KORINTHTE I 9
9
Paul in amah tungtaang etton diing a, a zatna
1Sawlleh hilou ka hiaimah? zalen hilou ka hiaimah? I Lalpa uh Jesu Khrist ka mu sih eimah? nanguh Lalpa a ka natoh hilou na hi viaimah? 2Midangte diingin sawlleh hi sih mah zongleng, nanguh diingin chu ka hi ngei mei hi; bang jiahin ahiai i chih leh Lalpa a ka sawlleh hihna chiamchihna chu nanguh na hi uhi. 3Kei hung enkhetute kawma ka dawnna chu hikhu ahi, 4Neehna diing leh dawnna diing thu nei lou ka hi viai mah? 5Sawlleh dangte leh, Lalpa unaute leh, Kipha banga unaunu khat kipuileh a, ji a nei thei lou ka hi viai mah? 6Ahihlouhleh, nna toh louhna diingin kei leh Barnaba chauh thunei lou ka hi viai mah? 7Sepaih koi ahiai amah neihsa seeng a gaalkuan ngei? grep hu an bawl ngal a, a gah ne lou koi a um ei? ahihlouhleh ganhon khawi ngal a, a nawi ne lou koi a um ei? 8Hi thute mihing ngaihdan chauha soi ka hiai mah? ahihlouhleh daanthu in zong humah a soi sih eimah? 9Ajiahchu Mosi daanbu ah, Bawngtal in buh a chil laiin a muuh kaan sin, chih gelh ahi. Pathian in bawngtalte diing chauh ngaihtuah ahiai mah? 10Ahihlouhleh ama’n eite diing jiah maha a soi ahiai mah? Eite diing jiaha gelh ahi tahzet hi; leilettu in kinemtahin a let diing ahi a; huleh kinem puma buhvotu in zong a kinepna chu a muh diing ahi. 11Keiun na kawmva hagaulam silte tuh ka hih uleh, na tahsalam silte uh aat le’ung sil loupi ahiai mah? 12Midangte’n na tungva hi thuneihna tang ahih uleh, kei un zong ka tang sih diviai mah? Ahihvangin hi thuneihna ka zang sih uhi; Khrist tanchinpha ka daal louhna diingun bangkim ka thuaah zaw uhi. 13Sil siangthou a biahna natongte’n Pathian biahinn a silte a ne va, huleh maitaam a natongte’n maitaam a silte ah tan a nei uh chih na he sih viai mah? 14Huchimahbangin tanchinpha soitute chu tanchinpha maha a hin diing uh chi'n Lalpa’n a guat hi. 15Hizongleh ke’n chu hi silte khatbeeh ka zang sih; huleh hi silte ka tungah kibawlleh chia gelh zong ka hi sih hi; ajiahchu koiaha in ka kisuannapen bangmahlou a, a bawl sangin, kei di’n sih a hoihzaw hi. 16Bang jiahin ahiai i chih leh tanchinpha soi zongleng suan diing bangmah ka nei sih hi; bawl louh theih louh ka tunga kinga ahihjiahin; tanchinpha soi sih leng ka tung gih diing ahi. 17Ajiahchu hi sil ka utthu a bawl ka hihleh kipaahman muh diing ka nei hi; hizongleh ka utthu lou a bawl ka hih inchu tanchinpha kepna ka khut a piah ka hi diing hi. 18Huchi hileh ka kipaahman bang ahitai leh? Tanchinpha ka soi chianga tanchinpha a ka thuneihna a vuum a val a ka zat louhna diing a Khrist tanchinpha a man bei a ka umsah chu ahi. 19Ajiahchu mi zousiah apat zalen himahleng, mi tamsem ka laahluut theihna diingin mi zousiah suaahin ka kibawl hi. 20Judate ka laahluut theihna diingin Judate kawmah Judami bangin ka um a; daan nuaia umte ka laahluut theihna diingin, daan nuaia umte kawmah daan nuaia umte bangin ka um hi, daan nuaia um lou himah zongleng. 21Daan neiloute ka laahluut theihna diingin, daan neiloute kawmah daan nei lou bangin ka um hi, Pathian daan nuaia um lou tuan louin, Khrist daan nuaia um ngal in. 22Mi haatloute ka laahluut theihna diingin, mi haatloute kawmah haat lou bangin ka um hi; bangchizawng aha a mi khenkhat beeh ka hutdam theihna diingin mi zousiah kawmah sil bangkimin ka kibawl hi. 23Nang u’toh tan ka neih theihna diingin tanchinpha jiahin hichu ka bawl ahi.
Gingtute kitaidemna
24Kitaidemte chu a bawnun a tai va, hizongleh khat chauhin kipaahman a mu veu uh chih na he sih viai mah? Na tan theihna diingun huchibang mahin tai un. 25Huleh koipouh kidemna a zoh tum mi chu sil zousiah ah a kideeh veu uhi. Amahun vang lallukhuh sethei muhna diingin a bawl uh ahi a; eite’n chu lallukhuh sethei lou diingin ahi. 26Hujiahin huchimahbangin ka tai a, jiah bei hilou in; a guaahpi tuum hilouin ka pang hi. 27Hizongleh ka sapum ka sawi a, ka thu nuaiah ka koih hi; huchilouin chu midangte kawma tanchinpha ka soi zoh nungin keimah houh paihkhiah in ka umkha diing hi.
Currently Selected:
KORINTHTE I 9: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.