JOHAN 14
14
Jisu Le Pvügü Ki Kegun Tson Gü
1“Hagun nyun kenjün thyü nya.” Jisu le anyugun ka zo.“Hagun Sunggigü tenyen binlo lo ako atenyen binlo. 2Apvü ka ki temi bin le kechon ki bin nyo; tsonkemvu we ale hagun ka zoshü lati atale. Kechamvule ale gungü hagun bin ndo titse kethyü genyu. 3Lo ale gungü hagun bin ndolo yatselo ale rani ryüo hagun zen-o aki gun loti; tson-o hagun ko no a kebin bin ka binlo ti. 4Lo hagun le ale gun nrün tson gü shabin nyo.”
5Thoma le a-ka, “Npugü, nle dikipon güti yo agun le shamvu; agun le nyu tsethyü tson tsügü shalo mon?”
6Jisu le a-ka, “Ale tson gü, lo ketsin gü, lo kerhünronzin gü. Age kemvu we temi nme-e Pvügü ki gunlo hümvu. 7Ntsoka we hagun le a shalo laso,” a-le anyugun ka zo, “Hagun le Apvüe sha loti, lo ntsoka gerhonyu hagun le a-sha bin, lo a-hyue laso.”
8Filip le a-ka, “Npugü, Pvügü pe agun hishü ta, tson yatselo agun sherhün tilo ti.”
9Jisu le a-ka, “Ale jon hithen laki hagun zen hüe Filip, nle a sha mvu ole? Temi lihigüe a kehyu gü le Pvügü ko hyu laso. Tsonlo nle nyuthyüo, ‘Pvügü pe a hishülo,’ tson hü nla? 10Ale Pvügü nyu bin, lo Pvügü le age bin tsekethyü nle tsü tenyen hü mvu le? Ale hagun ka jo zo kehü hile a npvü aka nyu zochwiryü mvule Pvügü le age bin-o ale A-tho thyü hünyo. 11Ale Pvügü ge bin nyo, lo Pvügü le age bin tsekethyü hagun tenyenlo nye; nmvue thatho ka gwünzin-e hagun tenyenlo nye. 12ale hagun ka zo tsentsü shüti, temi lihigüe a tenyen kehünyu le ale thyülo kehü tsü thyü loti, lo tsünye kegon-e thyü loti. Ale Pvügü ki gunzhü kelasi genyu. 13Lo hagun le azan ka tha lihi-e hilo, Pvügü no Nyugü zankechwi thyüshü nrün genyu ale tsü thyü sh'uti. 14Hagun azan nyu tha lihi-e hilo, ale tsü khipe tsüti.
Kenshün Kapu Khishüti Tse Zokeshü
15“Hagun le aso hülo hagun le ajo zen hüti. 16Lo ale Apvü ka hiti, lo A-le kethonthen hagun zen hü nrün hagun nyun thyü kesherhün shü nrün kecha nme khipe hagun tsüti. 17Lo tsüle Ketsin Kapu gü, kazü gü le a-zen kengü loho kethyü gü; kechamvule a-le tsü hyu hü mvu, nmvue shae hü kemvu genyu. Hagun we a-sha bin, kechamvule a-le hagun zen hü, lo hagun nyun nyu hü nrün genyu.
18“Ale hagun khe ketegola loho; lo ale hagun ki niryü ti. 19Jon keshanyu sika kazü hile ahyu mvu lati; ai hagun we ahyu ti; kechamvule ale rhün bin lo hagun ko rhün bin tsekethyü genyu. 20Tsünyü hagun le, ale Apvü ge bin, lo hagun le age bin, lo ale hagun ge bin tsekethyü sha loti.
21“Temi lihigüe a johokeshü shalo njüo zen kehünyu tsünyu le a kesonyu. Temi lihigüe aso kehünyu le Apvü ka teshwen pvüti, lo ale a rüla pe tsünyu hishü ti.”
22Juda (Iskariot kemvu gü) le a-ka, “Npugü, nle n rüla pe kazü gü hishü titse mvule agun hishü titse kethyü hile nyu genyu la?”
23Jisu le a-ka, “Temi lihigüe aso hülo a-le ajo zen ti; lo Apvü le tsünyu soti; tson-o agun a-ki güo tsügü zen bin ti. 24Temi lihigüe aso hü kemvu nyu le a jo zen hü mvu; lo hagun le nyülo kehü jo tsüle a jo mvule a nikeshü gü Pvügü jo.
25“Ale hagun zen bin ketseka jo hilope hagun ka zoshü laso. 26Ai nyunthukeyhun shü nrün gü, Pvügü le a zan nyu nishü titse kebin Kenshün Kapu gü tsüle, a-npvü tha aphu zo pe hagun hishü ti, lo ale hagun ka tha zo keshü tsü aphu hagun no rüchünlo ti.
27“Ale nyun kebwen khipe hagun ki shüti. Ale a nyun kebwen gü khipe hagun tsüshü ti; kazü gü le khipe me tsü kehü hontse ale khipe hagun tsü titse bin mvu. Hagun nyun keyhunkerun la loshvu, lo nshvue nya nye. 28Hagun le ale hagun ka, ‘Ale tinla ti sele tse bin so,’ lo ‘Ale hagun ki ryü ti,’ tson kezo tsü shalo laso. Hagun le a sohü lo, ale Pvügü ki gunzhü kela genyu hagun kenyü ti atale; kechamvule Pvügü le anyeki gon kethyügenyu. 29Lo tha tsü thyü nrün ka hagun no tenyenlo titse kethyü genyu, tsü thyü nrün mhundyü ale hagun ka zoshü laso. 30Ale hagun zen-o thon sari bin loho so; kechamvule kazü kedagü le ryü zhü laso; lo a-le a kipon thame kekvu ndi. 31Kazü hino ale Pvügü so hünyo, lo Pvügü johokeshü dan thyü kehü gwünzin tsekethyü shalo titse kethyü genyu.
“So-o ngun hinyu tinla je.
Currently Selected:
JOHAN 14: REGSBSI
Highlight
Share
Copy
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
