CHWEKETIN 1
1
Ijipt nyu Le Kenshwe
1Jakob nyu peche a-zan Ijipt ki tsü kela ju, nmeme tse a-kami zen tsükela dan zan, 2Reuben, Simeon, Levi, Judah, 3Issachar, Zebulun, Benjamin, 4Dan, Naftali, Gad, lo Asher, 5Jakob tsipwen aphu kesin keshü le hentsenyü. A-nyugü Josef le Ijipt ki hü laso. 6Josef, tsasikezen ju lo shehe tsügü aphu siküla, 7ai Israel tsipwen dan le yhunchvu kenyesa lo kvusa chwiryü Ijipt kesü thyüla.
8Lo raja keshün, Josef rüla shamvu shü kethyü nme le soryü Ijiptnyu kekvusen lola. 9A-le a-temi dan ka, “Israel nyu le chonritsin lo kvu kethyü ngun genyu kenshvu le bin laso. 10Teri le soryü lo anyugun le nshwikerüchün nyu zen kengülo-o nzen terithyü tseo nkazü nyu tin la-e sha loho. Tsügenyu ngun anyugun no chonkenye mvulo nrün genyu tedo peha fülomvu loshvu.” 11Tson-o Ijipt nyu le anyugun no kam ketsen thyüo kenjün thyü nrün genyu anyugun keshwi mi pe shü la. Israel nyu no raja gü kenya pe kequen nrün nyida Pithon lo Rameses thyü. 12Ai Ijipt nyu le Israel nyu nshwe chon lo anyugun le yhunchvu kenye pe kazü gü kesü thyü soryüla. Ijipt nyu le Israel nyu nshvu lola 13-14tson-o anyugun kemvu thyü pe no thatho kerü thyü yhunkenjün thyü. Anyugun le Israel nyu shwinjün mvushütse no anyugun ka thyü lo lonyu thathyü.
15Tson-o Ijipt nyu raja gü le Ibrinyu tenunyu le nyukezen ka keche kehü Shifra lo Puah au ka zo. 16“Hai le Ibrinyu tenunyu le nyukezen ntsen kethyü ka pechenyu yatselo boshvu la, lo tenunyu yatselo no rhün bin tselo tsonshü.” 17Ai nyukezen ka keche kehü hvu le Sunggigü nshvuo raja gü jozen mvula, tson-o pechenyu no rhünlo. 18Tsügenyu raja güle au koshüo au ka, “Hai le nyuthyüo hihontse pechenyu no rhünlo hü nla?”
19Tsontsin au le, “Ibrinyu tenunyu le Ijipt nyu tenunyu hontse mvu; anyugun le nnesatse anyuzen la gwenzin, lo ayi le anyugun tilo kemvu ka nyuzen lola hü le.” 20-21Nyukezen ka keche hvu le Sunggigü kenshvu genyu Sunggigü le au so-o au kami no binlo. Lo Israel nyu le chvukenyeo nko chwiryüla. 22Tsügenyu raja güle ahza pe a-temi dan aphu tsüshü: Ibrinyu pechenyu nnyukelo lihigüe pe Nile züri nyu shwenla, ai tenunyu we aphu no rhün lolo, tsonshü.
Currently Selected:
CHWEKETIN 1: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
