BINZEN 47
47
1Tson-o Josef le a tsanyu ju minpvün zenlo njüo raja gü ki gü. A-ka, “A pvü lo a tsasikezen nyu ju le Kanan ki anyugun tanyü, anyugun thu dan lo anyu hon aphu zen ryü bin nle. Lo anyugun le Goshen lojvü nyu hünyo.” 2Tson-o a-le atsanyu ju pe raja gü hishü. 3Raja gü le anyugun ka, “Hagun le nyutho thyü kehü nyu la?” tsonshü.
Tsontsin anyugun le, “Kedagü, agun le agun bon nyu dan hontse tanyü kekhwe nyu le. 4Kanan kazü ki chenda le gwamvu salao agun senru genyu tehen ndi la-o, agun le kazü higü nyu yhun ti tse ryü bin nle. Tsügenyu agun no Goshen lojvü nyu yhun lo ti mon tse nka shwikenjün hi bin nle.” 5Raja gü le Josef ka, “N pvü lo n tsasikezen ju le ryü laso, 6Ijipt kazü le anyugun hon. Anyugun no kazü kegwatsin Goshen lojvü nyutsü binlo. Lo anyugun dan nyu thathyülo kekü min ligü higü binlo no asenru dan kentsen gü thyülo.”
7Josef le a-pvü Jakob zenryüo raja gü teno shü. Tson-o Jakob le jochü pe raja gü tsüshü, 8lo raja gü le a-ka, “Nle chen dikho la sela?”
9Jakob le, “Akenjwen keyhun le chentsio shenryü laso. Chen tsüdan le rho lo gwamvu, abon nyu ju kenjwen keyhun hontse thon mvule.” 10Jakob le jochü pe raja gü tsü shüo tinla. 11Tson-o Josef le raja gü le zokeshü hontse a-pvü lo a-tsasikezen ju no Rameses nyida gü khoka Ijipt nyu kazü kegwatsin ka bin lo. 12Josef le ketyüketsü pe a-pvü, a-tsasikezen ju lo a-nyu dan nyu nchetsin gü-e sin-o a-pvü, kaminyu aphu tsüshü.
Chenda
13Chenda gü le shvusa kela genyu lika hika-e ketyüketsü ndila, Ijipt lo Kanan temi dan le khün-o kvulo hala. 14Anyu gun le shye hei kethyü raka aphu Josef le kequen lo njüo senryü raja gü tsü. 15Ijipt lo Kanan nyu raka aphu nke bula ntsin, Ijipt temi dan le ryü Josef ka, “Shye pe agun tsülo! Agun no sila nyalo. Agun raka aphu chwibu laso! Tha peha thyü shülo.”
16Josef le anyugun ka, “Hagun raka ndila yatselo, hagun senru senryü lo; ale shye pe kelulo tile.”
17Tson-o anyugun le senru dan, keru, tanyü, tenyü methu lo gada senryü Josef tsü lo a-le shye pe anyugun tsü. Tsü chen a-le shye pe anyugun tsüo senru aphu kelu lola.
18Tsüsi chen anyugun le ryü a-ka, “Kedagü, agun le nkebu keloimvu, agun raka aphu ndi laso lo agun senru le nhon so. Agun min lo kazü nyeki thame ndi so. 19Agun no sila nyalo. Tha peha thyü shülo! Agun kazü no kelo min ndila nyalo. Shye pe agun lo agun kazü hei lo lalo. Agun le raja gü go thyüti, lo a-no agun kazü khilo. Shye pe agun tsüo agun no rhün bin lo lo ntsipe agun tsüo agun no lonyü shülo.”
20Josef le raja gü genyu Ijipt kazü aphu heilo la. Chenda gü le gwamvu ritsin kela genyu Ijipt nyu nme me tse aphu a-kazü jwe küla; tson-o kazü aphu raja gü hon thyü küla. 21Josef le Ijipt keniki gü kechazin keti temi dan pe donyu thyü küla. 22A-le püshükeda dan kazü nti hei kemvu gwenzin la. Anyugun le anyu kazü jwe kemvui, raja gü le anyugun shweshwi keshü sen-o yhunlo kebin genyu. 23Josef le temi dan ka, “Ale ntsoka we raja gü genyu hagun lo hagun kazü heilo laso. Hagun no pe hagun lonyu shü nrün ntsi le hika re. 24Logvü ki jün pvün ka jünme pe raja gü tsü mvu loshvu. Lo a-sen tsüpe hagun chvü thyülo, lo hagun lo hagun kami genyu ketyü thyü logwa.”
25Anyugun le a-ka, “Nle agun keyhun kenishü laso; Kedagü nle agun njün shü laso, agun le raja gü go thyü hüti.” 26Tson-o Josef le Ijipt kazü nyu logvü lolo jün pvün ka jünme pe raja gü honthyü nrün pe tejvü nme thyüla. Nthu keti tejvü higü hile tsühontse bin hü nyo. Püshükeda ju kazü nti raja gü hon thyü kemvu gwenzin.
Jakob Kehi Kenkhin Gü
27Israel nyu le Ijipt ki Goshen lojvü nyu yhun-o nnya lo yhunchvüsa chwiryü la. 28Jakob le Ijipt ki chen tseryüo tsenyü yhun, tson-o a-keyhun le chen tsio henzio tsenyü thyüla. 29A-kesi gwenkho nni ryüla ntsin, a-le anyugü Josef koshüo a-ka, “Nben hvu pe adin hvu jaka shülo njüo nle alope Ijipt ki sunla loha tse swe shülo. 30A pvübon nyu pe dika sun yo ale tsüka asun nyü bin nyo; Ijipt nyu apvü gü dika anyugun sun yo tsüka sunla lo.”
Josef le a-ka, “Ale nkezo hontse thyüshü ti.”
31Jakob le, “Nle tson titse swe lalo.” Tson-o Josef le swe la, lo Jakob le a-zhü ge bin-o chen keno pe a-tsüshü.
Currently Selected:
BINZEN 47: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
