BINZEN 41
41
Josef le Raja Gü Minkon Zokeshü
1Chen hvu gükela siki, Ijipt raja gü le a-le Nile züri ka so kebin nmin, 2tsüka methu aphu kegwa tsenyü le chwiryü tehen sütyü bin. 3Tsüselo methu kecha tsenyü le chwiryü; tsü dan le nthü lo a-thyü gwamvu. Tsüdan le ryü züzhe gü nyu methu kecha dan khoka solo, 4lo methu kenthü dan le a-phu kegwa dan tyü lola. Tson-o raja gü le chon soryü la. 5A-le jü nigü laryü a-min kecha nme nmin ni. Lophun nme ka lopwe kenyün tsenyü le yhun bin. 6Tsüsika lopwe a-tsin gwakemvu, kazü kesi ki tsangkenhi le whün rügu kela kecha tsenyü le yhun soryü, 7lo lopwe a-tsin kendi dan le a-tsin kegwa dan nyishü lola. Raja gü le chon soryüo a-le a-min nmin kebin shalo. 8Lonyü a-le a-nyun nkhi-o me nipe Ijipt nyu jadunyu lo thakesha nyu koshü. Tson-o a-min pe anyugun ka zoshü, ai temi nme tsü kon zope a-zenshü lomvu la.
9Tsontsin a-hon kepen gü le raja gü ka zoshü, “Ale thyüzü kela nthu zoshwi mvulo shvu laso. 10Nle tensü ro kehü kedagü ayi ge nnyuntao ayi pe rikhun nyu so kedagü kanyu do thyüla. 11Kheje me ayi mihvu nren ayi min thyü lo a-kon le kechacha. 12Lo Ibrinyu ponyu nme, rikhun so kedagü do nme do ayi zen tsünyu bin. Ayi le ayi min pe a-ka zoshü lo a-le tsü kon zope ayi zen shüle. 13Lo a-le kezo hontse thyü lale: Nle alope abin nyu shünila, ai nle tensü ro kehü gü hü la.”
14Raja gü le me nishüo whütse doka nyu Josef zenryü. A-le a-pe thula lo a-phinya kelu kela siki raja gü mhundyü nyuryü. 15Raja gü le a-ka zoshü, “Ale amin nme nmi lo temi nme tsü kon zokho shü lomvu. Nle min kon zoshü logwa letse mele aka zoshü.”
16Josef le a-jokenishü, “Ale zokeloimvu, raja gü, ai Sunggigü le njün-o a-kon zo shüti.”
17Raja gü le zoshü, “Amin ki ale Nile züzhe nyu sobin, 18lo methu aphu kegwa tsenyü le züri gü nyu chwiryüo tehen sütyü sola. 19Tsüsika methu kenthü kecha tsenyü le chwiryü. Tsüdan tsü le ale Ijipt kazü lika hika-e kehyu methu dan nyu kenthü tsin. 20Methu kenthü dan le aphu kegwa dan tyü lola, 21ai temi nme tsü sha loho, anyugun shwipe kerika hontse nthü kethyü genyu. Tson bin-o ale chon soryüla. 22Ale lopwe a-tsin kegwa kenyün tsenyü le lophun me ge yhun kebin ko ale nmin. 23Tsüsika lopwe tsenyü le chwiryü, a-tsin gwamvu lo kazü kesi ki tsangkenhi le whün rügu kela, 24lo shye tsingwa kemvu dan le kegwa dan nyishü lola. Ale min gü zope jadonyu dan zenshü, ai anyugun nme a-kon pe aka zoshü lomvu la le.”
25Josef le raja gü ka zoshü, “Min kenyhun nren a-kon le kenme: Sunggigü le a-le nyuthyü tiyo pe nka zoshü laso. 26Methu tsü aphu kegwa tsenyü tsüle chen tsenyü, lo lopwe kegwa tsenyü tsüko chen tsenyü; au kon le kenme. 27Methutsü kenthü kenkhin ki keryü dan, lo lopwe tsingwa kemvu kazü-kesi ki tsangkenbu le whün nko kela tsüle chen tsenyü chenda. 28Ale nka zokeshü hontse- Sunggigü le a-le nyuthyü tiyo pe nhishü laso. 29Chen tsenyü Ijipt kazü aphu nyu kesükela thyü sati. 30Tsü siki chen tsenyü chenda thyüti, lo chen kegwa dan aphu nmhin lati, chenda gü le kazü gü nkela nrün genyu. 31Kesükela kethyü gwenkho gü nmhinshü lati, tsüsika chenda gü le ketetsin thyüri kela genyu. 32Nmin nmin hvu ge kethyü kon le Sunggigü le tsü gwenkho tho laso lo ryü kejü gwenkho thonmvu tse a-le tsü no ryüti.
33“Tsügenyu nle ntsoka temi kensü lo thakesha nyu peha kejü pe no kazü gü ntsen lo. 34Lo nle kedanyu kecha peha ko kejü shüo no kesükela kethyü chen tsenyü ka shye jün pvün jünme khilo mvu loshvu. 35Nle ahza pe anyugun tsü shüo anyugun no ryükejü chen kegwa dan ka shye aphu kequenlo, lo kekvu pe anyugun tsüshüo no nyida dan ka shyeka thyü lo-o rikhun lo. 36Tson-o ketyüketsü tsüpe chen tsenyü chenda le Ijipt nyu ryü kejü gwenkho ka kazü günyu kenjün nrün genyu ntsen binlo. Hihontseo temi ko khün mvu loti.”
Josef pe Ijipt so Ahng Thyü Kelo
37Raja gü lo a-hensin kedanyu dan le tharhi higü lolo, 38lo a-le anyugun ka zoshü. “Ngun le Sunggigü kapu le age kebin Josef hi nyeki thame temi gwakvu kethyü hyu keloi mvu.” 39Tson-o raja gü le Josef ka zoshü, “Sunggigü le hi aphu pe n hishü laso, lo nle kechanyu aphu nyeki nsü lo thasha kvu tsen tsü laso. 40Tsügenyu ale nno akazükentsen gü thyüo temi aphu no nle ahza khikeshü zenti. N kekvu no asi kagü thyüti. 41Ale ntsoka n lope Ijipt aphu so Ahng gü thyü laso.” 42Tson-o raja gü le a-zenkoro ka raja mehor le kebin benkhin tho pe Josef zenkoro ge rün shü, A-le linen mirün ketseyho pe a-nben shü, lo suna kerasü pe a-nlu shü. 43A-le raja gari kenyhun gü ge a-no dunlo, lo a-kerühvu rikhun nyu le a-mhundyü ri nrao, “Tson phashü! Tson phashü!” Tsühontse Josef pe Ijipt aphu so Ahng thyülo. 44Raja gü le Josef ka zoshü, “Ale raja gü- lo Ijipt aphu nyu temi nme no nka shün mvutse a-pha nmvue a-ben penso shü loho.” 45-46A-le Josef zan pe Ijipt nyu khwe ki Zaphenath Paneah thoshü, lo Heliopolis nyida nyu püshükeda gü Potiphera nyugi Asenath pe a-nu thyü shü.
Josef le chen shenryü ka Ijipt raja gü lothyü so. A-le raja ka nken-o kazü aphu so njwen. 47Chen tsenyü kesükela thyü tsü gwenkho ka kazü günyu shye kechon hyulo, 48tsü aphu Josef le kequen pe nyida dan ka shü lola. Nyida nmeme ka a-le tsü tekehun ka low nyu shye kequen pe bin la. 49Shye le chonri tsin-o Josef le shye ndo mvula- tsüle züri seka hachon hontse la.
50Chenda le keryü mhundyü Josef le Asenath au nyu peche mihvu le bin. 51A-le zoshü, Sunggigü le athyü pe ano akenyü kethyü lo apvü kami aphu nmhin laso; tson-o a-le a-nyuri gü zan pe Manasseh tholo. 52A-le zonio, “Sunggigü le ale kenjün thyü kehü kazü ki ntsenyu pe atsü shüle,” tson-o a-nyu kenyhun gü pe Efraim tholo.
53Chen tsenyü kesükela thyüo Ijipt le shekerhün thyü kelo gü tsüle a-keni thyü ryüla, 54lo chen tsenyü chenda gü le ryü la Josef le zokeshü hontse. Tsüka chenda le kazü kecha aphu nyu bin la, ai Ijipt aphu nyu ketyüketsü le bin. 55Ijipt nyu le nnyo kelo ka, anyugun le nrao raja gü ka ketyüketsü hiso. Tsügenyu a-le anyugun no Josef ki gü a-le anyugun ka nyuzo shüyo thyü lolo tse ahza hoshü. 56Chenda gü le shvukvu-o kazü apentha nyu gunla, tsügenyu Josef le kenya ka dan aphu khinsheo shye pe Ijipt nyu ka jwen. 57Kazü aphu nyu temi le Ijipt ki ryüo Josef ka shye hei, kechamvule lihi ka-e chenda thyüsa kela genyu.
Currently Selected:
BINZEN 41: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
