ni.” #Anp 15.5 19Hatuka iamna na ei chuai noka akum raza dam ani nam, athi ranga taksa le Sari nai kok athi ti ariatam. #Anp 17.17 20Hanum Pathian chongtin ha ei thira iam luia ei om noka iam adeta ei oma Pathian ei manpak. 21Hatuka ei riat sadim, Pathian a chongtin ha hava ha tak ei manchang nget rang. 22Hatuka hia hi asik, “ama ranga hava ha dikna atia ei antel.” 23Ama ranga antel hava ha ama rang ronga anziak ni mak Tenchu koini na rangam keng. 24Koini na rangam hava ha antel inti asik chu koini na Puma Isua ha athi ngai bil ata anthui ha koinin ama chunga nei iam. 25Ha Isua ha koini nei siat sika ei ansur dika nei antelna ranga anthui ret. #Isa 53.4-5
Currently Selected:
ROM 4: RANGBSI
Highlight
Share
Copy
Want to have your highlights saved across all your devices? Sign up or sign in
Ranglong NT with PSA - Dankit Athar Le SAM
Copyright © 2017 by The Bible Society of India
Used by permission. All rights reserved worldwide.
