LUK 19

Jisu Le Zakia Kanyu Kegun

1Tsüselo a-le Jeriko rünyi nyu yüo rünyi tsügü pvüthü gunzhü. 2Lo rünyi tsünyu Zakia tsekethyü nmele bin; lo a-le khajana keshvunyu dan nyu kedanyu nme, tsüntimvule a-le nnya sa. 3Lo a-le Jisu tsüle segü yo tse kethyü nrishü titse kethyü rüchün hü; ai a-le a-gü tsenyomha gwünzin laryü, temi kechonki le kehü genyu a-le hyulo mvula. 4Tsügenyu a-le me mhundyü rio n ton gü shwishü titseo tinkübin nme ge kü; kechamvule Jisu le tsü kipon ryü zhü kethyü genyu. 5Lo Jisu le gü tsü tilo ntsin nyi sogü a-ka, “Zakia, whütse tsenryülo; kechamvule ale nthu gü nka nyu bin mvulo shvu kebin genyu.”

6Tsüselo a-le whütse tsenryülo njüo a-shekerhün thyü Jisu nsinlo. 7Lo temi dan le tsü hyushüo kenya kenyüo, “Likili, a-le kemunyu kanyu gü tsünyu zen kengü bin laso!”

8Tsükatsü Zakia le solo njüo Npugü ka, “Hire, Npugü, ale ahon peha shü pe tha kendinyu tsüla tile; lo ale nkuo mehon tha peha selo la yatse-e ale tsü jünzi kho khinipe me tsüla tile,” tson sola.

9Tsüselo Jisu le a-ka, “Nthu kenikelo le ka hinyu ryü laso; a-ko Abraham nyu genyu. 10Kechamvule Temi Nyugü le nmhen kelanyu füo tsünyu kenilo titse ryü kethyü genyu.”

Raka Khin Tseryü Pe Jokejvü Kezo.

(Mt 25:14-30)

11Lo mele a-jo tsü nyü kebinka a-le Jerusalem rünyi kho nni gunzhü kela genyu lo Sunggigü keda thyü whütse ryüla nrün, mele rüchün kehü genyu a-le jokejvü nme zoni shü. 12Tson-o a-le, “Kedanyu nme le a-npvü a-keda loni sen gunryü titseo rünyi nithen ki gunla. 13Tsükatsü a-gonyu mi tseryü le kethen ryüo raka khin tseryü pe anyugun tsüshü njüo anyugun ka, ‘Hagun ale ryü kemvuthen hi khisen-o hathyü hü tse nye,’ tsonshü la. 14Ai a-nyu rünyi nyu le a-shwi rüchün-o, lilonyu nme nipe a-ki shüo, ‘Agun le temi higühi no agun so keda thyü nyü mvu le.’

15“Tsüselo a-le a-keda hyulo njüo ryü ntsin a-le raka pe a-gonyu dan me tsükeshü dan tsüle anyugun raka pe hathyüo chwikelo tsü shashü nyüo, tsüdan ko zen ryülo tseo ahza hoshü. 16Tsüselo a-kerigü le a-mhundyü ka ryüo, ‘Npugü, n raka pe hathyüo tsü jüntseryü kho chwilo laso.’ 17Tsontsin kedagü le a-ka, ‘Gwasa le, nle keseri go ketsin so; nle tha keshanyu ge-e joketsin zokelo genyu ale nno rünyi tseryü so keda thyü ti le.’ 18Tsüsika kenyhun gü ko ryüo, ‘Npugü n raka tsü lope hathyüo tsü jünpvün kho chwilo la sele,’ tson. 19Tsüselo kedagü le tsügü ka ko, ‘Nko no rünyi pvün so keda thyüti,’ tsonla.

20“Tsüselo kechanyu nme ko ryüo, ‘Npugü, n raka le re, the! Ale hikho hi khipe phiren nyu jwen njü lenye. 21Nle temi ketsenkerün nme genyu ale n nshvula so; nle nhon kemvue khilo lotse hünyo,nle ntsi sen tsügü gwünshü kemvu ki-e gvülo la hünyo,’ tsonso. 22Kedagü le a-ka, ‘Nle serikemvu gogü, nmün nyu chwikeryü njo tsü ale tsü sen-o n nmuti. Ale ketsenkerünnyu nme, ale ahon kemvue khilo hü; ale ntsi sen tsügü gwünshü kemvu bin ki-e gvülo kehü nle shabin letse la? 23Kha, tsonlo nle nyu thyüo a raka tsü khisen gü raka kanyu shü njü mvula? Tson yatselo ale niryüo hi kethyü ka a raka kechwi-e hyusinlo nrün.’

24“Tsüselo a-le a-khoka kebin nyu dan ka, ‘Hagun we temi higü ben nyu raka khin khisen gü khin tseryü le kebin gü ben nyu shü lalo. 25Tson-o anyugun le a-ka, ‘Npugü, a-le khintseryü le bin nyo,’ tson. 26Ale hagun ka zoshü ti, ‘Temi lihigüe tha le kebin nyu khipe a-tsü sinshü ti; ai kendi gü we, a-hon kebin tsüe khisen ni tinla ti. 27Ai a shwikerüchün hidan ano anyugun so keda thyü kemvu dan zen ryüo hika a mhundyü ka anyugun dushvu lalo!’ ”

Jisu Le Gingvü Tse Jerusalem Nyu Keyü

(Mt 21:1-11; Mk 11:1-11; Jn 12:12-19)

28Tsüselo a-le jo tsü zoshü njüo ri sen tse Jerusalem ki nsin zhü. 29Tson-o a-le Oliv tsekethyü kazüthun Betfage lo Bethani au rünyi kho nni gun kezhü ka a-le senthyükelonyu mihvu nishüo au ka, “Hai rünyi hai ntsun kebin gü nyu tsü gunlo nye. 30Lo hai le rünyi tsünyu yülo, nduka temi nme-e a-ge kü kemvu gada nme dyü pe bin kenjü hyulo ti lenye; tsügenyu tsü shwülo njüo zen ryü chi. 31Lo mele hai ka, ‘Hai le nyuthyüo tsü shwü bin nla?’ tson-o hai ketso yatselo hai le meka, ‘Npugü le hi bin nle,’ tson zola nye.”

32Lo a-le au nikeshü hvu le gü a-le au ka zokeshü hontse hyulo. 33Tson-o au le gada nyugü tsü shwü bin ntsin, gada npunyu le au ka, “Hai le nyuthyüo gada nyugü shwü bin nla?”

34Ai au le, “Npugü le hi sen mvulo shvu bin nle,” tson-o au le a-zen-o Jisu ki ryü. 35Tsüselo mele me phi lope gada ge lashüo Jisu le tsü ge kügü binlo. 36Tson-o a-le tsonchü shü ntsin mele mephi khipe tson nyu lashü.

37Lo a-le Oliv kazüthun kho nni ryü kezhü ka senthyükelonyu dan aphu a-tho keda kehyu genyu nra sen-o anyugun shekerhün thyüo Sunggigü zan shwen sola. 38Tson-o, “Npugü zan sen ryü kezhü Raja gü no kengvü gü thyülo; lo tsangge-e kegwagü thyülo chi, lo tsang teso tsin ge-e a-zan no zankechwi gü thyülo chi!”

39Lo tsükatsü temi dan nyu Farisinyu dan me le a-ka, “Senkethyü gü,nle senthyükelonyu ju khinla chi,” tson.

40Tsüselo a-le anyugun ka, “Ale hagun ka zoshü ti, temi hidan hi no ma tselae, tso dan-e nra soryü lati,” tsonla.

Jisu Le Jerusalem chekechü

41Lo tsükatsü a-le rünyi nyida gü kho nni npharyülo ntsin chüo, 42“Nle nthu hi-e bwenlo nrün tson shalo gwa nrün laryü me! Ai ntsoka we tsüle nkebu tin laso. 43Lo gwünkho nme le ryü ti, tsükatsü n shwikerüchün nyu le chwi thyü pe nhun keteno loti, tson-o anyugun le n hunpvü loti. 44Tson-o nte lizin hizin ntalo lati; lo n kedüla ti; lo n nyenyu ju sin-o nka no pen tsügü nmin keto pe kazü nyu shü lati; lo tso nme-e no kerenpvü bin loho lati; kechamvule nle ale nfü keryü gwünkho shamvu kela genyu!”

Kershvuka Gü Thyünshün Keshü

(Mt 21:12-17; Mk 11:15-19; Jn 2:13-22)

45Tsüselo a-le Kershvuka nyu yügü tha jwen kebin tsü khipe shwen so, 46tson-o temi dan ka, “ ‘A ka no kehika thyü ti,’ tson kethyü thu njü; ai hagun le higü hi pe kerühu ka nme thyü laso!”

47Lo a-le khenyütsen Kershvuka nyu me senthyü zin tinla. Ai peshükeda ju lo thakeshatsin ju lo temi dan nyu pelü kethyü ju le a-boshvula titse kethyü gü nti rhi sola. 48Ai temi aphu a-hoshü mvuo a-jo nyü gwünzinlo kela genyu anyugun le thame thyü loshvu la.

Currently Selected:

LUK 19: REGSBSI

Highlight

Copy