LUK 18
18
Nkehi Nyüshü Nrün Rüla Jokejvü Kenyhun
1Tsüselo a-le anyugun no anyugun tson rüzi nyao hizin binlo lotse kethyü jokejvü nme pe anyugun nthon-o, 2“Rünyi nme nyu jokera kehü Sunggigü ko nshvu hü kemvu, lo temi joe no tha letse hü kemvu temi nme le bin hü. 3Lo rünyi tsünyu tsü tenunyu maginyu nme ko bin hü, lo tsügi le a-ka ryü zin-o, ‘Nle ajün zoshüo a shwikerüchün nyu ge akhün zoshü ta,’ tson-o a-ka hizin hü. 4Ai a-le gwüngwa nme ka we nmvu letse la; tson-o kenkhin ki a-npvü a-nthon tseo, ‘Awe le Sunggigü ko nshvu mvu, nmvue temi joe no tha letse hü mvu, 5tson-e tenunyu magi higi hile ryüo a kevürilo kela genyu ale a-khün zoshü lati; tson mvulo a-le ryü zin-o a kevüri tsin lola se laryü,’ ” tson sola.
6Tsüselo Npugü le, “Jokera kehü njü kemvu güe tsühontse kehü tsü shalo chi. 7Lo Sunggigü le a-nyun thon letse-e khenyütsen keben kezün a-ka hizin kehünyu a-le a-npvü kejü kelonyu khün zomvula ti ole? 8Ale hagun ka zoshü ti, a-le a-nyun kerhün thyü sogü tsüdan khün zoti. Ai Temi Nyugü le keryü ka, tsüka kazü ketenyen le bin-o a-no hyulo tile?” tson.
Farisigü Lo Khajana Keshvugü Rüla Jokejvü
9Tsüselo a-le temi dan me a-npvü a-le kentsen nyu letseo a-tenyen lo kechanyu nkhin kehü dan me genyu a-le jokejvü higü hi zo. 10“Mihvu le kershvuka nyu hi titse nsin: Tsühvu nme le Farisinyu, lo nme le khajana keshvunyu.
11“Farisigü le solo njüo hi kethyü le hihontse, ‘Sunggigü, ale temi kechanyu, me kesüo mehon setyü kehünyu, njü kemvunyu, keyülanyu, khajana keshvu higü hi hontse-e kemvu genyu ale nshwen hü nle. 12Ale Sabbath jon nme ka gwünhvu ge tyütsü mvutse nyen-o hi hünyo; ale tha hyukelo aphu jüntseryü jünme lope hoshü hünyo,’ tson bin.
13“Ai khajana keshvu gü we kecha nme kipon bin-o nyi sogü tsangge nri loshvu tseo, a-nyun jen-o, ‘Sunggigü, nle kemunyu ahigü hi-e shwinjün shüta!’ tson. 14Ale hagun ka zoshü ti,” Jisu le zo, “Temi kechagü mvule temi higü we Sunggigü mhundyü ka ntsenlo sele tseo a-ka ki nshye laso. Kechamvule temi lihigüe a-le gon letse kehü gü thyü pe shenla ti; ai temi lihigüe a-le a-npvü shen letse kehünyu thyü ngon shü nrün genyu,” tsonla.
Jisu Le Jochü Pe Ntsenyu Ketsü
(Mt 19:13-15; Mk 10:13-16)
15Tsüselo mele Jisu no a-nyenyu kesüshülo tseo anyugun zen-o a-ki ryü; lo senthyükelonyu danle tsü hyushüo anyugun rho sola. 16Ai Jisu le anyu ko-o, “Ntsenyu dan no aki ryülo, lo anyugun khin nyalo. Kechamvule tsangge keda le hihontse kethyünyu ho genyu. 17Hire, ale hagun ka zo tsentsü shüti, temi lihigüe ntsenyu hontseo Sunggigü keda zenlo mvulo, a-le tsünyu yü keloi mvu,” tsonla.
Kenya Kedagü Rüla
(Mt 19:16-30; Mk 10:17-31)
18Tsüselo kedanyu nmele Jisu ka ryüo, “Hire, senkethyü kegwa gü, ale kethonthen kerhün hyulo nrün genyu nyu thyülo mvuloshvu la?” tson-o ketsoshü.
19Tsüselo Jisu le a-ka, “Nle nyuthyüo ano kegwa gü letse hü nla? Kegwa gü tsü le nme nti, tsüle Sunggigü le. 20‘Nle keyüla nya; nle me dushvu loshvu; rühu nya; kenku jünzo nya, npvü njvü nyu rühvulo chi,’ tsonkethyü jo hi nko sha bin ti,” tsonshü.
21Tsontsin a-le Jisu ka, “Senkethyü gü, ale a ncheka nyu tha hi aphu zen soryüla sele.”
22Tsükatsü Jisu le jo tsü shashü njüo a-ka, “Nle tha nme timvu zun; gü nhon kebin tsü aphu jwen pe kendinyu tsü lachi, tsonlo yatselo tsangge nkenya le bin loti, tson-o ryü a sithenlo chi,” tsonla.
23Ai a-le jo tsüdan shalo ntsin a-mhu gwakemvu thyülo la; kechamvule a-le kenya kegwanyu nme genyu.
24Lo Jisu le a-hyushü njüo, “Kenyanyu hile Sunggigü keda nyu yü nrün le tsensa ti hile la! 25Kenyanyu no Sunggigü keda nyu yü nrün le ut nme no chwünkü nyu nna chwi kela we nne kvu ti.”
26Tsüselo jo tsü keshanyu dan me le, “Tsonlo senyu le Kenikelo hyulo gwa tila?”
27Ai Jisu le, “Temi le thyülo keho tsü Sunggigü le thyülo gwa.”
28Tsontsin Pitor le, “Hire, agun we agun hon aphu khela njüo n sithen hü laso.”
29Tsüselo a-le anyugun ka, “Ale hagun ka zo tsentsü shüti, temi lihigüe Sunggigü keda genyu a-ka, nmvue a-nu, nmvue a-tsasikezen gü, nmvue a-pepvünyu, nmvue a-nyenyu khekelanyu ntson ntsenyü keyhun ka tsünye kechon hyulo ti, 30lo sigü keyhun ki-e kethonthen kerhün hyulo ti.”
Jisu Le A-si Lo A-le Rhünni Keso Nchwenyu Kezo Gwünshen Gü
(Mt 20:17-19; Mk 10:32-34)
31Tsüselo a-le tseryü kenyhunche dan zen-o a-ki ryü njüo anyugun ka, “Hire, ngun le Jerusalem nyu nsin titse bin laso; lo sidyükeshanyu le thu kenjü aphu Temi Nyugü ge thyü pen küti. 32Ngun nsinlo mele a-ten pe juda kemvunyu ben nyu shü lati. 33Tson-o meno a-shwinyü lo a-nshwen-o nsü pe a-nye ti, lo meno a-vüo a-dushvu ti; tson-o jonshen nyü a-le rhünni so lati,” tson zoshü.
34Ai anyugun le jo tsügü rüla keshanyue shabin mvu; tson-o jo tsü pe anyugun kebu shükela genyu nyuzohü yo anyugun le tsü rüchünlo mvula.
Jeriko Nyu A-yhütyü Keponyu Nme Thyüngwa Keshü
(Mt 20:29-34; Mk 10:46-52)
35Tsüselo a-le Jeriko rünyi khonni gunzhü, tsüka a-yhütyü keponyu nme le tsonkhoka shvutyü bin-o hyulo. 36Lo a-le temi kechon ki le a-khoka gun kejü shashüo,“Nyuthyü titseo tson hüyo?” tsekethyü meka ketso.
37Tsüselo mele a-ka, “Nazaret Jisu le ryü jü nle,” tsekethyü a-ka zoshü.
38Tsüselo a-le nra sen-o, “David Nyugü Jisu,nle a njün shüta!”
39Tsükatsü ri kegun nyu dan le a-kesüo, A-no matse bin lo tse sola. Ai a-le nra a-yhenthyünio, “David Nyugü, nle ashwi njünshü ta,” tsonlo la.
40Tsügenyu Jisu le sunlo njüo meno a-zen ryülo tse so. Tson-o a-khonni npharyü zhü ntsin, a-ka, “Nle ano nge nyuthyü keshü le nkenyü tila?” tson-o a-ketso shü.
41Tsüselo a-le, “Npugü, ano tha hyulo ta!”
42Tsontsin Jisu le a-ka, “Nyhütyü no tha hyulo chi! N ketenyen le nthyü ngwa shü sele!” tsonshü.
43A-le tsonshü ntsin, a-yhütyü le thahyu chwiryülo la; tson-o a-le Jisu sithen-o Sunggigü shwen zintin la; lo temi aphu tsü hyuo Sunggigü shwen sola.
Currently Selected:
LUK 18: REGSBSI
Highlight
Share
Copy
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
