BINZEN 43
43
Josef tsanyu Jule Benjamin Zen Ijipt Ki Ranikeryü
1Kanan nyu chenda thyü sala, 2lo Jakob nyu kaminyu le Ijipt ki pfü keryü shye aphu tyü lobu kela ka Jakob le a-nyudan ka zoshü, “Ni tsügü ngun genyu shye keshanyu hei lolo,” tson shü.
3Juda le a-ka, zoshü, “Temi gü le agun le agun sikezen gü zenryü kemvu we a-mhundyü nyu ryülo nrün ndi tse agun ka zotsen tsü shü laso. 4Tsügenyu agun sikezen gü no agun zen gü tiya tselo agun le gü ngenyu shye hei ti. 5Ai nmvuya tselo agun le gü kemvui le, kechagenyumvu le agun sikezen gü zenryü kemvu we agun no a-mhundyü nyu ryü loho letse temi gü le agun ka zoshü laso.”
6Jakob le zoshü, “Nyuthyüo hagun le temi güka hagun sikezen nyu kecha le binzun letse shüo ano anyunkenjün thyü sa hü nla?”
7Anyugun le a-jokenishü, “Temi gü le ngun lo ngun kaminyu rüla ketso-o, ‘hagun pvü le rhün bin zunle? Hagun sikezen nyu kecha le bin le ndila?’ Tsonlo kela genyu, agun le a-jo kenishü mvulo nrün ndi la le. Agun no agun sikezen gü zenryü lotse zo ti ado tse agun le dihontse shalo mon?”
8Juda le a-pvü ka zoshü, “Ntsenyu gü pe athen shüta, lo agun le gwen tse gü lati. Tsonlo ngun nme-e khensi la loho. 9Ale a keyhun pe shüti, ale a-khvü pfüti. Ale a-no gwasherhün-o zen niryü nkishü mvuya tselo, kemu gü tsü ale pfüti. 10Agun le khwenthon ri tinla mvuya tselo hile gwenhvu ge güo ryü kelai so.”
11Tsüselo anyugun pvü le a-nyu ka zoshü, “Tsonya tselo, n kazünyu hyukelo kegwatsin pfü gü jwe thyüpe Ahng tsülo: terasha kenko keshanyu, khuzü keshanyu, güsen, pistachio tsonkhü, lo almond tse khilo. 12Lo pisa ko jünhvu khilo, kechagenyu mvule himhundyü pisa rani pe hagun phenu mün ka shü kela tsüko khilo mvu loshvu. Shamvuo khishüla bin-e logwa. 13Agun sikezen gü zen güo whütse rani ryülo. 14Kekvutsin Sunggigü no temi gü thyü pe no hagun njün shüo no Benjamin lo hagun sikezen kecha gü rani pe hagun tsü shüla nda. Agenyu we, ano anyenyu nmhen mvulo shvu yatselo ale tsüdan nmhen lati.”
15Tson-o anyugun le jwe khilo lo pisa jünhvu pfülo njio Benjamin zenlo-o Ijipt ki gü titse tsonchü shü. Tsüki anyugun le Josef mhundyü nyu gü. 16Josef le Benjamin le anyugun zen kehü hyushüo, a-ka ntsen kehü go gü ka zoshü, “Temi hidan zen aka kiryü lo. Anyugun le nhenyu azen-o tyütsü ti, tsügenyu senru nme dushvuo ndonronlo.” 17Go gü le a-ka zokeshü hontse thyülo-o tsasikezen dan zen a-ka kiryü.
18Anyugun zen ka kiryü kelo ka, anyugun le nshvuo, “Kerigü ka pisa rani pe ngun phenu ka shükela genyu ngun zenryü bin tiso, tse rüchün bin. Anyugun le whütse ngun when-o ngun gada sülola lo ngun no a-do thyü tiso,” tsonbin. 19Tson-o khenpfü ka anyugun le gonyu dan kentsen gü ka zoshü. 20Kedagü, “Agun le shye hei titse himhundyü ki gwen gwa hika ryüle. 21Lo agun phenu shwü gü laryü nme me tse a-pisa le a-phenu mün ka bin-o hyukü lo. Tsügenyu agun le ntsü titse sen niryü bin nle. 22Lo shye hei nilo titse pisa kerüche kecha ko pfüryü bin nyo. Segü le agun pisa ranipe agun phenu ka shü layo agun le shamvu.”
23Go güle zoshü, “Nyun le honya. Nshvunya. Hagun Sunggigü, hagun pvünyu Sunggigü le hagun genyu pisa gü khipe hagun phenu nyu shüla tsentsü. Hagun le a-min thyü keshü ale khilo laso.” Tson-o a-le Simeon zenryü anyugun kishü.
24Go gü le anyugun zenryü kaki shü. A-le zü khishü anyugun no anyu pha süla, lo a-le anyugun gada chvü thyüshü. 25Josef le nhenyu gunryü lo anyugun le jwe pe a-tsü titse ndo bin, kechagenyumvu le anyugun le a-zen tyütsü titse kebin pe anyugun ka zokeshü genyu. 26Tson-o Josef le ka kiryü laryü, anyugun jwe sen a-kaki gü a-mhundyü nyu kazü ka nkhün tsüla. 27A-le anyugun le gwasherhün bin le nmvuyo ketsoshü, tson-o, “Hagun le a-rüla pe aka zokehü hagun pvü le gwa bin nle? A-le nthu keti gwasa tse yhun bin nmon?”
28Anyugun le a-jokenishü, “Agun pvü, ngo gü le nthu keti gwasa tse yhun bin zun le.” Tson-o anyugun le a-mhundyü nyu khosen lo-o nkhün tsüla.
29Josef le a-sikezen gü Benjamin hyu shüo, “Hile hagun le aka zo kehü hagun sikezen nchetsin güle.” “Anyu gü Sunggigü no jochü pe ntsülo,” tson zoshü. 30Tsonshüo Josef le whütse tinla, kechamvule a-sikezen gü rüchün pe njün ho ritsin kela genyu. A nyugwamvu ritsin-o a-tsen ki yügü chü tinla. 31Tsüsiki a-mhun sülao chwiryü, a-kekheni lo njüo, ketyüketsü pe anyugun tsüshü lotse zoshü. 32Josef le miz nme ka lo a-tsanyu ju le miz kecha nme ka tse bin-o tyütsü. Ijipt temi tsüka tyütsü kebin nyu ketyüketsü kecha thyü, kechamvu le anyugun le Ibrinyu zen tyütsü kethyü tsüle tsenyo kethyü hontse rüchün kehü genyu. 33A-tsasikezen dan no miz hun-o peshü tsin ka gü nche gü keti nche peshü thyü dun-o Josef ntsun bin. Anyugun no dihontse dun bin yo hyu kelo ka khinyunyu nrishüo anyugun dun thyüla. 34Josef miz ge ketyüketsü senryü anyugun tsü, lo Benjamin jün le anyugun kechanyu jünpvün chonkvu. Tson-o anyu gun le Josef zen-o tyütsü nze lo kemvuthen tyütsü.
Currently Selected:
BINZEN 43: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
