KORINTHTE I 10
10
1Unaute, hite na heet louh uh ka deih sih, huchia i pulepate a bawnva mei nuaia ana um va, huleh a bawnva tuipi a kaan va; 2Huleh a bawnva mei ah leh tuipi a Mosi kawm a baptis a a um va; 3Huleh a bawnva hagaulam an kibang a neeh va; 4Huleh a bawnva hagaulam dawn kibang a dawn chiat uh; ajiahchu amahuh juitu hagaulam suangpi a a dawn chiat uhi; hu suangpi chu Khrist ahi. 5Hizongleh a lahva mi tampite tungah Pathian a lungkimta sih a; gamdai ah a puuhlum gamta uhi. 6Hite chu ei u’diing a i etton diing uh ahi, silgilou a lunggulh bang va i lunggulh louhna diingun. 7A lahva khenkhat milem bemi ahih bangun milem bemi hi sih un; Mipite chu ne diing leh dawn diingin a tou va, huleh kimawl diingin a ding jel uh, chih gelh bangin. 8A lahva khenkhat in nungaah a ngai va, ni khat in saang sawmnih leh saang thum a puuhlup loh bangun ei u’chu i kingai sih diing uh. 9A lahva khenkhat in a ze-et va, guula suhmang a, a um bangun, eiun zaw Khrist i ze-et sih diing uh. 10Huleh a lahva khenkhat a phun va, sumangtu suhmang a a um bangun i phun sih diing uhi. 11Huchi'n hite zousiah chu etton diingin a tungvah ana tung ahi; huleh eiuh khovel huntawp hung tunnate kawma thuhilhna diing a gelh ahi. 12Huchi ahihjiahin dinga kingaihtuah chu pilvaang heh, huchilouin chu a puuhkha diing hi. 13Mihing thuaahzoh val heemna na tungvah a tung ngei nai sih, hizongleh Pathian chu a muanhuai hi, ama’n na thuaahzoh val uh heemna na tuaah diing uh a phal sih diing; na thuaahzoh na diingun heemna toh kitonin taikhiahna lampi zong ahung siamsah zo diing hi. 14Hujiahin ka deihtahte, milembiah taisan un. 15Mipilte kawma thusoi bangin ka soi ahi; ka thusoi ngaihtuah un. 16Vangpiahna nou i dawn uh Khrist sisan kipawlkhawmpihna hilou ahiai mah? Tanghou i balkeeh uh Khrist sapum kipawlkhawmpihna hilou ahiai mah? 17Ajiahchu eiuh tampi hingalin tanghou khat, huleh sapumkhat i hi uh; bang jiahin ahiai i chih leh hu tanghou beu khatah tan nei chiat i hi uhi. 18Tahsa daan a Israelte en un; kithoihna sa nete, maitaam toh tan neikhawm ahi sih viai mah? 19Ahihleh bang ahiai ka soi? Milem chu sil bangahakhat ahi a, huleh milem biahna a sil kilaante zong sil bangah a khat ahi chi ka hiai mah? 20Jentelte kithoihna chu Pathian kawmah hilou in, dawite kawmah a kithoih uh chih ka soi zaw ahi; nanguh dawite toh na kipawlkhawm uh ka hung deihsah sih hi. 21Lalpa nou leh dawite nou na dawnkhawm thei sih diing uh; Lalpa dohkaan a leh dawite dohkaan a zong na nekhawm thei sih diing uhi. 22Ahihleh Lalpa thangsiat diing a haantawh tum i hi viai? Amah sanga haatzaw i hi viai mah? 23Sil zousiah kei diingin a siang a, hizongleh sil zousiah a hoih kim sih hi; sil zousiah kei diingin a sianga, hizongleh sil zousiah in a siam hoih sih hi. 24Mi koimah in amah ngen hoihna diing hawl lou in, midangte hoih na diing hawl zaw heh. 25Sa, dawl a kizuah photmah chu, sialepha heetna jiahin bangmah dongse louin ne un; 26Ajiahchu leilung leh a sunga um zousiah Lalpa a ahi. 27Ginglou mite laha koiaha in an ne diing a ahung chial a, huleh chiah na ut ngal unchu, na ma va a lui phot uh, sialepha heetna jiahin bangmah dongse louin ne mei un. 28Hizongleh mi koiaha in, Hichu milem kawma kithoihna ahi, chia ahung hilh leh, amah ahung hilhpa jiah leh, sialepha heetna jiahin ne sih un; ajiahchu leilung leh a sunga um zousiah Lalpa a ahi; 29Nangmah sialepha heetna chi ka hi sih a, midang sialepha heetna chi ka hi zaw hi; bang jiahin ahiai i chih leh midang sialepha heetna in bang diinga ka zalenna hung awimoh diing ahiai? 30Ajiahchu, kipaahtaha ka neeh leh, bang diinga kipaahthu ka soina tunga soisiat a um ka hiai? 31Hujiahin na neeh un hileh, na dawn un hileh, na bawl photmah uh Pathian loupina diingin bawl veh un. 32Judate aha, Jentelte aha, ahihlouhleh Pathian kouhtuamte hitaleh a puuh na diingun bangmah bawl sih un. 33Keimah phattuamna diing hawl loua, hutdam ahihtheihna diing va mi tampite phattuamna diing hawl zaw a, sil zousiaha mi chinteng ka kipaahsah bang mahin.
Currently Selected:
KORINTHTE I 10: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.