CHWEKETIN 2
2
Mosa Kenyu
1Higwenkho ka Levinyu kaminyu nme le a-npfü a-kaminyu tenunyu nme lolo, 2tson-o peche nme nnyulo. A-jvu le nyugü le zegwa sakethyü hyulo-o shyeshen a-kebu. 3Ai a-kebu sin binlo hala-o, nba pe kedo rokhu nme züno yümvu nrün genyu tinküchün pe yünlo. Tson-o a-le ntsenyu gü pe tsünyu shülo-o khipe züri gü seka tehen soge shü njün. 4Dihontse la tiyo tseo ntsenyu gü lügi le nithen ki bin-o nribin.
5Raja gü nyugi le zülu titse züri ki tsüryü, lo a-gogi ju le züse ki nda bin. A-le rokhu gü le tehen so kebin hyushüo a-gogi nme no senryü lotse nishü. 6Raja nyugi le khin she shü laryü ntsenyu nme hyulo. Ntsenyu gü le chü kebin hyulo-o, a-le shwi njün hala. “Hile Ibrinyu nyu nme so,” tsonshü.
7A-lügi le ryüo Faro nyugi ka, “Ano gü Ibrinyu tenunyu nme fü zenryü a-leyi pe ntsü tile?” tse tsügi ketsoshü.
8Tsontsin, Raja nyugi le a-ka, “Tsonshülo,” tson-o a-le gü ntsenyu gü a-jvü zenryü. 9Raja nyugile, tenunyu güka, “Ntsenyu higü zen gü leyi pe atsülo, lo ale nchün thyüti.” Tsügenyu a-le ntsenyu gü zengü leyi shü. 10Tsontseo nyu gü le püshü kelo ki zengü raja nyugi tsüo, tsügi le anyu thyü lo. A-le a-npfü a-nthon-o, “Ale zünyu a-süshwi kelo genyu a-zan pe Mosa thyüti,” tsonlo.
Mosa Le Midian Ki Tinkela
11Mosa le püshü lo-o, a-temi Ibrinyu dan shwishü titseo chwilaryü, anyugun kemvu thyü pe kam kerü thyükebin hyu. Tsünyeki Ijipt nyu nme le a-temi Ibrinyu nme vükebin hyulo. 12Mosa le lizin hizin nrishüo, temi nme hyumvu laryü, a-le Ijipt nyu gü dushvu la-o pe hachon nyu kebu la. 13Tsüsinyü a-le nichwi laryü Ibrinyu mihvu le kega kebin hyulo. Tson-o a-le thyüzü kebin güka, “Nyuthyüo npfügü Ibrinyu vü bin nla? tsonshü. 14Tsontsin temi tsügü le, “Segü le nlope agun sa keda lo jokera gü thyü shü ola? Nle Ijipt nyu tsügü dushvu kela hontse adushvu la titse bin ole?” Tsüselo Mosa le nshvu la-o, “Ale nyuthyüshüyo mele asha laso.” 15-16Tsü rüla raja güle shalo njüo Mosa dushvu la titse so, ai Mosa le tin gü Midian kazü ki yhun tinla.
Khenyüme Mosa le zülvu nme khoka dun kebin ka Midian nyu püshükeda gü Jethro nyugi mitsenyü le zülü lo züpe a-pvü tanyü lo tenyü dan züketsü khun ka shüshü titse ryü. 17Tsü ka tanyü kekhwenyu peha le Jethro nyugi dan hüla. Ai Mosa le anyugun che-o anyu senru dan no zü tsülo. 18Anyugun le rani anyugun pvü ki gun laryü, a-le anyugun ka, “Nyu genyu hagun le nthu nshwe rani ryülo ola?” tsonshü.
19Anyugun le, “Ijipt nyu nme le tanyü kekhwenyu dan ben nyu agun kenishü, lo a-le zü-e lüpe agun tsüshü lo senru dan lashü tsele.”
20Tsontsin a-le “A-le diki hü nla? Nyuthyüo a-khela-o la? gü a-ko zenryü ngun tyütsü lota.”
21Tson-o Mosa le tsüka yhun kethyü a-kendo la, lo Jethro le a-nyugi Zipporah pe a-tsüshü.
22Tson-o tsügi le peche nme nnyulo, tsontsin Mosa le, “Ale kazü higü nyu tesin nme le, tson-o a-zan pe Gershom tholo.”
23Kenkhin ki Ijipt raja güle sila; ai Israel nyu dan le medo thyü kenjünthyüo keche hishü. Lo anyugun kechü khwe le Sunggigü ki küla. 24Sunggigü le anyugun kenjün kethyü khwe nyülo-o Abraham, Isak lo Jakob zen kejozen kenjü rüchünlo. 25A-le Israel nyu le medothyü kebin hyu shüo anyugun phin rüchün shü.
Currently Selected:
CHWEKETIN 2: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
