CHWEKETIN 4
4
Sunggigü Le Nduntho Thyü kelo Kekvu pe Mosa Tsü
1Mosa le Npugü, jokenio, “Ai Israel nyule atenyemvu lo ale nyu zoyo nyümvu nyatselo. Anyugun le nle ayhühyu thyüshü mvule tsonzo yatselo ale nyuthyü mon?” tsonshü.
2Tsügenyu Npugü le a-ka, “Nle nyu sen hü nla?”
A-le, “Thün nme le,” tsonshü.
3Npugü le, “Tsü shwepe kazü nyu shülo,” Mosa le tsü shwe pe kazü nyu shü laryü, tsüle peri nme ngwa la, tson-o a-le tsüka tinla: 4Tsüselo Npugü le Mosa ka, “Nkhün tsügü a-ma süso lo.” Tson-o Mosa le nkhün tsügü tsü tezenlo laryü tsüle thün nme thyü nila. 5Npugü le, “Hithyü pe Israel nyu hio Npugü, anyugun pvübon nyu Sunggigü, Abraham, Isak lo Jakob Sunggigü le nyhühyu thyüshü ketsin le tse tsin shülo.”
6Npugü le Mosa nthon nio, “Nben pe nphi hensin shüshülo.” Mosa le a-jo zen-o a-ben pe aphi hensin shüo khishwilo laryü nyu le tyüpe khetso kechon hontsela. 7Npugü le Mosa ka, “Nben pe nphi hensin shünilo.” A-le tsonshüo khishwi nishü laryü tsüle a-mi kecha hontse gwala. 8Npugü le a-ka, “Anyugun le ntenyemvu nmvue nduntho kerigü tenye mvu-e higü hi anyugun le tenye loti. 9Anyugun le nduntho hihvue tenyen mvu, lo nle nyuzo yo tsünyümvu yatselo, Nile zürinyu zü peha thyülo njüo pe kazünyu jashü lo. Lo zü gü le tezi ngwa lati.”
10Ai Mosa le, “Nmvule, Npugü, anishü nyalo. Ale thame ka-e jozo kegwa thyülo hümvu, lo nle a nthon bin nsen zo kegwathyü lomvu. Ale nyajü lo kesedun gwenzin le.”
11Npugü le a-ka, “Segü le temi mün thyüshü? A-thyüpe nyetin rügü nmvue pin? A-no thahyu nmvue a-hyüpo shüla? Tsü le Npugü, Ale le. 12Tsü genyu gülo! Ale ncheo nno jozoti, lo nno nyu zo tiyo nka zoshü ti.”
13Ai Mosa le, “Nmvule, Npugü, kechanyu peha nishülo.”
14Tsontsin Npugü le Mosa ge a-nyunta-o, “Levi tsipwen ntsa gü Aaron le bin mvu ole? A-le jozo gwasa kethyü ale shabin nyo. Ketsin a-le nteno titse ryüzhü nyo lo nshwi a-kenyü sati. 15A-no nyuzo tiyo nle pe a-ka zoshü logwa. Lo ale hai keche pe hai no thazoti, lo hai no nyuthyü tiyo ale hai ka zoshüti. 16A-le nsun thyüo temi dan ka njozo shüti. Lo nle Sunggigü hontse a-no nyuzo tiyo zope a-zenti. 17Nle thün higü senlo; tsü sen-o nduntho dan thyü nrün genyu.”
Mosa le Ijipt Nyu Nikeryü
18Tson-o Mosa le a-min Jethro ki gü a-ka, “Ano Ijipt ki ranigü akaminyu dan le rhün binzun le nmvuyo shwishüta.” Tsontsin Jethro le akenda le gülo lo, tsonshü.
19Mosa le Midia ki kehü ka, Npugü le a-ka, “Ijipt ki rani gülo, ndushvu lati tse kehü nyu aphu silaso.” 20Tsügenyu Mosa le a-nu lo a-nyuhvu pe gada ge shülo njüo Ijipt ki gü titse tsonchü shü, lo Sunggigü le a-ka zokeshü thün gü sen hü.
21Npugü le Mosa ka zonishü, “Nle Ijipt ki rani gülo ale nno thyülo kegwa kekvu pe ntsükela nduntho dan raja gü mhundyü ka thyüshü mvuloshvu. Ai ale raja gü nyun thyüpe rü lati, tson-o a-le temi dan hoshü loha. 22Lo nle raja gü ka, Npugü le kezo le, ‘Israel le anyuri gü le. 23Ale anyugü no chwila lo, tson-o gü arüshvulo tsonzo ai nle nmvu laso. Tsügenyu ale nnyu rigü dushvu lati.’ ”
24Ijipt ki gü kejü tson nyu kensenbin nme ka Npugü le Mosa teno-o a-dushvu la titse so. 25-26Tsontsin a-nu Zipporah le tso ayi kebin nme khipe a-nyugü girü la njüo tsüpe a-nyepvü pha kesü shü. Gikerü jvü gü genyu a-le Mosa ka, “Nle agenyu tezi nyepvü nme la,” tse zoshü. Tson-o Npugü le Mosa keyhun kenishü.
27Npugü le Aaron ka, “Nle tehenyhun kemvu kazü ki gü Mosa teno shülo.” Tson-o a-le ryü kazüthun kenshün gü ka a-teno-o a-nboshü. 28Lo Mosa le Npugü le a-no Ijipt ki niryü lo tse a-ka kezojo aphu pe Aaron ka zoshü; lo Npugü le a-no nduntho dan thyü shü lotse ahza khikeshü ko pe zoshü. 29Tson-o Mosa lo Aaron au le Ijipt ki gü Israel nyu sharhi dan aphu ko kequen lo. 30Aaron le Npugü le Mosa ka zokeshü jodan aphu zo shü lo Mosa le temidan mhundyü ka nduntho dan aphu thyüshü. 31Anyugun le tenyenlo, lo Npugü le ryüo mele dihontse anyugun nshwe bin nyo hyukela rüla nyülo-o anyugun aphu nkhün tsü gü rüshvu.
Currently Selected:
CHWEKETIN 4: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
