CHWEKETIN 7
7
1Npugü le zo, “Ale nlope raja gü mhundyü ka Sunggigü hontse lo ntsa Aaron no n sidyükeshagü hontse shüti. 2Ale nka zokeshü aphu pe Aaron ka zoshü, lo a-le Israel nyu dan no a-kazünyu chwilalo tse rajagü ka zoti. 3-4Ai ale raja nyun thyüpe rü lati, tson-o ale Ijipt nyu ketetsin kethyü tsükho lakhi thyü bin-e a-le hai khwen nyüshü loho. Tson-o ale shaja kerü senryü Ijipt nyu ge shüo atemi dan zen-o kazü tsügü nkenchwi lati. 5Lo Ijipt nyu le ale abenshwe pe anyugun ntsun-o anyugun kazünyu Israel nyu zenchwi lalo, Ale Sunggigü tse kethyü sha loti.” 6Mosa lo Aaron au le Sunggigü le nyuthyülo tseshüyo tsüthyüshü. 7Au le raja güka thazo kehü gwenkho tsüle Mosa le chen hentetse lo Aaron le chen hentetse kenshen laso.
Aaron Thün
8Npugü le Mosa lo Aaron au ka, 9“Raja gü le nduntho nme thyüo Sunggigü le hai nishü tse kethyü tsinshülo tson yatselo, Aaron no a-thün shwen pe raja gü mhundyü nyu shülo tsüle peri ngwa lati.” 10Tsügenyu Npugü le au ka zokeshü hontse Mosa lo Aaron au le raja ki gü. Tson-o Aaron le a-thün shwen pe Raja lo a-hensin keda nyu dan mhundyü nyu shü, laryü tsüle peri ngwala. 11Tsontsin raja güle a-temi thakeshanyu lo temvunyu ju koshü tson-o anyugun ko temvuo tsü hontse thyü shü la.
12Anyugun ko anyuthün shwenshü lo tsüle peri ngwa la. Ai Aaron thün le anyugun thün dan nyilo la. 13Tson-e Npugü le zokeshü hontse raja gü le a-nyunrüo Mosa lo Aaron au khwenyü shümvu la.
Kenkie le Ijiptnyu Keryü Tezi
14Npugü le Mosa ka, “Raja gü le a-nyu rürio temi hoshü mvubin nyo. 15Tsügenyu lonyü a-le Nile züri ki kegü ka a-teno shülo. Thün peri ngwa kela gü tsü sen-o züzhie ki a-khwen bin lo. 16Tson-o raja gü ka, ‘Npugü, Ibrinyu Sunggigü le a-temi dan no chwila lo tse nka zoshü lotse anishü le, anyugun no tehenyhunkemvu kazü nyu gü a-rüshvu nrün genyu. Ai ntsoka keti nle nyümvu. 17Tsügenyu Raja gü, Npugü le hihontse zo hünyo, a-le nyuthyü tiyo tsüge a-le segü yo nle sha loti. Nrishü, ale thün higü pe zü gü vüshüti, lo zü tsüle tezi ngwa lati. 18Tsehü dan le si lati, lo züri gü le tenpe arünbo la-o Ijipt nyu le tsü tsülo mvu lati.’ ”
19Npugü le Mosa ka, “Aaron no a-thün khilo-o penso pe Ijipt nyu züri, zünyetson, lo züboun aphu sa shüshü lo tse zoshülo. Züle tezi thyü lati, kazü aphu nyu züle senkhun lo tsokhun ka kebin-e tezi ngwa lati.”
20Mosa lo Aaron au le Npugü le kezo hontse thyüshü. Raja gü lo a-hensin kedanyu mhundyü ka. Aaron le a-thün penso pe zü vüshü, tsontsin tsünyu zü aphu tezi ngwala. 21Züri nyu tsehü le sila-o a-rün gwamvu sala tson-o Ijipt nyu le zü tsü lo shvula. Ijipt nyu zü lika hika-e tezi ntila. 22Ijipt nyu temvunyu dan ko temvuo tsü hontse thyülola, tsügenyu raja güle himhundyü hontse anyun rüla. Npugü le zokeshü hontse raja güle Mosa lo Aaron au khwenyü mvula. 23Tsonkethyü sunka raja gü le hi rüchün anyunkhi mvu shütse ranio a-rajaka ki gunla. 24Ijiptnyu aphu züri nyu zü tsülo shvukela genyu züzhie ki zülvu tso. 25Npugü le züri gü vükeshü siki jon tsenyü le güla.
Currently Selected:
CHWEKETIN 7: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
