BINZEN 48
48
Jakob Le Jochü pe Efraim lo Manasseh Ketsü
1Tsüsiki a-pvü le hobin nle tse mele Josef ka zoshü. Tsü genyu a-le a-nyu Manasseh lo Efraim au zen Jakob teno ti tse gü. 2Jakob ka a-nyu gü Josef le ashwishü titse ryü kebin rüla zoshü ntsin, a-le a-yhenthyü soryü a-zhü ka dunlo. 3Tson-o Jakob le Josef ka, “Kekvutsin Sunggigü le Kanan kazü nyu Luz ka ayhühyu thyüshü lo jochü pe atsü. 4A-le aka, ‘Ale nnyenyu kechon pe ntsüti, tson-o n tsipwen no senye kechon thyüti; lo ale kazü higü pe n tsipwen tsüo anyugun no pe kethonthen anyu hon thyüti.’ ”
5Jakob le, “Josef ale hiki keryü mhundyü Ijipt nyu nnyu pe nketsü nnyu peche hvu tsüle ahon le; Efraim lope Manasseh au le anyu Reuben lope Simeon au zen kenme. 6Nle nnyu peche kecha binsin yatselo, tsü lope anyu letse kemvui; anyugun le gwen lo nrün tsüle Efraim lo Manasseh ge ryüti. 7Njvü Rachel genyu ale hi thyüshü bin nyo. Ale Mesopotamia ki raniryü kejü ka, Kanan kazü nyu Efrath zen nithen kemvu ka a-le sila-o ano anyun gwamvu sale le. Tson-o ano Efrath ki kegü tson teka a-sunla.” (Efrath tsüle hizonka Bethlehem tse hü.)
8Jakob le, Josef nyuhvu hyushüo, “Hile dikipon nyu ola?” tson ketsoshü.
9Josef le, “Hihvu hile Sunggigü le hiki Ijipt ki pe aketsü anyu,” tsonshü.
Jakob le, “Zen aki ryülo, ale jochü pe au tsü tile.”
10Jakob le püshü kela genyu a-yhütyü zenla, tson-o ale tha hyu petsü mvula. Josef le au zenryü a-kishü lo a-le au gwenlo njüo au nboshü. 11Tson-o Jakob le Josef ka, “Ale n hyuni kelo rüchün bin mvu laryü ntsoka we Sunggigü le ano nnyue hyu laso.” 12Tsüselo Josef le a-pvü din ka au zen lola-o a-mhundyü nyu nkhün tsügü kazü rün shü.
13Josef le Efraim pe Jakob ngwazin lo Manassehh pe a-nzhü zin tse shüshü. 14Ai Jakob le a-ben kerio, a-ben nzhüzin pe Efraim le nche güe tsügü pe gü shü, lo a-ben ngwazin pe a-püshü gü Manasseh pe gü shülo. 15Tson-o jochü pe Josef tsüo:
“A pvü Abraham lo Isak le a-lothyü kehü
Sunggigü no jochü pe ponyu hihvu tsü nda!
Nthu keti atsontsin keryü Sunggigü no jochü pe au tsülo!
16Kenjün kethyü aphu nyu, akeni keshü tsanggelonyu
gü no jochü pe au tsülo!
A zan, apvü Abraham lo Isak zan no ponyu hihvu
ge rhün hü lo nda!
Au no ntsenyu kechon lo au tsipwen no bin lolo!”
17Josef le a-pvü le a-ben nzhüzin pe Efraim pe ge shü kebin hyushüo a-kenyümvula; tsügenyu a-le Efraim pe ge shükebin a-pvü ben khikela pe Manasseh pe ge shü. 18A-le a-pvü ka, “Tson mvu, apvü. Higü le püshü gü; nben nzhügüpe a-pe ge shülo.”
19Tsontsin a-pvü le nmvu le tseo, “Ale shabin nle, anyu gü, ale shabin nyo. Manasseh tsipwen ko temi danda nme thyüti. Ai a-sikezen gü le anyeki gon kvuti lo a-tsipwen le senye kedada thyüti.”
20Tson-o tsünyü a-le jochü pe au tsüo, “Israel nyu le jochü pe me ketsü ka hai zan senti. Anyugun le, ‘Sunggigü no nthyü pe Efraim lo Manasseh hontse shülo,’ ” tsonzo hüti. Hihontse Jakob le Efraim pe Manasseh mhundyü shüla.
21Jakob le Josef ka, “Ale sigü jü kela nle hyu binnyo, ai Sunggigü le nzen hüti lo nzen nigü nbon nyu kazü gü nyu shüti. 22N tsasikezen ju mvule, ale Shechem tsüpe ntsü bin nle, lojvü kegwa tsügü tsüle ale jenthon lo levü sen-o Amor nyu hon khilo.”
Currently Selected:
BINZEN 48: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
