KORINTHTE I 15
15
Gingtute thohkiitna diing thu a hilhna
1Huleh unaute, na kawmva ka tanchinpha soi, pom zong na pom va, huleh humaha na dinna uh chu ka hung hesah ahi. 2Na kawmva ka thusoi na pomdet uleh humah a hutdam zong na hi uhi, huchi ahih louh inchu a thawnin na gingta uh ahi. 3Bang jiahin ahiai i chih leh a masapenin ke’n zong ka muh chu nanguh ka hung hilhsawn hi, chihchu, Pathian lehkhathu dungjuiin Khrist chu i sualnate jiahin a si a; 4Huleh vui in a um a, Pathian lehkhathu dungjuiin ni thumni in a thou kiitta hi. 5Huleh Kipha kawmah a kilaah a, huzohin sawmlenihte kawmah; 6Hunungin unau ja ngaa sanga tamzaw kawmah khatvei thuin a kilaah a; a lahva tamzaw chu tutanin a dam nalai uh, hizongleh khenkhat chu a ihmuta uhi. 7Hunungin Jakob kawmah a kilaah a; huin sawlleh zousiah kawmah. 8Huleh a tawp pen ah, a hun lou banga piang kei kawmah zong a kilaah hi. 9Ajiahchu sawllehte laha a neupen ka hi a, Pathian kouhtuam ka sawih jiahin sawlleh minvoh taah zong ka hi sih hi. 10Hizongleh Pathian hehpihna jiahin ka hihhih diing ka hita; huleh a hehpihna hung piah chu a thawnin a um sih a; hizongleh amahuh haw zousiah sangin ka tonggim zaw hi; ahiinlah kei toh ahi sih a, Pathian hehpihna ka kawma um in a tong zaw ahi. 11Hujiahin kei hiin, amahuh hitaleh, huchi'n ka soi va, huchi'n nangun na gingta uhi. 12Ahihleh tuin Khrist chu misi lah apat a thou kiit chih a kisoi ngalleh, bang chidana na lahva mi khenkhat in misi thohkiitna a um sih na chih uh ahiai? 13Hizongleh misi thohkiitna um lou ahih inchu Khrist zong kaihthoh in a um sih diing hi. 14Huleh Khrist kaihthouh a um lou ahih inchu, ka thusoi uh a thawn ahi diing a, na ginna uh zong a thawn ahi diing hi. 15Ahi, Pathian in Khrist a kai thou hi chi a, Pathian heetpihtu hi a thu ka soi jiahun, kei u’chu Pathian heetpihtu dihlou bangin ka kilangta uh; misite thou kiit lou ahih unchu amah zong a kai thou sih diing hi. 16Ajiahchu misite a thohkiit louh inchu, Khrist zong kaihthoh in a um sih diing hi. 17Huleh Khrist kaihthoh a, a um louh inchu, na ginna uh a thawn ahi diing a; na sualna vah na um nalai diing uh. 18Huchiangleh Khrist a ihmutate a mangthai ahita diing uhi. 19Tu damsung chauha Khrist a kinepna i neih inchu, mi zousiah laha mi lungsiathuaipen i hi diing hi. 20Hizongleh tu’n Khrist chu misi laha kipan kaihthoh in a umta a, ihmute laha gahmasapen ahung hita hi. 21Bang jiahin ahiai i chih leh mihing jiaha sihna ahung um jiahin, mihing jiah mahin misi thohkiitna zong ahung umta hi. 22Ajiahchu Adam a mi zousiah a sih mahbangun, Khrist ah mi zousiah suhhing in a um diing uhi. 23Hizongleh mi chin amah hun chiat ah; Khrist chu gah masapen ahi a; hunung chiangin ahung kiitna ah Khrist a te ahi diing uh. 24Huzohchiangin a tawp ahung tung diing, hu hun chiangin vaihawmna zousiah leh thuneihna leh silbawltheihna zousiah sumangin Pathian, Pa kawm ngeiah lalgam chu a peta diing hi. 25Ajiahchu a meelmate zousiah a keeng nuaia a koih masangsiah ama’n vai a hawm diing ahi. 26Meelma nunungpen suhmanga um diing chu sihna ahi. 27Ajiahchu ama’n sil zousiah a keeng nuaiah a koihta hi. Hizongleh sil zousiah a thunuaiah a koih a chihin, a thunuaia sil zousiah koihpa chu a huam sih chih a kilang hi. 28Huleh sil zousiah a thunuai a a um chiangin, Tapa ngei zong sil zousiah a thunuai a koihpa nuaiah a kituluutta diing a, Pathian chu bangkim a bangkim a hihtheihna diingin. 29Huchi ahihlouhleh misite a diing a baptisma a tansah uh bang diing a tadiai, misite thou kiit mawngmawng lou ahih uleh? bang diinga misite a diinga baptisma tansah ahi viai? 30Huleh bang diinga eite zong daahkal china lauthawng a um zing i hi viai? 31Jesu Khrist i Lalpa u’a ka hung suanna sial in, Nitengin ka si, chih hahtahin ka soi ahi. 32Mihing tatdan bang a Ephesa a gamsate kisualpih ka hihleh, kei diingin bang a phatuam diai misite thou kiit lou ahihleh? nein i dawn diing uh; ajiahchu jing chiang a si diing i hi. 33Heemin um sih un; lawm gilou in umdan hoih a suse veu hi. 34Dihtatna lamah halh unla, sual sih un; ajiahchu khenkhat in Pathian heetna a nei sih uhi; hichu na zahtaat na diing va ka soi ahi.
Thohkiitna tahsa umzia diing
35Hizongleh mi koiaha in, Misite bangchi'n kaihthoh ahi diing viai? bangchi bang sapum nei in ahung pawt diviai? a chi ahi diing. 36Nang mingol, na haichi tuh zong a sih louh a ahihleh a pou sih hi. 37Huleh na tuh in a kung hung um diing khu na tuh sih a, gehu hiin, haichi dangdang hitaleh a tang mah ahi na tuh. 38Hizongleh Pathian in pha a sah bang jelin a kung a pia hi, haichi chin kawmah amah kung chiat. 39Tahsa zousiah chu tahsa kibang ahi sih a, hizongleh mihing tahsa a tuam ahi a, gamsate tahsa a tuam a, ngate tahsa a tuam a, huleh vate tahsa a tuam hi. 40Vaanlam sapum a um a, leilam sapum zong a um hi; hizongleh vaanlam sapum loupina a tuam a, leilam sapum loupina a tuam hi. 41Niin loupina tuam a nei a, ha in loupina tuam a nei, huleh aahsite’n zong loupina tuam a nei uhi; aahsi leh aahsi zong loupidan ah a kibang sih uhi. 42Huchibang mahin misi thohkiitna zong ahi. Muatthei a tuh in a um a; muatthei lou a kaihthoh in a um hi; 43Simmohumtaha tuh in a um a; loupitaha kaihthoh in a um hi; haatloutaha tuh in a um a; silbawltheitaha kaihthoh in a um hi; 44Tahsalam sapum a tuh in a um a; hagaulam sapum nei a kaihthoh in a um hi. Tahsalam sapum a um a, hagaulam sapum zong a um hi. 45Huchi'n, Mi masa Adam chu hinna nei mi a siam ahi, chih gelh ahi; Adam nunung chu hinna petu Hagau ahi. 46Ahihvangin hagaulam chu a um masa sih a, tahsalam a um masa hi; hunungin hagaulam ahung um hi. 47Mihing masa chu lei a siam, leimi ahi a; mihing nihna chu vaan a kuan Lalpa ahi. 48Lei a siam mite chu lei a kisiampa bang ahi va; vaanlam mite chu vaan a mi bang ahi uhi. 49Huleh lei a kisiam meel i put bangin, vaan mi meel zong i paw diing uhi. 50Hizongleh unaute, hichu ka soi ahi, tahsa leh sisanin Pathian gam a luah thei sih a; muatthei in zong muattheihlouhna a luah thei sih hi, chih.
Misiangthoute laahmang chianga sil umdan diing
51Ngai un, thuguuh ka hung hilh diing hi; i bawnun i ihmu veh sih diing va, hizongleh i bawnun suhlimdang in i um veh diing uhi. 52Thakhatin, mitphetkallou in, pengkuul nunungpen gin chian; ajiahchu pengkuul ging diing ahi a, huleh misite chu muatthei lou a kaihthoh in a um diing va, eite zong suhlimdang in i umta diing uhi. 53Bang jiahin ahiai i chih leh hi muatthei in muattheihlouhna a silh diing ahi a, huleh hi si thei in sihtheihlouhna a silh diing ahi. 54Huchia, hi muatthei in muattheihlouhna a silh a, huleh hi sithei in sihtheihlouhna a silh hun tahchiangin, Zohna in sihna chu a valh zouta, chia kigial chu ahung taangtungta diing hi. 55Aw sihna, na guu khoiah a um tai? Aw haankhuuh, na gualzohna khoiah a um tai? chih. 56Sihna guu chu sual ahi a, huleh sual thaneihna chu daan ahi. 57Hizongleh i Lalpa uh Jesu Khrist jala gualzohna hung pepa Pathian kawmah kipaahthu um heh. 58Hujiahin, ka unau deihtahte, dettahin, suhliing guallouh in, Lalpa natoh phatuamngaitaha tong ngiitngeet in um un; na tohgimna uh chu Lalpa ah a thawn sih diing chih na he ngal va.
Currently Selected:
KORINTHTE I 15: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.