KORINTHTE I 11
11
Kouhtuam kikhopna a numeite umdan diing
1Kei Khrist umdan latu ka hih mahbangin, nanguh ka umdan latute hi un. 2Huleh unaute, sil zousiaha na hung heet zing va, thugousiah ka hung hilh bang jel a na kolzing jiahun ka hung paahta hi. 3Hizongleh pasal photmah lutang chu Khrist ahi a, numei lutang chu pasal ahi; huleh Khrist lutang chu Pathian ahi chih na heet uh ka hung deih hi. 4Pasal, a lu khuh pum a haamtei aha, ahihlouhleh thusoi aha photmah in a lu a zahbawl lou ahi. 5Hizongleh numei, a lu khuh lou a haamtei aha, ahihlouhleh thusoi aha photmahin a lu a zahbawl lou ahi; bang jiahin ahiai chih leh huchibanga bawl chu a kimeet toh kibang giap ahi. 6Ajiahchu numei in a lu a khuh louh ngal inchu meet mei heh; ahihvangin numei diing a sam meet ahiai mah, ahihlouhleh meetkiau ahiai a zumhuai inchu kikhuh heh. 7Pasal vang chu Pathian lim bang leh a loupina ahihjiahin a lu a khuh louh diing mawng ahi; numei ahihleh pasal loupina ahi. 8Bang jiahin ahiai i chih leh, pasal chu numei apat siam ahi sih a; numei ahihleh pasal apat siam ahi zaw hi. 9Pasal chu numei a diing a siam zong ahi sih a; numei chu pasal a diing a siam ahi zaw hi. 10Hikhu jiahin numei in pasal thuneihna chiamchihna angelte jiahin a khuh diing ahi. 11Hizongleh Lalpa ah chu pasal lou in numei a um sih a; numei lou in pasal a um sih hi. 12Ajiahchu numei hi pasal apat siam ahihbang mahin pasal zong numei jiah a piang ahi; hizongleh sil zousiah Pathian a kuan veh ahi. 13Nangun kingaihtuah un; numei in a lu khuhlou a Pathian kawma a haamtei a kilawm eimah? 14Pasal in sam saau a neih leh amah diingin a zumhuai hi, chih ngeina dan inzong ahung hesah sih eimah? 15Hizongleh numei in sam saau a neih inchu amah diingin loupina ahi zaw hi; ajiahchu a sam chu khuhna diing a piah ahi. 16Hizongleh mi koiaha in a nial nuam inchu huchibang tawndan i nei sih uh, Pathian kouhtuam pawlte’n zong a nei sih uhi.
Lalpa nitaah an neeh thu a hilhna
17Ahihvangin, nanguh hi thu ka hung hilhna ah ka hung phatthei sih hi, hoihzawhna sem diing a kikhawm lou in, siatzawh semna diingin na kikhawm veu uhi. 18Bang jiahin ahiai i chih leh a masapenin, kouhtuam a na kikhop chiangun na lahvah kilangkhenna a um veu chih ka ja hi; huleh gin zong ka gingta hi. 19Ajiahchu a taha kipomte a kilat theihna diingin na lahvah gindan tuamtuam zong a um diing mawng ahi. 20Hujiahin mun khat a na kikhop chiangun Lalpa nitaah an neehna gual ahi sih hi. 21Ajiahchu na neeh chiangun mi chinin midangte ma in nanguh nitaah an na kineeh chiat uh; huchi'n khat a gilkial a, a dangin a kham hi. 22Bangchidan ahiai? Neehna diing leh dawnna diingin kineih lou na hi viai mah? ahihlouhleh Pathian kouhtuam na musit un, bangmah neiloute na selphou uh ahiai mah? Na kawmvah bang ahiai ka soi diing? Hi thu ah ka hung paahta diing adiai? Ka hung paahta hial sih hi. 23Bang jiahin ahiai i chih leh Lalpa kawm apat ka muh chu nanguh ka hung hilhsawn ahi, huchia Lalpa Jesu’n matsaha a um jan a, tanghou a laah a; 24Huleh kipaahthu a soi zoha a balkeeh a, La unla, ne un; hichu ka tahsa, nanguh diing a kipia chu ahi; na hung heet zing na diingun hichu bawl jel un, a chih. 25Huchimahbanga an a neeh zoha nou zong a laah a, Hi nou chu ka sisana thuhun thah ahi; na dawn teng va na hung heetzingna diingun hichu bawl jel un, a chih. 26Ajiahchu hi tanghou na neeh va, hi nou na dawn tengun a hung kiit masiah Lalpa sihna na ensah jel uh ahi. 27Hujiahin mi koipouh taah loupia Lalpa tanghou ne leh nou dawn chu, Lalpa tahsa leh sisan tungah siamlouh a tang diing hi. 28Hizongleh mi amah kienchian zaw heh, huchi'n tanghou chu ne henla, nou chu dawn heh. 29Bang jiahin ahiai i chih leh Lalpa tahsa ngaihtuah lou a, ne taah lou leh dawn taah loupia ne leh dawn inchu, amah siamlouh kitanna diingin a ne in a dawn ahi. 30Hikhu jiahin na lahva mi tampi na zawngkhal va, na china uh; huleh tampi na ihmuta uhi. 31Ajiahchu eimah le eimah ki vaihawm lei chu, vaihawmsaha um lou diing i hi. 32Ahihvangin vaihawmsah a i um in zong khovel toh siamlouh tang a i um louhna diingin Lalpa taihilh in i um veu uhi. 33Hujiahin ka unaute, ne diing a na kikhop chiangun khat leh khat kingaah chiat un. 34Huleh na kikhop uh vaihawmna na thuaahloh louhna diingun mi koipouh a gil a kial leh a inn lamah ne heh. Huleh thu dangte chu ka hung chiangin ka lem veh na diing hi.
Currently Selected:
KORINTHTE I 11: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.