CHWEKETIN 3
3
Sunggigü Le Mosa Ko Kelo
1Khenyüme Mosa le a-migü Jethro, Midian nyu Püshükeda gü tanyü khwen hü, a-le tanyü dan zen-o tehen yhunkemvu kazü gü nken-o, kazüthun kenshün gü Sinai karyü. 2Tsüka Npugü jolo gü le mah kenyü nyu tehenphun nme ka a-yhühyu thyü shü. Mosa le mah le tehenphun ka nnyübin-e tsü rokemvu hyulo. 3A-le rüchün-o, “Hile ndunkethyü nme so. Dihontseo tehenphun gü romvuyo? Ale a-kho nnigü shwishüti.”
4Mosa le a-khonni ryü kejü Npugü le hyushüo tehenphun nyu a-ko-o, Mosa! Mosa! tsonshü.
Tsontsin a-le, “ale hika hü nle,” tson.
5Sunggigü le a-ka, “Kho nni ryünya. Nphakü tho lalo, nle sokebin bin tsüle nshün kethyü genyu. 6Ale npvübon nyu Sunggigü, Abraham, Isak lo Jakob Sunggigü le.” Tsontsin Mosa le a-mhunsun lola, a-le Sunggigü nri nshvu kela genyu.
7Tson-o Npugü le, “Ale Ijipt nyu atemi dan le kenjünthyü kebin hyu laso; anyugun keshwinyu ben nyu kenjünthyü thathyü kebinnyu anyukhishwi shü lotse nra kebin khwen ale nyülo laso, 8tsügenyu ale Ijiptnyu bennyu anyugun khishwi lo-o Ijipt kazü nyu anyu zen chwigü kazü kebwe kegwa ntsoka Kanannyu, Hitnyu Amornyu, Periznyu, Hivtnyu lo Jebusnyu le yhun kebin kazü günyu shüti tse ryü bin nyo. 9Ale atemi dan kenra khwe nyülo, lo dihontse Ijiptnyu le anyugun nshwe bin yo hyu laso. 10Tsü genyu ntsoka ale nnipe Ijipt raja gü ki shü bin nle, nno atemi dan tsonrio a-kazü nken chwila nrün genyü.”
11Ai Mosa le Sunggigü ka, “Ale lihi kemvu. Ale dihontse rajagü kigü Ijipt nyu Israel nyu zen chwiryü lo tila?”
12Sunggigü le, “Ale nzen hüti, lo nle Ijipt nyu temi dan zen chwi keryüka, hagun le kazüthun hige arüshvuti. Tsügü tsüle ale nnishü ketsin tse kethyü tsin keshüle.”
13Ai Mosa le a-jo kenio, “Ale Israel nyu ki gü anyugun ka, ‘Hagun bonnyu Sunggigü le anishüle’ tselo anyugun le, ‘A-zan le següla?’ tse aka shün soti. Tsonlo ale anyugun ka dihontse zo mon?”
14Sunggigü le, “ALE ALE GÜ TSÜLE. Nle hipe anyugun ka zo shümvu loshvu: ‘ALE tse ko kehü güle anipe hagun ki shü bin nle.’ 15Israel nyu dan ka, Ale Npugü anyugun pvü bonnyu Sunggigü, Abraham, Isak lo Jakob Sunggigü le nnipe anyugun ki shü bin nle tsezo shülo; Hile kethonthen azan le; hontse ryükejü shehe aphu ako hüti. 16Gü Israel nyu sharhidan aphu ko kequen shüo anyugun ka Ale Npugü, anyugun pvü bonnyu Sunggigü, Abraham, Isak lo Jakob Sunggigü le nyhühyu thyü shüle tse zo shülo. Ale ryüo Ijiptnyu le anyugun ge nyuthyü bin yo hyu laso. 17Ale Ijipt nyu le anyugun nshwe nyhün kebin nyu anyugun zen chwigü kazü kebwe kegwa, Kanannyu, Hitnyu, Amornyu, Periznyu, Hivtnyu lo Jebusnyu kazü nyu shüla titse rhilo laso.
18“Atemi dan le nle nyu zoyo nyüti. Tson-o nle Israel nyu sharhi dan zen-o Ijipt raja gü ki gü a-ka, ‘Ibrinyu Npugü, Sunggigü le a-npfü agun yhühyu thyü shüle. Agun khinya-o agun no jonshan tehenyhun kemvu bin ki tsonchü gun gü Kerüshvu thyüpe Npugü agun Sunggigü tsülo.’ 19Hagun le tenge tse kemvu we Ijipt raja güle hagun hoshü kemvui tse ale sha bin nyo. 20Ai ale akekvu nyu kenrinthyüo shaja pe Ijipt nyu tsüti. Tsüsiki nyu a-le hagun hoshü ti.
21“Ale Ijipt nyu thyüpe no hagun rühvuti tson-o atemi dan le chwi kejü ka, anyugun no kenben tin loho. 22Israel nyu tenunyu nmeme tse gü Ijipt nyu a-kajon nyu lo Ijipt nyu lihigü a-kanyu kebin nyu ka, phinya lo suna lo raka nye, tyü hikü loti. Israel nyu dan le hidan hi pe anyenyu peche lo tenu ge-e shüo Ijipt nyu kenya sentin lati.”
Currently Selected:
CHWEKETIN 3: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
