BINZEN 45
45
Josef le a-tsanyu Ju no A-shakelo
1Josef le a-khoka kebin nyu dan mhundyü a-kekheni loha lao, anyugun aphu no tin la lotse nila. Josef le a-le segü yo pe a-tsanyu ju ka zokeshü gwenkho ka temi nme no bin mvu. 2A-le nra chü keshü Ijipt nyu le nyülo, lo jolo tsü sengü raja gü kaminyu-e no shala. 3Josef le a-tsanyu ju ka, “Ale Josef le. A pvü le yhunbin zunla?” tsonshü. Ai a-tsanyu ju le johi nyü lo ntsin, anyugun kerüshvulao thame zolo mvula. 4Tsüselo Josef le anyugun ka, “Hagun cheno-e akho nni ryülo.” Tson-o anyugun le ryü laryü, a-le, “Ale hagun sikezen gü Josef, hagun le jwe pe Ijipt ki shü kela gü tsüle. 5Ntsoka we hagun le ajwe pe hiki shü kela genyu hagun nyun gwamvu nmvue hagun npfü hagun nmu bin nya. Temi keyhun ronzin kenishü nrün genyu Sunggigü le hagun mhundyü anishü la ketsin le. 6Kazü günyu chenda le hi chenhvu gü ntizun; ntsi shümvu nmvue logvü mvu nrün chen pvün le bin tizun. 7Sunggigü le ndun kethyü tson hinyu hagun ntsenlo, lo hagun lo hagun tsipwen no rhün bin lo tsentsü nrün genyu hagun mhundyü a nishü laso. 8Tsügenyu hagun le mvu le Sunggigü le a nipe hinyu shütsin thyü shü le. A-le a khipe raja gü hensin keda tsin gü thyüshü laso. Ale a-lojvü apentha kentsen gü; Ale Ijipt aphu so keda gü thyü bin nyo.
9“Whütse gun gü a pvü ka, a-nyugü Josef le hihontse zobin nle tse zoshülo: ‘Sunggigü le athyüpe Ijipt aphu sa keda thyü bin nle; ntsüla nya-o aki ryülo. 10Nle Goshen lojvü nyu yhun-o akhoka bin logwa- nle nnyenyu, ntsunyu, ntanyü, nnyü, nthu lo nle kebin lihi-e yhun lo gwa le. 11Nle Goshen ka bin ya tselo ale n nucha loti. Chen pvün chenda thyüni tizun; lo ale nno n kami lo nsenru zen-o khün bin nyümvu.’ ”
12Josef le zo-o, “Ntsoka we hagun aphu, lo Benjamin nko ale Josef ketsin tse hyu bin nyo. 13A pvü ka ale hiki Ijipt nyu dihontse kvusa bin nyo, lo hagun le hyukela lihi-e pe zoshülo. Tson-o whütse a-zen hiki ryü lalo.”
14A-le a-sikezen gü Benjamin thün pen-o chü sola; Benjamin ko a-süra pen-o chü. 15Tson-o a-le a-tsanyu ju nmeme gwenlo-o chüo anyugun nbo küshü. Tsüsiki nyu a-tsanyu ju le a-nthon so.
16Josef tsagüsikeezen ju le ryübin nle tse kethyü rüla Raja lo a-hensin kedanyu dan le shalo njüo anyugun sherhün la. 17Tson-o ale Josef ka, “Ntsagüsikezen ju no anyugun nyukhu dan khvü thyülo-o Kanan ki rani gunlo. 18Anyugun no anyugun pvü lo anyu kaminyu zen-o hiki rani ryülo. Ale Ijipt nyu kazü kegwatsin pe anyugun tsüti, lo anyugun le kesükela thyü yhun logwa le. 19Lo anyugun no anyu nunyu dan, anyugun nyenyu keshe dan lo anyugun pvü pfülo nrün genyu Ijipt ki Gari dan sen lo. 20Anyugun no anyu hon khe kela genyu nyun le hanya; Ijipt nyu kegwatsin apentha anyugun hon thyüti.”
21Jakob nyenyu ju le anyugun ka zokeshü hontse thyülo. Raja gü le zokeshü hontse Josef le gari dan lo tson nenyu anyugun ketyü ketsü khishü. 22A-le phinya kelu lo nrün ko pe anyugun nmeme tsü, ai Raka tsishen lo phinya kekelu pvün pe Benjamin tsüshü. 23A-le Ijipt nyu hyulo kehü thakegwatsin pe gada tseryü khvü thyüshü, tensü pe gada tseryü khvü tse nipe a-pvü tsü lo tson nenyu ketyü ketsü ko ndashü. 24A-le a-tsasikezen ju nishüo anyugun le tin kejü ka, “Tson nenyu kega nya nye,” tsonshü.
25Tson-o anyugun le Ijipt nken-o Kanan ki anyugun pvü Jakob ki rani ryü. 26Anyugun le a-ka, “Josef le rhün bin zun, A-le Ijipt sa kedagü thyü bin nle!” tsonshü. Jakob le a-dun thyüo, anyugun jo tenyen lo nrün ndila.
27Ai anyugun le Josef le anyugun ka kezo jo aphu pe a-ka zoshü, lo Josef le a-pfüo Ijipt ki gü nrün genyu gari nikeshü dan hyulo ntsin, a-kerü kela nyu tsü gwani lo. 28Tson-o a-le, “Anyugü Josef le rhün bin zunla!” “Gwaritsin so! Ale sikemvu ka gü a-hyu shüti.”
Currently Selected:
BINZEN 45: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
