BINZEN 50
50
1Josef le a-pvü soge chetsü gü chü-o a-nba. 2Tson-o Josef le a-pvü min dawa pe jeh shülo tse ahza hoshü. 3Tsüle jon henzi lola, dawa pe jeh kethyü le tsükho lo lahü. Ijipt nyu le jon hentsenyü a-chechü.
4Chekechü gwenkho tsüle güla ntsin, Josef le raja gü hensin kedanyu dan ka, “Hagun cheno-e jo higü sen gü raja gü ti shülo: 5Apvü le sigü kejü ka, ano akhipe Kanan kazü ki a-le nda kenjü sika günyu sun titse ajo hoshü njün nyo. Tsügenyu ano gü apvü sun lalo, tson-o ale rani ryüti.”
6Raja güle, “Nle zoshü kenjü hontse, gü npvü sunla lo.”
7Tson-o Josef le a-pvü sun titse nsinla. Raja gü hensin kedanyu dan aphu, a-kanyu pelü dan, lo Ijipt nyu sharhinyu dan aphu Josef zen nsin. 8A-kaminyu, a-tsasikezen nyu, lo a-pvü kami kechanyu dan aphu a-zen nsin. Anyugun nyenyu keshen dan, lo anyugun tanyü, tenyü lo methu dan nti Goshen lojvü nyu kebin gwenzin. 9Temi le kerugari lo keru ge dun-o a-zen nsin: tsüle danda nme thyü nsin.
10Anyugun le ryüo Jordan nphozin Atad ka shye kenyu bin tilo ntsin gwenkho kethon chyechü tetso shü, lo Josef le jon tsenyü chyekechü jvü dan thyüshü. 11Kanan nyu keyhun nyu dan le temi tsüdan le Atad ka chyechü kebin hyushüo, “Ijipt nyu dan le me chyekechüjvü kentsun dihontse kethyü senhü nla hile, tsezo!”
Tsügenyu bin gü zan pe Abel-Mizraim tse thola.
12Jakob nyu jule a-le anyugun ka zokeshü hontse thyüshü; 13anyugun le a-min pen gun gü Kanan ki Abraham le sika bin thyü titse-o Hitnyu temi gü Efron lobu hei kelo Mamre npho zin Makpelah ka tsokü günyu sunla. 14Josef le a-pvü sun kela siki, a-tsasikezen ju lo kesigü kesun genyu a-zen kensin dan aphu zen-o Ijipt ki rano ryüla.
Josef le A-tsanyu ju ka Tha Zonikeshü
15Anyugun pvü kesi siki a-tsasikezen ju le, “Josef le ngun shwi ntsüo ngun le a-ge a-zükemvu thyü kenjün tsü aphu kethun nititse nda bin yatselo dihontse mon?” 16Tson-o anyugun le nme nipe Josef ki shüo: “Ngun pvüle a-kesi mhundyü, 17agun no, ‘Ntsanyu ju le nge a-zükemvu thyü kenjü tsü jüpe tsülo tse hilo lotse shüle.’ Tsügenyu agun npvü Sunggigü gonyu dan le nge a-zükemvu thyükela dan tsü jü pe agun tsülo,” tsonshü. Josef le lesü higü hyulo njüo chü sola.
18Lo a-tsanyu ju le anyu npfü ryü a-mhundyü nyu nkhün-o. “A-ka, agun ngo dan le hika nmhundyü nyu ryü bin nle; ” tsonshü. 19Ai Josef le anyugun ka, “Nshvu nyalo; ale anpfü a lope Sunggigü bin ka shü keloimvu. 20Hagun le age thagwakemvu rhila, ai Sunggigü le tsü kelu pe kegwa thyüla, tsühontse keshü genyu nthu temi kechon keyhun kenishü bin nyo. 21Hagun le thame kenshvui ndi. Ale hagun lo hagun nyenyu dan nucha loti.” Tson-o a-le a-jo bwenye tseo anyugun nyun thyü nbwe shü.
Josef Kesi
22Josef le a-pvü kaminyu zen-o Ijipt nyu yhun; a-le chen tsio tseryü yhun. 23A-le Efraim nyenyu lo tsüdan nyenyu hyuo si. Manasseh nyu gü Makir nyenyu ko Josef phanyu nda hü. 24A-le a-tsasikezen ju ka, “Ale sigüzhü laso, ai Sunggigü le hagun nucha lo hagun tsonri gü A-le swen-o Abraham, Isak lo Jakob ka zoshü kenjü kazü günyu shü lo tsentsü.” 25Tson-o Josef le a-temi dan no keswe nme thyü. “Sunggigü le hagun tsonri-o kazü tsügü nyu kegun ka, hagun le amin khi loti tse amhundyü ka swe lalo,” tsonshü. 26Josef le a-keyhun chen tsio tseryü ka Ijipt nyu sila. Anyugun le dawa pe a-min jeh la-o pe sikhin nme ka shüla.
Currently Selected:
BINZEN 50: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
