JOHAN 17
17
Jisu Le Senthyü kelonyu dan Ge Kehikethyü
1Jisu le jo hi zoshüo nyiso gü tsangge nrio zokeshü le hihontse, “Apvü tegi kevüja tsüle ryü zhü laso, Nyugü no n zan kechwi thyülo nrün genyu nle Nyugü zankechwi thyüshü ta. 2Nle himhundyü ano kethonthen kerhün khipe nle pe aben nyu shü kelanyu aphu tsü nrün genyu temi aphu so kekvu khipe atsü keshü hontse shü nye. 3Lo temi no n nti le ketsin Sunggigü tsekethyü lo nle nikeshügü Jisu Khrista sha kelo hile kethonthen kerhün le. 4Nle khipe ano thyü lotse kethyü tho tsü thyü tila njüo kazühinyu nzan kechwi thyü shü laso. 5Lo Apvü, kazü hi thyü kelo mhundyü ale nzen-o zankechwi thyü kehü gü pe ntsoka a zankechwi thyü shüta.
6“Nle kazü hinyu temi khipe aben nyu shü kela dan ka ale nzan pe tsüdan hishü laso. Anyugun le nhon, lo nle tsü khipe a tsüshü; lo anyugun le n jo zen hü. 7Lo nle khipe a tsükeshü aphu nka nyu chwiryü tsekethyü anyugun ko ntsoka we shalo laso. 8Lo nle jo pe a npvü keshü tsü ale khipe anyugun ben ka shü laso; lo anyugun le tsü shalo-o ale nka nyu ryü ketsin tsekethyü shalo so, lo anyugun le nle a nishü tsekethyü tenyenlo so.
9“Lo ale tsüdan genyu hihü nyo; ale kazü higenyu mvule nle khipe a tsüshü kelanyu dan genyu hi hünyo, lo tsüle nhon genyu. 10Lo a hon le aphu n ho, lo n hon-e a hon; lo ale tsüdan genyu zen kechwi thyü hünyo. 11Ai ale kazü hinyu bin sin loho so, lo hidan we kazü hinyu bin ti, lo awe nki ryü lati. Kenshün Pvügü, nle khipe a ketsü dan, tsüdan no nnyi hontse nme thyülo titse kethyü genyu nle n zan nyu tsüdan ntsen bin lota. 12Ale anyugun zen kehü then we, ale nzan nle khipe a tsü keshü gü zan kekvu nyu anyugun ntsenlo. Lo ale anyugun khwen ryü tilo; lo ketsin lesü jo no penlo nrün genyu nke kela nyugü nti a-me anyugun temi nme-e nkela mvu. 13Ai ale ntsoka we nki ryüla titse bin so; lo anyugun no anyugun nyun nyu a kekenyü no penlo nrün genyu ale kazü nyu kebin ka jo tsü pe zo keshü. 14Ale njo hope anyugun ben nyushü lo ale kazü hinyu chwiryü kemvu hontse anyugun ko kazü hinyu temi kemvu genyu mele anyugun ntsü laso. 15Ale nno kazü hinyu anyugun khilo lotse mvule nno serikemvu gü ben nyu anyugun ntsenlo lotse hi hü nyo. 16Ale kazü hinyu temi kemvu hontse anyugun-e kazü hinyu temi kemvu. 17Nle ketsin nyu anyugun thyü kenshünlo; njo tsüle ketsin. 18Nle a nipe kazü hinyu keshü hontse ako anyugun nipe kazü hinyu shü laso. 19Lo anyugun ko no ketsin nyu anyugun thyü nshünlo titse kethyü genyu ale a npvü a thyü kenshün sen hünyo.
20“Ale hidan genyu nti hi mvule anyugun jo nyu a tenyen kelo dan aphu genyu nka hi hünyo. 21Kechamvule anyugun aphu no nme thyülo titse kethyü genyu. Apvü, nle a nishü tsekethyü kazü hiko no tenyenlo titse kethyü genyu, nle age bin lo ale nge bin tsekethyü hontse anyugun ko no nnyi ge binlo ta. 22Lo nnyi le nme thyü kehü hontse anyugun ko no nme thyü titse kethyü genyu ako nle khipe atsü keshü zankechwi tsü khipe anyugun tsüshü laso. Tsüle a-kon le anyugun no nme thyü tilo nrün. 23Lo kazü hino nle a nishü tse kethyü lo nle aso kehü hontse anyugun-e so ryü tsekethyü shalo nrün genyu, ale anyugun ge bin, lo nle age bin lota.
24“Apvü, nle khipe a tsü keshü dan no ale dika bin yo tsüka azen kebin le a kendo, nle kazü thyü kelo mhundyü a keso genyu khipe a ketsü dan zankechwi kethyü gü tsü anyugun no hyulo nrün genyu. 25Hire, Ketsin Pvügü, kazü gü le nsha mvu laso, ai awe nsha bin; lo hidan hi we nle a nikeshü shabin. 26Ale nzan pe anyugun hishü laso, lo tsühontse pe hinishü ti, kechamvule nle pe aso ryü kethyü keso tsüno anyugun ge binlo, lo ano anyugun nyu binlo nrün genyu.”
Currently Selected:
JOHAN 17: REGSBSI
Highlight
Share
Copy
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
