CHWEKETIN 6
6
1Tsontsin Npugü le Mosa ka, “Ntsoka we ale rajagü ge nyuthyü tiyo nle hyuti. Ale a-kemvu thyüo atemi dan no gü ti. Ale a-kemvu thyüpe a-no a-kazünyu anyugun hü shwi lati.”
Sunggigü Le Mosa Ko Keshü
2Sunggigü le Mosa ka, “Ale Npugü. 3Ale Kekvutsin Sunggigü tse kethyü pe Abraham, Isak lo Jakob yhühyu thyüshü, ai ale azan kenshün Npugü le tse kethyü pe anyugun no shamvu. 4Ale anyugun zen kejozen, lo anyugun le tesin thyüo a-nyu yhun kebin Kanan kazü khipe anyugun tsüti tse a johoshü. 5Ntsoka we ale Ijipt nyu le Israel nyu no anyugun dothyüo kenjünthyü kebin khwenyülo, lo ale kejozenkenjü rüchünlo laso. 6Tsügenyu Israel nyu dan ka, ‘Ale Npugü; Ale hagun kenilo ti lo Ijipt nyu dothyü kebin nyutsü ale hagun hoshü lati tsezo shülo. Ale abu ketape shaja ketetsin kethyü senryü anyugun ge shüti, lo ale hagun kenishüti. 7Ale hagun pe atemi thyü lo hagun Sunggigü thyüti. Ijipt donyu ale hagun hoshü lalo, hagun le ale hagun Npugü Sunggigü tse kethyü sha loti. 8Ale hagun zenryüo ale pe Abraham, Isak lo Jakob tsüti tse swen-o johoshü kenjü kazü günyu shüti; lo ale tsüpe hagun no hagun npfü hagun hon thyü ti. Ale Npugü.’ ” 9Mosa le jo hipe Israel nyu dan ka zoshü, ai anyugun le me dothyü kenjünthyüo nyugwamvusa kebin genyu a-khwen nyümvu la.
10Tsontsin Npugü le Mosa ka zoshü, 11“Gü Ijipt raja güka Israel nyu no a-kazü nken tin lamvulo shvu tse zoshülo.”
12Ai Mosa le, “Israel nyu-e akhwenyü mvu lo raja gü le dihontse akhwenyü tila? Ale jozo sha kemvule.”
13Npugü le ahza pe Mosa lo Aaron au tsüshü. “Israel nyu dan lo Ijipt raja gü ka, ale hai no Ijipt kazü nyu Israel nyu zenchwi lalo tse ahza khishü laso.” tse zoshülo.
Mosa Lo Aaron Kaminyu Rüla
14Reuben, Jakob nyuri güle anyu peche mizi bin: Hanok, Pallu, Hezron lo Karmi; hidan hile anyugun zansen kehü kami bonnyu jü. 15Simon le a-nyu peche mi tsero bin: Jemuel, Jamin, Ohad, Jakin, Zohar lo Kanan nyu tenugi nyugü Shaul; hidan hile anyugun zansen kehü kami bon nyu ju. 16Levi le anyu peche mishen bin! Gershon, Kohath lo Merari; hidan hile anyugun zansen kehü kami bon nyu jü. Levi le chen 137 yhunlo. 17Gershon le anyu peche mihvu bin: Libni lo Shimei lo au tsipwen kechon le bin. 18Kohath le anyu peche mizi le bin: Amram, Izhar, Hebron lo Uzziel. Kohath le chen 133 yhunlo. 19Merari le anyu peche mihvu bin: Mahli lo Mushi. Hidan hile Levi kaminyu lo anyugun tsipwen dan.
20Amram le a-pvü lügi Jakebed lolo, tson-o Aaron lo Mosa au nnyushü. Amram le chen 137 yhunlo. 21Izhar le anyu peche mishen bin: Korah, Nepheg lo Zikri. 22Uzziel ko anyu peche mishen bin: Mishael, Elzaphan lo Sithri.
23Aaron le Amminadab nyugi Nahshon lügi Elisheba lolo; tson-o tsügi le Nadab, Abihu, Eleazar lo Ithamar tse nnyu lo. 24Korah le anyu peche mishen bin! Assir, Elkanah lo Abiasaph; anyugun le Korah denzin anyu kami bon dan. 25Aaron nyugü Eleazar le Putiel nyugi nme lolo, tson-o tsügi le Phinehaz nnyulo. Hidan hile Levi kaminyu dannyu kami pe dan.
26Aaron lo Mosa hvu hile Npugü le au ka, “Ijipt nyu Israel nyu dan zenchwi lalo tsezo keshü hvu.” 27Ijipt raja gü no Israel nyu dan hoshü lalo tse keshü tsüle au.
Npugü Le Ahza Pe Mosa Lo Aaron Au Ketsü
28Sunggigü le Ijipt kazünyu Mosa nthon kethyü ka, 29A-le zo, “Ale Npugü le. Ale nka zokeshü aphu pe Ijipt raja gü ka zoshülo.”
30Ai Mosa le a-jokenio, “Ale jozo kegwa thyülo kemvu nle sha bin nyo; dihontse raja gü le akhwen nyüshü mon?”
Currently Selected:
CHWEKETIN 6: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
