JOHAN 15

Jisu Le Vainbin Gü

1“Ale vainbin ketsin gü, lo Apvü le low ketsü gü. 2Age chwikeryü a-ro lihigüe nshalo hü kemvu gü tsü gü no nshalo mvu ketsin nila ti, lo a-ro lihigüe nshalo kehünyu tsünyu no nsha kenyelo nrün genyu tsünyu thyü kenshün shü h"nyo. 3Ale pe hagun ka zokeshü jo genyu hagun le ntsoka we nshün bin laso. 4Hagun a ge binlo, lo ako hagun nyu binlo ti, a-ro le a-bin ge bin kemvu we nshalo kemvu hontse hagun ko age bin kemvu we nsha loho.

5“Ale vainbin gü, hagun le a-ro dan; temi lihigüe age bin lo Apvü ge bin tse kehünyu, tsünyu le nshalo hünyo. Kechamvule asin mvutse hagun le thame thyülo keho genyu. 6Temi lihigüe age bin mvu yatselo, a-ro hontseo pe shwenla hü, lo mele pe mah nyu shüla hünyo, tson-o tsü rola hü. 7Hagun le age bin lo ajo le hagun nyun ka bin tselo,tha hagun kenyü hilo nye, lo tsü khipe hagun tsüshü ti. 8Hagun sha nsha chon kelo, tsüge tsü Apvü zan no chwilo ti; tson-o hagun le a sikethen nyu ketsin thyü loti. 9Pvügü le aso kehü hontse ako hagun so ryü; hagun ale hagun keso nyu bin lo. 10Lo hagun le ajo hokeshü zen bin yatselo ale Apvü johokeshü zen bin-o a-le a keso nyu bin kehü hontse hagun le ale hagun keso nyu binlo ti.

11“A kekenyü no hagun ge binlo nrün, lo hagun kekenyü no tilo nrün genyu ale jo hilope hagun ka zokeshü gwünzin. 12Ale hagun so keryü hontse hagun ko khinyunyu solo lotse kethyü ajo le hi. 13Temi nme-e a-kesonyu genyu a-phou hokeshü hinye ki keso keda ndi. 14Hagun ale hagun ka johokeshü zen hü yatselo hagun le a pvünyu so. 15Ale tsüselo hagun lope tegonyu letse loho so; kechamvule tegonyu le a-npunyu le tha kethyü sha hü kemvu genyu, ai ale hagun lope a pvünyu thyülo laso; kechamvule ale Apvü ka shakelo aphu pe hagun hishü kethyü genyu. 16Hagun le a kejülo mvu, ai hagun no gü hagun sha nshalo, lo hagun sha no binlo titse kethyü genyu ale hagun kejülo, lo hagun no alo kethyünyu thyü kelo gwünzin. Hagun no azan nyu Pvügü ki tha lihi hi-e a-no tsü pe hagun tsüshü titse kethyü genyu. 17Hagun no khinyunyu solo titse kethyü genyu ale jo hilope hagun ki shü bin nyo.

Kazü gü Le Shwi Ntsü Kethyü

18“Kazü gü hile hagun ntsüe, hagun tsüle hagun mhundyü a ntsüla tsekethyü shalo nye. 19Hagun le kazü hinyu temi yatselo, kazü hile a-npvü a-temi solo ti; ai hagun le kazü hinyu temi mvule ale kazü hinyu hagun kejülo kela genyu kazü hile hagun ntsü hünyo. 20Ale himhundyü hagun ka, ‘Tegonyu le a-npunyu nyeki gon mvu,’ tsonkeshü jo tsü rüchünlo nye. Anyugun le a nkhin lo hagun-e nkhin ti; anyugun le a jo zenlo anyugun le hagun zo-e zen ti. 21Ai anyugun le a nikeshü gü tsü sha hü kemvu genyu azan genyu anyugun le hagun ge tha seni thyü ti. 22Ale ryüo anyugun ka zoshü kemvu we anyugun le mu sari loho atale; ai anyugun le ntsoka we anyugun kemu zo kemi nikelo bin ndi so. 23Temi lihigüe a ntsü kehünyu le Apvü ko ntsüla hünyo. 24ale anyugun dan nyu temi nme nduka thyü kemvu tho thyüshü mvu yatse kethyü we anyugun le mu sari loho atale; ai ntsoka we anyugun le a-e lo Apvüe kehyu nti mvule n tsüe sin laso. 25Ai nduka anyugun jvü nyu, ‘Anyugun le a-kenrun ka a ntsü laso,’ tson kethyü thu pe bin kenjü thyü penlo titse kethyü genyu hihontse la.

26“Ai Apvü ki nipe hagun kishü nrün Nyun Thukeyhun shü nrüngü, a-kon le Pvügü kanyu chwikeryü, Ketsin Kapu gü le keryü ki a-npvü ajün zo shwishü ti. 27Lo hagun ko a-kerikanyu azen kehü genyu azan zo hünyo.

Currently Selected:

JOHAN 15: REGSBSI

Highlight

Copy