BINZEN 44
44
Honpen nmhen kela
1Josef le a-ka ntsen kehü go gü ka zoshü, “Shye temi dan le pfülo kegwa kho pe anyugun phenu thyüshü, lo anyugun nme me tse pisa pe anyu phenu mün ka shü lalo. 2A rakagi honpen lo a-shye min pisa kesin pe nchetsin gü phenu mün ka shüla.” Tsü genyu a-le a-ka zokeshü hontse thyü shüla. 3Lonyü nshwe tsasikezen ju lo anyugun keru dan nishüla. 4Anyugun le nyida gü nken-o kethon gü kemvu ka, Josef le a ka ntsen kehü gogü ka zoshü, “Whütse temi tsüdan then gülo. Tson-o anyugun hü lolo, ‘Mele thakegwa thyüshü lo nyuthyüo gwakemvu thyü pe kethun hü nla? 5Nyuthyüo hagun le a npugü rakagi honpen rühu lola sela? A-le tsünyu a-hon shü tsü hü, lo a-le tsü sen-o teronyu nthon hü. Hagun le kemu keda thyü laso!’ ” tsonshülo tse shü.
6Go gü le anyugun hü kelo ka jo higü zoni nishü. 7Anyugen le a-jokenishü, “Kedagü nle nyuthyü hihontse zobin nla? Agun le tsühontse thyümvu letse swe bin nle. 8Agun le Kanan kazü ki agun phenu mün ka hyukelo pisa senni keryü nle sha bin nyo. Tsonya tselo dihontse agun le n npugü kanyu rakagi nmvue suna rühu bin tila? 9Kedagü agun nme le tsü rühu lo kela hyulo ya tselo a boshvu lati, lo agun a-sen dan le ngo thyü tin lati.”
10A-le zoshü, “Akendo; ai honpen gü khilo kela gü nti ago thyüti, lo hagun kechanyu we hagun kesha thyü tin logwa.” 11Tson-o anyugun le whütse anyugun khvüshe-o nmeme tse a-phenu shwüshü. 12Lo Josef go gü le fü petsü sa gun, Püshütsin gü ka binzen lo n chetsin gü ki a-kenithyü, tsontsin Benjamin phenu ka honpen gü hyulo la. 13Tsüselo a-tsanyu jule anyugun nyungwamvuo anyu phi sürhen-o gada dan khvüthyü lo-o nyida gü nyu rani ryü.
14Juda lo a-tsanyu ju le Josef ka ki ryü laryü a-le tsüka bin zun. Anyugun le a-mhundyü nyu nkhün tsüla; 15lo Josef le, “Hagun le nyuthyüla sela? tse zoshü. A hontse kethyü nyu le teronyu nthon-o hagun ten lola gwa tse kethyü hagun le shamvu ole?”
16Juda le a-jokenishü, Kedagü, “Agun le nka nyu zo semon, Dihontse nzen kenyi lomon, Dihontse agun zo njü lomon? Sunggigü le agun kemu khishwi shü laso. A khvünyu honpen hyu kelo gü ntimvu ai ntsoka we agun aphu ngonyu so.”
17Josef le zoshü, “Nmvu! thame ka-e tson loho! A honpen khilo kela gü nti ago thyüti. Hagun kechan nyu le gwasa tse hagun pvü ki rani gülo.”
Juda le Benjamin Genyu Shwikenjün Kehi
18Juda le Josef ki gü a-ka zoshü, “Kedagü, ncheno-e ano nka zoshülo. A ge nnyunta lanya; nle raja gü hontse so. 19Kedagü, nle agun ketso-o, ‘Hagun pvü le bin le, nmvue hagun sikezen nyu kecha le bin le?’ tson keshü genyu. 20Agun pvü le bin le, a-le then laso, lo a-kethen ki nnyu kelo agun sikezen gü le bin nle tse shü. Ntsenyu gü a-tsa le sila, tson-o a-jvü nyu kenyu le a npfü yhun bin nyo, lo a-pvü le a-so sahü. 21Tsoshü laryü, ‘Kedagü agun no a-zen hiki ryüo, nle a-nri shü tile tseshü,’ 22tsüka agun le, ‘Ntsenyu gü le a-pvü kheshü keloi mvu; a-le tin lalo a-pvü le sikelai letse nka zoshü.’ 23Tsontsin nle, ‘Hagun le hagun sikezen gü zenryü kemvu we hagun no a mhundyü nyu ryü loho,’ tse zola.
24“Tson-o agun le rani agun pvü ki kegü ka agun le njo pe a-ka zoshü. 25Lo a-le agun no niryü shye keshanyu hei lolo tse zokeshü ka. 26Agun le a-jokenishü, ‘Agun le gü keloimvu; agun sikezen gü le agun zen gü kemvu we agun no temi gü mhundyü nyu gü kemvui le tsonshü. Agun sikezen gü ko gü yatselo agun le gülo kegwa nti le.’ 27Tsonkeshü ka agun pvü le agun ka zoshü, ‘Anu rachel le peche mihvu nti nnyu pe atsü. 28Tsüka nme le akhe laso. Tehenthyü le a-süthürü la kethyüi so, a-le tin kela siki ale a-hyu nimvu kela genyu. 29Lo ntsoka hagun le higü hi zen güo lihi thyüla yatselo, hagun le nyungwa kemvu senryü a kethen ki aboshvu lati,’ tsonshü le.
30-31Juda le zo-o, “Kedagü,” “Ale ntsenyu gü zen mvutse rani apvü ki gü yatselo, ntsenyu gü le azen hü kemvu a-le hyu shü nyemhun si kelai le. A-keyhun le ntsenyu gü rüchün-o yhun kebin nti, lo a-le thensa laso, tsügenyu tsüle a-boshvu kelai le. 32Tsü nyeki, ale ntsenyu gü genyu apvü ka akeyhun zoshü bin nyo. Ale a-ka ale ntsenyu gü zen niryü a-tsümvu yatselo arhünthen ale kemu tsü pfüti tse zo njü. 33Tsügenyu, Kedagü, ale ntsenyu gü sun ka hiki bin-o ndo thyütin lati; lo a-no a-tsanyu ju zen rani gun lolo. 34Dihontse ale ntsenyu gü zenmvuo rani apvü ki gülo tila? Kenjün kethyü le apvü ge keryü ale nyhen keloi mvu le.”
Currently Selected:
BINZEN 44: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
