JOHAN 18
18
Jisu Tenkelo
(Mt 26:47-56; Mk 14:43-50; Lk 22:47-53)
1Jisu le jo tsü zokeshü sika a-le senthyükelonyu dan zen-o Kidron züri nken gun. Tsünyu chwi nme le bin, lo Jisu le senthyükelonyu dan zen-o tsünyu gunla. 2Lo a-ten pe me ben nyu keshü gü Judas ko bin tsügü shabin; kechamvule Jisu le senthyükelonyu dan zen-o tsünyu keteno zin kehü genyu. 3Tson-o Judas le Peshükeda dan, lo Farisinyu dan ka shüpahü nyu lo Kershvuka kekhwenyu dan me zen-o teri kanyü lo mahkenbenkhin sen tse tsünyu ryü. 4Tsükatsü Jisu le a-ge tha thyü nrün tsü aphu sha-o chwigü anyugun ka, “Hagun le segü fü hü nla?”
5Anyugun le a-ka, “Nazaret Jisu.”
Lo Jisu le anyugun ka, “Ale tsügü le.”
Lo tsükatsü a-ten pe me ben nyu keshü gü Judas ko me zen hü. 6Lo Jisu le anyugun ka, “Ale tsügü tsüle,” tsonkeshü ka anyugun le tesen nio kazü nyu chetsü la. 7Tsontsin a-le anyugun ka, “Hagun le segü fü hü nla?” tson-o ketso.
Lo anyugun le, “Nazaret Jisu.”
8Jisu le, “Ale tsügü tsü tse hagun ka zoshü laso,” tsonshü. “Tsonlo hagun le afü hü yatselo, hidan no tinla rilo.” 9Tsüle kechamvule a-le himhundyü, “Nle khipe a tsü keshü dan tsü, ale nme-e nmhenla mvu,” tson kethyü jo tsüno penlo nrün genyu.
10Lo Simon Pitor le zhethon nme sen hüo sütho pe peshükedagü gogü duo a-nyetin njüzin du mhela, gonyu tsügü zan le Melka. 11Jisu le Pitor ka, “Zhethon gü khipe a-khin ka shülo la chi! Pvügü le honpen khipe a tsü keshü gü, ale tsügü tsü tsülo zümvu ole?”
Jisu Zen-o Peshükeda tsin Gü Ki Kegun
12Tsüsika tsü shüpahünyu lo tsüdan so kegon gü lo Judanyu tsonlo nyu dan le Jisu ten pe phinlo. 13Tson-o a-zen-o Anna ki ryü; tsügü le tsüchen püshükeda thyü kebin Kaifa a-mi gü genyu. 14Lo Kaifa tsüle himhundyü Judanyu dan zen-o tedo rhio temi aphu genyu mime no sikela we gwakvu letse kezogü tsü.
Pitor Le Jisu Zan Zomvukela
(Mt 26:69-70; Mk 14:66-68; Lk 22:55-57)
15Lo tsükatsü Simon Pitor le Jisu sithen hü; lo senthyükelo kechanyu nme ko hü, lo senthyükelo tsügü le peshü tsin gü zen-o shahu kethyü genyu Jisu sithen-o püshü gü kamhun tsen nyu yüla. 16Lo Pitor le kamhun chonrha ki hü. Tsügenyu peshü gü zen kesha kethyü senthyükelo kecha gü le kamhun ki chwiryüo chonrha kekhwen tenugi ka zo-o Pitor ko zen-o yüla. 17Lo tsükatsü chonrha kekhwen tenugi le Pitor ka, “Nko temi higü senthyükelonyu nme ole?”
Lo a-le zo, “Nmvu le.”
18Lo tsükatsü me gonyu lo melo kethyü nyu tse tsang le kunri kethyü genyu magi pe mah thyü shüo mah habin; lo Pitor ko tsüdan zen-o mah habin.
Peshükedatsin Gü Le Jisu Ketsokethyü
(Mt 26:59-66; Mk 14:55-64; Lk 22:66-71)
19Tsükatsü peshükeda gü le Jisu ka, a-le senthyükelonyu dan lo a-senkethyü jo tse ketso. 20Ai Jisu le a-ka, “Ale kazü hinyu zankechwi thyüshü laso; lo ale Judanyu aphu gü kehun kehü sinagog kanyu lo Kershvuka nyue me senthyü ryü, lo ale kebuo thame zo ryü mvu. 21Nyuthyüo aketso hü nla? ale meka nyu zoshü yo ajo keshanyu dan ka ketsolo chi; tsüdan le ajo aphu shabin nyo.”
22Lo a-le jo tsü zoshü ntsin a-khoka kebin melo kethyü nyu nme le a-benje pe Jisu jüo, “Nle peshükeda tsingü ka hon zo tila?”
23Jisu le a-ka, “Ale jo gwakemvu zoshülo jo gwakemvu zo hü nletse zoshü ta, ai ale jozo toshü lo, nle nyuthyüo avü hü nla?”
24Tsüselo Anna le Jisu ben phin pe Kaifa ki nishü la.
Pitor Le Jisu Zan Zomvu Nikela
(Mt 26:71-75; Mk 14:69-72; Lk 22:58-62)
25Lo tsükatsü Simon Pitor le mah habin. Tsüselo anyugun le a-ka, “Nko a-sikethen nyu nme amon?”
Tsüselo Pitor le, “Nmvu le,” tse nila.
26Lo tsüsika ko Peshükedagü gonyu nme Pitor le a-nyetin duthü kela senye nyu nme le, “Nle chwi nyu a-zen kehü ale nhyu mvu ole?”
27Ai Pitor le, “Nmvu le,” tse nila- tsontsin tero khun chwiryü la.
Pilat Le Jisu Ketsokethyü
(Mt 27:1-2,11-14; Mk 15:1-5; Lk 23:1-5)
28Tsüselo anyugun le Kaifa kanyu Jisu zen-o Ahng ka ki gunla, lo tsüle lonyü nshwen ka zun. Ai anyugun le nkenkechwi nga chvü tyükenyü genyu anyugun nrhu kela nshvuo anyugun we Ahng kanyu yü mvula. 29Tsügenyu Pilat le chwiryüo anyugun ka, “Hagun le temi higü ge nyu kera ryü la?”
30Anyugun le a-ka, “Temi higü hile temi gwakemvu nyu kemvu we agun le a-ten sen-o nki ryü loho.”
31Tsontsin Pilat le anyugun ka, “Hagun a-zen gü hagun npvü hagun jvü nyu a-ketsolo.”
Judanyu dan le a-ka, “Agun le temi nme-e boshvu kethyü agun jvu mvu.” 32(Jisu le nyusi thyüsi mvulo shvuyo tsekethyü no penlo nrün genyu hihontse kela gwünzin.)
33Lo Pilat le a-raja bin nyu yülo-o Jisu ko-o a-ka, “Nle Judanyu raja gü ole?”
34Jisu le, “Nle n npvü johi zo kehü gwünzin le me kechanyu le a rüla hi lope nka zoshü la?”
35Pilat le a-ka, “Ale Judanyu nme ole? N npvü ntemi peshünyu dan le nten pe aben nyu keshü gwünzin. 36Nle nyuthyüla se ola?”
Jisu le a-ka, “A raja we kazü hinyu raja kemvu. A raja le kazü hinyu raja yatselo, meno aten pe Judanyu ki shü mvulo nrün genyu ago dan no me zen kenren loti; ai a raja le hinyu raja kemvu.”
37Tsügenyu Pilat le a-ka, “Tsonlo nle rajanyu nme ole?”
Jisu le, “Ele, ale rajanyu le, a nnyukelo lo ale kazü hinyu yhun keryü, kechamvule ketsin gü jünzoshü nrün genyu. Lo ketsin gü kipon kehü nyu aphu a khwenyü hünyo.”
38Pilat le, “Ketsin gü tsüle nyula?”
Jisu Hülalo Tse Ahza Hoshü
39Lo a-le jozo keshü siki a-le Judanyu dan ki nichwi gü anyugun ka, “Awe a-ge kemu nme-e hyulo mvu. Ai nkenkechwi nga ka ano temi nme khipe hagun ketsü hagun jvü nyu bin; tsügenyu hagun ano Judanyu rajagü khipe hagun ketsü hagun kendo le mvula?”
40Anyugun le nra sen-o, “Temi higü mvule Baraba gü ti!” Baraba tsüle mehon seketyü nyu nme.
Currently Selected:
JOHAN 18: REGSBSI
Highlight
Share
Copy
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
