KORINTHTE I 12
12
Hagaulam silpiah tungtaang a thuhilhna
1Huleh unaute, hagaulam silpiah tungtaang zaw, he lou a na um uh ka deih sih hi. 2Jentelte na hih laiun, pui a na um bang jelun, hi milem haam theiloute lamah puimang in na um veu uh chih na he uhi. 3Hujiahin kuama’n Pathian Hagau a thu soi in, Jesu chu haamsethuaah ahi, a chi ngei sih hi; huleh kuama’n Hagau Siangthou louin Jesu chu Lalpa ahi, a chih thei ngei sih hi, chih ka hung hesah hi. 4Huchi'n silpiah tuamtuam a um a, hizongleh Hagau khat ahi. 5Huleh thunatohna tuamtuam a um a, hizongleh Lalpa khat ahi. 6Huleh natohdan tuamtuam a um a, hizongleh bangkim a bangkim bawltu Pathian khat ahi. 7Hizongleh phattuampih chiatna diingin Hagau kilatna chu michin kawmah piah ahi. 8Ajiahchu mi khat kawmah Hagau in pilna thu piah ahi a; midang kawmah hu Hagau mahin heetna thu piah ahi; 9Midang kawmah hu Hagau mahin ginna piah ahi a; midang kawmah hu Hagau mahin suhdamtheihna silpiahte piah ahi; 10Midang kawmah silmah bawltheihnate piah ahi a; midang kawmah thusoitheihna piah ahi; midang kawmah hagaute heetkhentheihna piah ahi a; midang kawmah haam tuamtuam a thusoitheihna piah ahi; midang kawmah haam tuamtuam lehdohtheihna piah ahi; 11Hizongleh hute zousiah chu Hagau khat mahin mi chin kawma a deih bangjel a hawm chiat in a tong hi.
Mihing sapum apat etsahna
12Bang jiahin ahiai i chih leh sapum chu khat ahi a, hiang tampi a nei hi, hiang zousiahte chu tam mahleh uh sapumkhat ahi uh; huchimahbangin Khrist zong ahi. 13Ajiahchu eiuh Judate hiin, Jentelte hitalei, suaah hiin, suaahlou hilei, i bawnun sapumkhat a um diingin Hagau khat a baptis in i um uhi; huleh i bawnun Hagau khat mah dawnsah in i umta uhi. 14Sapum chu hiang khat chauh ahi sih a, hiang tampi ahi zaw hi. 15Keeng in, Khut ka hih louh jiahin sapum a pang ka hi sih, chileh; hi jiahin sapum a pang lou ahi diai mah? 16Huleh bil in, Mit ka hih louh jiahin, sapum a pang ka hi sih, chileh; hi jiahin sapum a panglou ahi diai mah? 17Sapum chu a pumpiin mit hitaleh, khojahna khoiah a umta diai? A pumpi in khojahna hitaleh gimnam heetna khoiah a umta diai? 18Hizongleh Pathian in hiang chinteng chu pha a sah bangin sapum ah a koih hi. 19Huleh a bawnun hiang khat chauh hitaleh uh, sapum khoiah a umta diai? 20Hizongleh tuin hiang tampi hizongleh uh, sapumkhat chauh ahi. 21Huleh mit in khut kawmah, Bangmahin ka hung mamoh sih, a chi thei sih; lutang in zong keeng kawmah, Bangmahin ka hung mamoh sih, a chi thei tuan sih hi. 22Chi thei lou, chihtaah sangin sapum hiang haat lou a kilangte a mamoh zaw mahmah hi. 23Huleh sapum hiang ngaihsah tham louh a i guatte naahtahin i zahbawl zaw a, huleh i hiang kilawmloute’n naahpitahin kilawmna a nei zaw uhi. 24I hiang kilawmte’n chu huchibang a kiphamoh sih uhi; hizongleh Pathian in poimoh thamlou hiangte chu zahbawl semin, sapum chu a lemkhawm hi. 25Huchia sapum a kikhenna a um louh a; hizongleh hiangte chu khat leh khat a kingaihsah chiat theih zawhna diingun. 26Huleh hiang khat in a thuaah in zong hiang zousiah in a thuaahpih jel a; huleh hiang khat paahtawi a, a um leh hiang dang zousiah in a kipaahpih jel uhi. 27Tuin nanguh chu Khrist sapum na hi va, a mimalmal in a hiangte na hi uhi. 28Huleh Pathian in khenkhat kouhtuam ah ahung koih a, a masapenin sawllehte, a nihna ah zawlneite, a thum na ah thuhilhtute, hubanah silmah bawltute, huzohin suhdamtheihna silpiahte, panpihtheihnate, vaihawmsiamnate, haam tuamtuam a haamtheihnate. 29A bawnun sawlleh ahi viai? a bawnun zawlnei ahi viai? a bawnun thuhilhtu ahi viai? a bawnun silmah bawltute ahi viai? 30A bawnun suhdamtheihna silpiahte a nei viai? a bawnun haam heet louhin thu a soi viai? a bawnun haam heet louh a let thei viai? 31Hizongleh silpiah hoihpente chu lunggulh zaw un; huchi'n lampi hoihzaw ka hung musah diing hi.
Currently Selected:
KORINTHTE I 12: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.