BINZEN 42
42
Josef Tsanyu le Shye Hei titse Ijipt ki Kegü
1Ijipt ki shye le kebin Jakob le shakelo ka, a-le a-nyudan ka zoshü, “Hagun le nyuthyüo tha peha thyü mvula? 2Ijipt ki shye le kebin ale nyülo laso; ngun khünsi lamvu nrün genyu gü tsü ki shye peha hei pfü ryülo.” 3Tson-o Josef tsanyu min tseryü dan le shye hei titse Ijipt ki gü, 4ai Jakob le Josef sikezen gü Benjamin nipe anyugun zen gü mvu, a-no lile hile tse kela kenshvu genyu.
5Kanan kazü nyu chenda thyü kela genyu Jakob nyu dan le ke chanyu zen shye hei ryü. 6Tsüka Josef le Ijipt kazü nyu Ahng thyüo shye pe kazü nyu temi aphu ka jwen bin. Tsügenyu Josef tsanyu ju le ryü a-mhundyü nyu nkhün tsü gü kazü rün shü. 7Josef le a-tsanyu ju hyu keshü ka anyugun shala, ai a-le anyugun shakemvu rothyüla. A-le a-jo nkhon-o anyugun ketsoshü, “Hagun le diki ryüla?”
Anyugun le a-jo kenio, “Agun le ketyüketsü hei titseo Kanan ki hüo ryü le.”
8Josef le a-tsanyu ju shabin-e, anyugun we a-shalomvu. 9A-le anyugun nmin kethyü a-min tsü rüchünlo-o zoshü, “Hagun le rüzü nyu le; agun kazü nyu dikon ka kvukemvu le bin yo fü ryü bin nle.”
10“Nmvu, kedagü,” tse anyugun le a-jokenishü. “Agun le ndo nyu thyü, shye hei titse ryüle. 11Agun aphu tsasikezen nyu. Agun le rüzü nyu kemvule kedagü, agun le temi kepütsü nyu le.”
12Josef le anyugun ka zoshü, “Nmvu! Agun kazü nyu dikon ka kvukemvu le bin yo tse hagun le fü ryü bin nle.”
13Anyugun le zoshü, “Agun aphu le tsasikezen min tseryü kenyhun le, kedagü, agun le Kanan ki temi nme nyu. Agun sikezen nyu nme le sila, lo ntsoka nchetsin gü le agun Pvü zen bin nyo.”
14Josef le zoshü, “Ale zokeshü hontse hagun le rüzü nyu so.” 15Hihontse hagun le ketsin zobin le nmvu yo shwiti. Ale raja gü zan sen-o swe bin nle hagun sikezen gü le hika ryü kemvu we hagun le tinlo nrün ndi. 16Hagun nme le gü a-zen ryülo. Lo a-sen ju le hagun le kezo tsüle ketsin le mvuyo shalo kemvu ka we meno hagun khwe bin tse ti. Kemvu we raja gü le rhün kehü hontse hagun le rüzü nyu laso. 17Tson-o a-le anyu pe jonshen doka nyu shüla.
18Jon shen nyü Josef le anyugun ka zoshü, “Ale Sunggigü nshvu kehü nme, lo ale thakon me ka hagun keyhun nrho shüti. 19Hagun le joketsin zohü tse shalo nrün genyu, hagun nme le hagun pe shü kethyü doka günyu binlo: lo hagun kechanyu le hagun le hei kelo shye pfü hagun kami le khün kebin dan ki gun lo. 20Tson-o hagun le hagun sikezen nchetsin gü zenryü atsü mvu loshvu. Hile hagun le ketsin zobin nyo tse kethyü shalo-o, ale hagun boshvula loho.”
Hile anyugun kendo la, 21tson-o khinyu nyu ka zoshü. “Ele, ngun le ngun sikezen gü ge thyü keshü chün ntsoka we kenjün thyü bin laso; a-le kenjün thyü sao ngun no a-cheshü lotse hi, ai ngun le nyüshü mvula. tsügenyu ngun le ntsoka we kenjün kethyü hinyu bin laso.”
22Reuben le zoshü, “Ale hagun no ntsenyu gü nthyünnyü nyalo tse ai hagun le nyümvu kela le. Ntsoka we ngun le a-si pu tho bin laso.” 23Anyugun le nyuzo bin yo Josef le shabin, ai anyugun le tsüshamvu, anyugun le meno anyugun jo penkelao azen kenthon kebin genyu. 24Josef le anyugun khelao gü chü tinla. A-le jozo nilo ntsin ryü anyugun mhundyü nyu Simeon tenlo-o phin lola.
Josef Tsanyu jule Kanan ki Ranikeryü
25Josef le shye pe a-tsanyu ju khvü thyüshü, lo anyugun pisa pe anyugun nmeme phenu mün ka shü nila, lo kenjwen tson nyu ketyüketsü pe tsüshü lo tse ahza hoshü: Hihontse thyüshü. 26A-tsanyu ju le anyugun le hei kelo shye pe gada khvü thyü lo-o tsonchü shüla. 27Kheje gwün anyugun kensen bin ka anyugun nme le a-gada chvü thyü titse a-phenu shwü gü laryü a-pisa le a-phenu mün ka bin-o hyulo. 28Tsüselo a-le a-tsasikezen nyu ju ko-o, “Apisa rani pe atsü la sele, tsü le aphenu nyu bin nle!” Anyugun nyunkenjün thyü lo nshvuo khinyu ka, “Sunggigü le ngun ge nyuthyü shü bin la sela?”
29Anyugun le ryü Kanan ki anyugun Pvü Jakob ka, nyuhontse thyü layo aphu pe zoshü. 30Ijipt nyu Ahng güle a-jo nkhon lo agun le a-kazü rüzü ryü bin nle tse agun nmu hüle. 31Agun le a-jokenio, “Agun le rüzünyu kemvu, agun le temi kepütsü nyu. 32Pvü me nyu le agun peche min tseryü kenyhun. Agun sikezen nyu nme le sila so, lo nchetsin gü le Kanan ki agun pvü zen bin zun le. tse shü. 33Temi güle zoshü, ‘Hagun le temi kepütsü nyu le nmvuyo ale shalo gwa: Hagun temi nme le azen bin tinla, lo a-sen dan le shye pfü gü khün kebin hagun kami dan tsüshü. 34Tson-o hagun sikezen nchetsin gü zen tsüryü a-tsü shülo. Tsonya tselo hagun le rüzü nyu kemvu ai temi kepütsü nyu tse ale sha loti; lo ale hagun tsagü zen niryü hagun tsüshü ti, tson-o hagun le hinyu bin-o hathyü logwa.’ ”
35Lo anyugun aphu anyugun phenu shwü gü laryü, anyugun phenu ka anyu pisa hyuni kü lola: lo anyugun le pisa hyukelo ka anyugun lo anyugun Pvü Jakob ko nshvu la. 36Anyugun pvü le anyugun ka zoshü, “Hagun le ano anyenyu a-phu nmhe lanyü bin ole? Josef ndi laso; Simeon ndi laso; lo ntsoka hagun le Benjamin zennilo nyü bin le. Ale kenjün thyü laso!” 37Reuben le a-pvü ka zoshü, “Keshanyu laka ale Benjamin zen niryü nkishü mvulo nle anyu peche hu boshvu lalo. A-khipe aben nyu shüla lo, lo ale a-zen niryü lati.”
38Ai Jakob le zoshü, “Anyu no hagun zen gü lo kemvui le; a-tsagü le silao a-npfü laso. Tson nenyu tha peha le a-ge ryü la-e logwa. Ale kethen nyu so, lo hagun le nyungwakemvu pe age shüo ale sila ti.”
Currently Selected:
BINZEN 42: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
